౫. పఞ్హపుచ్ఛాసుత్తం

౧౬౫. తత్ర ఖో ఆయస్మా సారిపుత్తో భిక్ఖూ ఆమన్తేసి…పే… ‘‘యో హి కోచి, ఆవుసో, పరం పఞ్హం పుచ్ఛతి, సబ్బో సో పఞ్చహి ఠానేహి, ఏతేసం వా అఞ్ఞతరేన. కతమేహి పఞ్చహి? మన్దత్తా మోమూహత్తా [మోముహత్తా (సీ.)] పరం పఞ్హం పుచ్ఛతి, పాపిచ్ఛో ఇచ్ఛాపకతో పరం పఞ్హం పుచ్ఛతి, పరిభవం పరం పఞ్హం పుచ్ఛతి, అఞ్ఞాతుకామో పరం పఞ్హం పుచ్ఛతి, అథ వా పనేవంచిత్తో [అథ వా పకుప్పన్తో (సీ. పీ.)] పరం పఞ్హం పుచ్ఛతి – ‘సచే మే పఞ్హం పుట్ఠో సమ్మదేవ బ్యాకరిస్సతి ఇచ్చేతం కుసలం, నో చే [నో చ (స్యా.)] మే పఞ్హం పుట్ఠో సమ్మదేవ బ్యాకరిస్సతి అహమస్స సమ్మదేవ బ్యాకరిస్సామీ’తి. యో హి కోచి, ఆవుసో, పరం పఞ్హం పుచ్ఛతి, సబ్బో సో ఇమేహి పఞ్చహి ఠానేహి, ఏతేసం వా అఞ్ఞతరేన. అహం ఖో పనావుసో, ఏవంచిత్తో పరం పఞ్హం పుచ్ఛామి – ‘సచే మే పఞ్హం పుట్ఠో సమ్మదేవ బ్యాకరిస్సతి ఇచ్చేతం కుసలం, నో చే మే పఞ్హం పుట్ఠో సమ్మదేవ బ్యాకరిస్సతి, అహమస్స సమ్మదేవ బ్యాకరిస్సామీ’’తి. పఞ్చమం.