౩. అతినివాససుత్తం

౨౨౩. ‘‘పఞ్చిమే, భిక్ఖవే, ఆదీనవా అతినివాసే. కతమే పఞ్చ? బహుభణ్డో హోతి బహుభణ్డసన్నిచయో, బహుభేసజ్జో హోతి బహుభేసజ్జసన్నిచయో, బహుకిచ్చో హోతి బహుకరణీయో బ్యత్తో కింకరణీయేసు, సంసట్ఠో విహరతి గహట్ఠపబ్బజితేహి అననులోమికేన గిహిసంసగ్గేన, తమ్హా చ ఆవాసా పక్కమన్తో సాపేక్ఖో పక్కమతి. ఇమే ఖో, భిక్ఖవే, పఞ్చ ఆదీనవా అతినివాసే.

‘‘పఞ్చిమే, భిక్ఖవే, ఆనిసంసా సమవత్థవాసే. కతమే పఞ్చ? న బహుభణ్డో హోతి న బహుభణ్డసన్నిచయో, న బహుభేసజ్జో హోతి న బహుభేసజ్జసన్నిచయో, న బహుకిచ్చో హోతి న బహుకరణీయో న బ్యత్తో కింకరణీయేసు, అసంసట్ఠో విహరతి గహట్ఠపబ్బజితేహి అననులోమికేన గిహిసంసగ్గేన, తమ్హా చ ఆవాసా పక్కమన్తో అనపేక్ఖో పక్కమతి. ఇమే ఖో, భిక్ఖవే, పఞ్చ ఆనిసంసా సమవత్థవాసే’’తి. తతియం.