౨. దుతియఅనుసయసుత్తం

౧౨. ‘‘సత్తన్నం, భిక్ఖవే, అనుసయానం పహానాయ సముచ్ఛేదాయ బ్రహ్మచరియం వుస్సతి. కతమేసం సత్తన్నం? కామరాగానుసయస్స పహానాయ సముచ్ఛేదాయ బ్రహ్మచరియం వుస్సతి, పటిఘానుసయస్స…పే… దిట్ఠానుసయస్స… విచికిచ్ఛానుసయస్స… మానానుసయస్స… భవరాగానుసయస్స… అవిజ్జానుసయస్స పహానాయ సముచ్ఛేదాయ బ్రహ్మచరియం వుస్సతి. ఇమేసం ఖో, భిక్ఖవే, సత్తన్నం అనుసయానం పహానాయ సముచ్ఛేదాయ బ్రహ్మచరియం వుస్సతి.

‘‘యతో చ ఖో, భిక్ఖవే, భిక్ఖునో కామరాగానుసయో పహీనో హోతి ఉచ్ఛిన్నమూలో తాలావత్థుకతో అనభావంకతో ఆయతిం అనుప్పాదధమ్మో. పటిఘానుసయో…పే… దిట్ఠానుసయో… విచికిచ్ఛానుసయో… మానానుసయో… భవరాగానుసయో… అవిజ్జానుసయో పహీనో హోతి ఉచ్ఛిన్నమూలో తాలావత్థుకతో అనభావంకతో ఆయతిం అనుప్పాదధమ్మో. అయం వుచ్చతి, భిక్ఖవే, భిక్ఖు అచ్ఛేచ్ఛి తణ్హం, వివత్తయి సంయోజనం, సమ్మా మానాభిసమయా అన్తమకాసి దుక్ఖస్సా’’తి. దుతియం.