(౨౫) ౫. దుచ్చరితవగ్గో

౧. పఠమదుచ్చరితసుత్తం

౨౪౧. ‘‘పఞ్చిమే, భిక్ఖవే, ఆదీనవా దుచ్చరితే. కతమే పఞ్చ? అత్తాపి అత్తానం ఉపవదతి; అనువిచ్చ విఞ్ఞూ గరహన్తి; పాపకో కిత్తిసద్దో అబ్భుగ్గచ్ఛతి; సమ్మూళ్హో కాలం కరోతి; కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జతి. ఇమే ఖో, భిక్ఖవే, పఞ్చ ఆదీనవా దుచ్చరితే.

‘‘పఞ్చిమే, భిక్ఖవే, ఆనిసంసా సుచరితే. కతమే పఞ్చ? అత్తాపి అత్తానం న ఉపవదతి; అనువిచ్చ విఞ్ఞూ పసంసన్తి; కల్యాణో కిత్తిసద్దో అబ్భుగ్గచ్ఛతి; అసమ్మూళ్హో కాలం కరోతి; కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ ఆనిసంసా సుచరితే’’తి. పఠమం.

౨. పఠమకాయదుచ్చరితసుత్తం

౨౪౨. ‘‘పఞ్చిమే, భిక్ఖవే, ఆదీనవా కాయదుచ్చరితే…పే… ఆనిసంసా కాయసుచరితే…పే…. దుతియం.

౩. పఠమవచీదుచ్చరితసుత్తం

౨౪౩. ‘‘పఞ్చిమే, భిక్ఖవే, ఆదీనవా వచీదుచ్చరితే…పే… ఆనిసంసా వచీసుచరితే…పే…. తతియం.

౪. పఠమమనోదుచ్చరితసుత్తం

౨౪౪. ‘‘పఞ్చిమే, భిక్ఖవే, ఆదీనవా మనోదుచ్చరితే…పే… ఆనిసంసా మనోసుచరితే. కతమే పఞ్చ? అత్తాపి అత్తానం న ఉపవదతి; అనువిచ్చ విఞ్ఞూ పసంసన్తి; కల్యాణో కిత్తిసద్దో అబ్భుగ్గచ్ఛతి; అసమ్మూళ్హో కాలం కరోతి; కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ ఆనిసంసా మనోసుచరితే’’తి. చతుత్థం.

౫. దుతియదుచ్చరితసుత్తం

౨౪౫. ‘‘పఞ్చిమే, భిక్ఖవే, ఆదీనవా దుచ్చరితే. కతమే పఞ్చ? అత్తాపి అత్తానం ఉపవదతి; అనువిచ్చ విఞ్ఞూ గరహన్తి; పాపకో కిత్తిసద్దో అబ్భుగ్గచ్ఛతి; సద్ధమ్మా వుట్ఠాతి; అసద్ధమ్మే పతిట్ఠాతి. ఇమే ఖో, భిక్ఖవే, పఞ్చ ఆదీనవా దుచ్చరితే.

‘‘పఞ్చిమే, భిక్ఖవే, ఆనిసంసా సుచరితే. కతమే పఞ్చ? అత్తాపి అత్తానం న ఉపవదతి; అనువిచ్చ విఞ్ఞూ పసంసన్తి; కల్యాణో కిత్తిసద్దో అబ్భుగ్గచ్ఛతి; అసద్ధమ్మా వుట్ఠాతి; సద్ధమ్మే పతిట్ఠాతి. ఇమే ఖో, భిక్ఖవే, పఞ్చ ఆనిసంసా సుచరితే’’తి. పఞ్చమం.

౬. దుతియకాయదుచ్చరితసుత్తం

౨౪౬. ‘‘పఞ్చిమే, భిక్ఖవే, ఆదీనవా కాయదుచ్చరితే…పే… ఆనిసంసా కాయసుచరితే…పే…. ఛట్ఠం.

౭. దుతియవచీదుచ్చరితసుత్తం

౨౪౭. ‘‘పఞ్చిమే, భిక్ఖవే, ఆదీనవా వచీదుచ్చరితే…పే… ఆనిసంసా వచీసుచరితే…పే…. సత్తమం.

౮. దుతియమనోదుచ్చరితసుత్తం

౨౪౮. ‘‘పఞ్చిమే, భిక్ఖవే, ఆదీనవా మనోదుచ్చరితే…పే… ఆనిసంసా మనోసుచరితే. కతమే పఞ్చ? అత్తాపి అత్తానం న ఉపవదతి; అనువిచ్చ విఞ్ఞూ పసంసన్తి; కల్యాణో కిత్తిసద్దో అబ్భుగ్గచ్ఛతి; అసద్ధమ్మా వుట్ఠాతి; సద్ధమ్మే పతిట్ఠాతి. ఇమే ఖో, భిక్ఖవే, పఞ్చ ఆనిసంసా మనోసుచరితే’’తి. అట్ఠమం.

౯. సివథికసుత్తం

౨౪౯. ‘‘పఞ్చిమే, భిక్ఖవే, ఆదీనవా సివథికాయ [సీవథికాయ (సీ. స్యా. కం. పీ.)]. కతమే పఞ్చ? అసుచి, దుగ్గన్ధా, సప్పటిభయా, వాళానం అమనుస్సానం ఆవాసో, బహునో జనస్స ఆరోదనా – ఇమే ఖో, భిక్ఖవే, పఞ్చ ఆదీనవా సివథికాయ.

‘‘ఏవమేవం ఖో, భిక్ఖవే, పఞ్చిమే ఆదీనవా సివథికూపమే పుగ్గలే. కతమే పఞ్చ? ఇధ, భిక్ఖవే, ఏకచ్చో పుగ్గలో అసుచినా కాయకమ్మేన సమన్నాగతో హోతి; అసుచినా వచీకమ్మేన సమన్నాగతో హోతి; అసుచినా మనోకమ్మేన సమన్నాగతో హోతి. ఇదమస్స అసుచితాయ వదామి. సేయ్యథాపి సా, భిక్ఖవే, సివథికా అసుచి; తథూపమాహం, భిక్ఖవే, ఇమం పుగ్గలం వదామి.

‘‘తస్స అసుచినా కాయకమ్మేన సమన్నాగతస్స, అసుచినా వచీకమ్మేన సమన్నాగతస్స, అసుచినా మనోకమ్మేన సమన్నాగతస్స పాపకో కిత్తిసద్దో అబ్భుగ్గచ్ఛతి. ఇదమస్స దుగ్గన్ధతాయ వదామి. సేయ్యథాపి సా, భిక్ఖవే, సివథికా దుగ్గన్ధా; తథూపమాహం, భిక్ఖవే, ఇమం పుగ్గలం వదామి.

‘‘తమేనం అసుచినా కాయకమ్మేన సమన్నాగతం, అసుచినా వచీకమ్మేన సమన్నాగతం, అసుచినా మనోకమ్మేన సమన్నాగతం పేసలా సబ్రహ్మచారీ ఆరకా పరివజ్జన్తి. ఇదమస్స సప్పటిభయస్మిం వదామి. సేయ్యథాపి సా, భిక్ఖవే, సివథికా సప్పటిభయా; తథూపమాహం, భిక్ఖవే, ఇమం పుగ్గలం వదామి.

‘‘సో అసుచినా కాయకమ్మేన సమన్నాగతో, అసుచినా వచీకమ్మేన సమన్నాగతో, అసుచినా మనోకమ్మేన సమన్నాగతో సభాగేహి పుగ్గలేహి సద్ధిం సంవసతి. ఇదమస్స వాళావాసస్మిం వదామి. సేయ్యథాపి సా, భిక్ఖవే, సివథికా వాళానం అమనుస్సానం ఆవాసో; తథూపమాహం, భిక్ఖవే, ఇమం పుగ్గలం వదామి.

‘‘తమేనం అసుచినా కాయకమ్మేన సమన్నాగతం, అసుచినా వచీకమ్మేన సమన్నాగతం, అసుచినా మనోకమ్మేన సమన్నాగతం పేసలా సబ్రహ్మచారీ దిస్వా ఖీయధమ్మం [ఖీయనధమ్మం (సీ.)] ఆపజ్జన్తి – ‘అహో వత నో దుక్ఖం యే మయం ఏవరూపేహి పుగ్గలేహి సద్ధిం సంవసామా’తి! ఇదమస్స ఆరోదనాయ వదామి. సేయ్యథాపి సా, భిక్ఖవే, సివథికా బహునో జనస్స ఆరోదనా; తథూపమాహం, భిక్ఖవే, ఇమం పుగ్గలం వదామి. ఇమే ఖో, భిక్ఖవే, పఞ్చ ఆదీనవా సివథికూపమే పుగ్గలే’’తి. నవమం.

౧౦. పుగ్గలప్పసాదసుత్తం

౨౫౦. ‘‘పఞ్చిమే, భిక్ఖవే, ఆదీనవా పుగ్గలప్పసాదే. కతమే పఞ్చ? యస్మిం, భిక్ఖవే, పుగ్గలే పుగ్గలో అభిప్పసన్నో హోతి, సో తథారూపం ఆపత్తిం ఆపన్నో హోతి యథారూపాయ ఆపత్తియా సఙ్ఘో ఉక్ఖిపతి. తస్స ఏవం హోతి – ‘యో ఖో మ్యాయం పుగ్గలో పియో మనాపో సో సఙ్ఘేన ఉక్ఖిత్తో’తి. భిక్ఖూసు అప్పసాదబహులో హోతి. భిక్ఖూసు అప్పసాదబహులో సమానో అఞ్ఞే భిక్ఖూ న భజతి. అఞ్ఞే భిక్ఖూ అభజన్తో సద్ధమ్మం న సుణాతి. సద్ధమ్మం అసుణన్తో సద్ధమ్మా పరిహాయతి. అయం, భిక్ఖవే, పఠమో ఆదీనవో పుగ్గలప్పసాదే.

‘‘పున చపరం, భిక్ఖవే, యస్మిం పుగ్గలే పుగ్గలో అభిప్పసన్నో హోతి, సో తథారూపం ఆపత్తిం ఆపన్నో హోతి యథారూపాయ ఆపత్తియా సఙ్ఘో అన్తే నిసీదాపేతి. తస్స ఏవం హోతి – ‘యో ఖో మ్యాయం పుగ్గలో పియో మనాపో సో సఙ్ఘేన అన్తే నిసీదాపితో’తి. భిక్ఖూసు అప్పసాదబహులో హోతి. భిక్ఖూసు అప్పసాదబహులో సమానో అఞ్ఞే భిక్ఖూ న భజతి. అఞ్ఞే భిక్ఖూ అభజన్తో సద్ధమ్మం న సుణాతి. సద్ధమ్మం అసుణన్తో సద్ధమ్మా పరిహాయతి. అయం, భిక్ఖవే, దుతియో ఆదీనవో పుగ్గలప్పసాదే.

‘‘పున చపరం, భిక్ఖవే, యస్మిం పుగ్గలే పుగ్గలో అభిప్పసన్నో హోతి, సో దిసాపక్కన్తో హోతి…పే… సో విబ్భన్తో హోతి…పే… సో కాలఙ్కతో హోతి. తస్స ఏవం హోతి – ‘యో ఖో మ్యాయం పుగ్గలో పియో మనాపో సో కాలఙ్కతో’తి. అఞ్ఞే భిక్ఖూ న భజతి. అఞ్ఞే భిక్ఖూ అభజన్తో సద్ధమ్మం న సుణాతి. సద్ధమ్మం అసుణన్తో సద్ధమ్మా పరిహాయతి. అయం, భిక్ఖవే, పఞ్చమో ఆదీనవో పుగ్గలప్పసాదే. ఇమే ఖో, భిక్ఖవే, పఞ్చ ఆదీనవా పుగ్గలప్పసాదే’’తి. దసమం.

దుచ్చరితవగ్గో పఞ్చమో.