౪. బహూపకారసుత్తం

౨౩౪. ‘‘పఞ్చహి, భిక్ఖవే, ధమ్మేహి సమన్నాగతో ఆవాసికో భిక్ఖు ఆవాసస్స బహూపకారో హోతి. కతమేహి పఞ్చహి? సీలవా హోతి…పే… సమాదాయ సిక్ఖతి సిక్ఖాపదేసు; బహుస్సుతో హోతి…పే… దిట్ఠియా సుప్పటివిద్ధా; ఖణ్డఫుల్లం పటిసఙ్ఖరోతి; మహా ఖో పన భిక్ఖుసఙ్ఘో అభిక్కన్తో నానావేరజ్జకా భిక్ఖూ గిహీనం ఉపసఙ్కమిత్వా ఆరోచేతి – ‘మహా ఖో, ఆవుసో, భిక్ఖుసఙ్ఘో అభిక్కన్తో నానావేరజ్జకా భిక్ఖూ, కరోథ పుఞ్ఞాని, సమయో పుఞ్ఞాని కాతు’న్తి; చతున్నం ఝానానం ఆభిచేతసికానం దిట్ఠధమ్మసుఖవిహారానం నికామలాభీ హోతి అకిచ్ఛలాభీ అకసిరలాభీ. ఇమేహి ఖో, భిక్ఖవే, పఞ్చహి ధమ్మేహి సమన్నాగతో ఆవాసికో భిక్ఖు ఆవాసస్స బహూపకారో హోతీ’’తి. చతుత్థం.