౧౧. పరాభవసుత్తం

౩౧. ‘‘సత్తిమే, భిక్ఖవే, ఉపాసకస్స పరాభవా…పే… సత్తిమే, భిక్ఖవే, ఉపాసకస్స సమ్భవా. కతమే సత్త? భిక్ఖుదస్సనం న హాపేతి, సద్ధమ్మస్సవనం నప్పమజ్జతి, అధిసీలే సిక్ఖతి, పసాదబహులో హోతి, భిక్ఖూసు థేరేసు చేవ నవేసు చ మజ్ఝిమేసు చ అనుపారమ్భచిత్తో ధమ్మం సుణాతి న రన్ధగవేసీ, న ఇతో బహిద్ధా దక్ఖిణేయ్యం గవేసతి, ఇధ చ పుబ్బకారం కరోతి. ఇమే ఖో, భిక్ఖవే, సత్త ఉపాసకస్స సమ్భవాతి.

‘‘దస్సనం భావితత్తానం, యో హాపేతి ఉపాసకో;

సవనఞ్చ అరియధమ్మానం, అధిసీలే న సిక్ఖతి.

‘‘అప్పసాదో చ భిక్ఖూసు, భియ్యో భియ్యో పవడ్ఢతి;

ఉపారమ్భకచిత్తో చ, సద్ధమ్మం సోతుమిచ్ఛతి.

‘‘ఇతో చ బహిద్ధా అఞ్ఞం, దక్ఖిణేయ్యం గవేసతి;

తత్థేవ చ పుబ్బకారం, యో కరోతి ఉపాసకో.

‘‘ఏతే ఖో పరిహానియే, సత్త ధమ్మే సుదేసితే;

ఉపాసకో సేవమానో, సద్ధమ్మా పరిహాయతి.

‘‘దస్సనం భావితత్తానం, యో న హాపేతి ఉపాసకో;

సవనఞ్చ అరియధమ్మానం, అధిసీలే చ సిక్ఖతి.

‘‘పసాదో చస్స భిక్ఖూసు, భియ్యో భియ్యో పవడ్ఢతి;

అనుపారమ్భచిత్తో చ, సద్ధమ్మం సోతుమిచ్ఛతి.

‘‘న ఇతో బహిద్ధా అఞ్ఞం, దక్ఖిణేయ్యం గవేసతి;

ఇధేవ చ పుబ్బకారం, యో కరోతి ఉపాసకో.

‘‘ఏతే ఖో అపరిహానియే, సత్త ధమ్మే సుదేసితే;

ఉపాసకో సేవమానో, సద్ధమ్మా న పరిహాయతీ’’తి. ఏకాదసమం;

వజ్జిసత్తకవగ్గో [వజ్జివగ్గో (స్యా.)] తతియో.