౬. దుతియమిత్తసుత్తం

౩౭. ‘‘సత్తహి, భిక్ఖవే, ధమ్మేహి సమన్నాగతో భిక్ఖు మిత్తో సేవితబ్బో భజితబ్బో పయిరుపాసితబ్బో అపి పనుజ్జమానేనపి [పణుజ్జమానేనపి (సీ.)]. కతమేహి సత్తహి? పియో చ హోతి మనాపో చ గరు చ భావనీయో చ వత్తా చ వచనక్ఖమో చ గమ్భీరఞ్చ కథం కత్తా హోతి, నో చ అట్ఠానే నియోజేతి. ఇమేహి ఖో, భిక్ఖవే, సత్తహి ధమ్మేహి సమన్నాగతో భిక్ఖు మిత్తో సేవితబ్బో భజితబ్బో పయిరుపాసితబ్బో అపి పనుజ్జమానేనపీ’’తి.

‘‘పియో గరు భావనీయో, వత్తా చ వచనక్ఖమో;

గమ్భీరఞ్చ కథం కత్తా, నో చట్ఠానే నియోజకో [నియోజయే (సీ. స్యా.)].

‘‘యమ్హి ఏతాని ఠానాని, సంవిజ్జన్తీధ పుగ్గలే;

సో మిత్తో మిత్తకామేన, అత్థకామానుకమ్పతో;

అపి నాసియమానేన, భజితబ్బో తథావిధో’’తి. ఛట్ఠం;