౯. పఠమవససుత్తం

౪౦. ‘‘సత్తహి, భిక్ఖవే, ధమ్మేహి సమన్నాగతో భిక్ఖు చిత్తం వసే [వసం (క.)] వత్తేతి, నో చ భిక్ఖు చిత్తస్స వసేన వత్తతి. కతమేహి సత్తహి? ఇధ, భిక్ఖవే, భిక్ఖు సమాధికుసలో హోతి, సమాధిస్స సమాపత్తికుసలో హోతి, సమాధిస్స ఠితికుసలో హోతి, సమాధిస్స వుట్ఠానకుసలో హోతి, సమాధిస్స కల్యాణకుసలో హోతి, సమాధిస్స గోచరకుసలో హోతి, సమాధిస్స అభినీహారకుసలో హోతి. ఇమేహి ఖో, భిక్ఖవే, సత్తహి ధమ్మేహి సమన్నాగతో భిక్ఖు చిత్తం వసే వత్తేతి, నో చ భిక్ఖు చిత్తస్స వసేన వత్తతీ’’తి. నవమం.