౫. అనుకమ్పసుత్తం

౨౩౫. ‘‘పఞ్చహి, భిక్ఖవే, ధమ్మేహి సమన్నాగతో ఆవాసికో భిక్ఖు గిహీనం [గిహిం (స్యా.), గిహీ (కత్థచి)] అనుకమ్పతి. కతమేహి పఞ్చహి? అధిసీలే [అధిసీలేసు (స్యా.)] సమాదపేతి; ధమ్మదస్సనే నివేసేతి; గిలానకే ఉపసఙ్కమిత్వా సతిం ఉప్పాదేతి – ‘అరహగ్గతం ఆయస్మన్తో సతిం ఉపట్ఠాపేథా’తి; మహా ఖో పన భిక్ఖుసఙ్ఘో అభిక్కన్తో నానావేరజ్జకా భిక్ఖూ గిహీనం ఉపసఙ్కమిత్వా ఆరోచేతి – ‘మహా ఖో, ఆవుసో, భిక్ఖుసఙ్ఘో అభిక్కన్తో నానావేరజ్జకా భిక్ఖూ, కరోథ పుఞ్ఞాని, సమయో పుఞ్ఞాని కాతు’న్తి; యం ఖో పనస్స భోజనం దేన్తి లూఖం వా పణీతం వా తం అత్తనా పరిభుఞ్జతి, సద్ధాదేయ్యం న వినిపాతేతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో ఆవాసికో భిక్ఖు గిహీనం అనుకమ్పతీ’’తి. పఞ్చమం.