౪. సుఖసోమనస్ససుత్తం

౭౮. ‘‘ఛహి, భిక్ఖవే, ధమ్మేహి సమన్నాగతో భిక్ఖు దిట్ఠేవ ధమ్మే సుఖసోమనస్సబహులో విహరతి, యోని చస్స ఆరద్ధా హోతి ఆసవానం ఖయాయ. కతమేహి ఛహి? ఇధ, భిక్ఖవే, భిక్ఖు ధమ్మారామో హోతి, భావనారామో హోతి, పహానారామో హోతి, పవివేకారామో హోతి, అబ్యాపజ్ఝారామో హోతి, నిప్పపఞ్చారామో హోతి. ఇమేహి ఖో, భిక్ఖవే, ఛహి ధమ్మేహి సమన్నాగతో భిక్ఖు దిట్ఠేవ ధమ్మే సుఖసోమనస్సబహులో విహరతి, యోని చస్స ఆరద్ధా హోతి ఆసవానం ఖయాయా’’తి. చతుత్థం.