౬. మహన్తత్తసుత్తం

౮౦. ‘‘ఛహి, భిక్ఖవే, ధమ్మేహి సమన్నాగతో భిక్ఖు నచిరస్సేవ మహన్తత్తం [మహత్తం (స్యా. కం.)] వేపుల్లత్తం పాపుణాతి ధమ్మేసు. కతమేహి ఛహి? ఇధ, భిక్ఖవే, భిక్ఖు ఆలోకబహులో చ హోతి యోగబహులో చ వేదబహులో చ అసన్తుట్ఠిబహులో చ అనిక్ఖిత్తధురో చ కుసలేసు ధమ్మేసు ఉత్తరి చ పతారేతి [పకరోతి (క.)]. ఇమేహి ఖో, భిక్ఖవే, ఛహి ధమ్మేహి సమన్నాగతో భిక్ఖు నచిరస్సేవ మహన్తత్తం వేపుల్లత్తం పాపుణాతి ధమ్మేసూ’’తి. ఛట్ఠం.