౭. అప్పంసుపతిసుత్తం

౧౩౭. ‘‘పఞ్చిమే, భిక్ఖవే, అప్పం రత్తియా సుపన్తి, బహుం జగ్గన్తి. కతమే పఞ్చ? ఇత్థీ, భిక్ఖవే, పురిసాధిప్పాయా అప్పం రత్తియా సుపతి, బహుం జగ్గతి. పురిసో, భిక్ఖవే, ఇత్థాధిప్పాయో అప్పం రత్తియా సుపతి, బహుం జగ్గతి. చోరో, భిక్ఖవే, ఆదానాధిప్పాయో అప్పం రత్తియా సుపతి, బహుం జగ్గతి. రాజా [రాజయుత్తో (పీ. క.)], భిక్ఖవే, రాజకరణీయేసు యుత్తో అప్పం రత్తియా సుపతి, బహుం జగ్గతి. భిక్ఖు, భిక్ఖవే, విసంయోగాధిప్పాయో అప్పం రత్తియా సుపతి, బహుం జగ్గతి. ఇమే ఖో, భిక్ఖవే, పఞ్చ అప్పం రత్తియా సుపన్తి, బహుం జగ్గన్తీ’’తి. సత్తమం.