౫. సంఖిత్తధనసుత్తం

౫. ‘‘సత్తిమాని, భిక్ఖవే, ధనాని. కతమాని సత్త? సద్ధాధనం, సీలధనం, హిరీధనం, ఓత్తప్పధనం, సుతధనం, చాగధనం, పఞ్ఞాధనం. ఇమాని ఖో, భిక్ఖవే, సత్త ధనానీతి.

‘‘సద్ధాధనం సీలధనం, హిరీ ఓత్తప్పియం ధనం;

సుతధనఞ్చ చాగో చ, పఞ్ఞా వే సత్తమం ధనం.

‘‘యస్స ఏతే ధనా అత్థి, ఇత్థియా పురిసస్స వా;

అదలిద్దోతి తం ఆహు, అమోఘం తస్స జీవితం.

‘‘తస్మా సద్ధఞ్చ సీలఞ్చ, పసాదం ధమ్మదస్సనం;

అనుయుఞ్జేథ మేధావీ, సరం [వరం (క.)] బుద్ధాన సాసన’’న్తి. పఞ్చమం;