౫. దుతియదుచ్చరితసుత్తం

౨౪౫. ‘‘పఞ్చిమే, భిక్ఖవే, ఆదీనవా దుచ్చరితే. కతమే పఞ్చ? అత్తాపి అత్తానం ఉపవదతి; అనువిచ్చ విఞ్ఞూ గరహన్తి; పాపకో కిత్తిసద్దో అబ్భుగ్గచ్ఛతి; సద్ధమ్మా వుట్ఠాతి; అసద్ధమ్మే పతిట్ఠాతి. ఇమే ఖో, భిక్ఖవే, పఞ్చ ఆదీనవా దుచ్చరితే.

‘‘పఞ్చిమే, భిక్ఖవే, ఆనిసంసా సుచరితే. కతమే పఞ్చ? అత్తాపి అత్తానం న ఉపవదతి; అనువిచ్చ విఞ్ఞూ పసంసన్తి; కల్యాణో కిత్తిసద్దో అబ్భుగ్గచ్ఛతి; అసద్ధమ్మా వుట్ఠాతి; సద్ధమ్మే పతిట్ఠాతి. ఇమే ఖో, భిక్ఖవే, పఞ్చ ఆనిసంసా సుచరితే’’తి. పఞ్చమం.