౩. పఠమఉపట్ఠాకసుత్తం

౧౨౩. ‘‘పఞ్చహి, భిక్ఖవే, ధమ్మేహి సమన్నాగతో గిలానో దూపట్ఠాకో [దుపట్ఠాకో (స్యా. కం. పీ. క.) మహావ. ౩౬౬] హోతి. కతమేహి పఞ్చహి? అసప్పాయకారీ హోతి, సప్పాయే మత్తం న జానాతి, భేసజ్జం నప్పటిసేవితా హోతి, అత్థకామస్స గిలానుపట్ఠాకస్స న యథాభూతం ఆబాధం ఆవికత్తా హోతి అభిక్కమన్తం వా అభిక్కమతీతి పటిక్కమన్తం వా పటిక్కమతీతి ఠితం వా ఠితోతి, ఉప్పన్నానం సారీరికానం వేదనానం దుక్ఖానం తిబ్బానం [తిప్పానం (సీ.) మహావ. ౩౬౬] ఖరానం కటుకానం అసాతానం అమనాపానం పాణహరానం అనధివాసకజాతికో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో గిలానో దూపట్ఠాకో హోతి.

‘‘పఞ్చహి, భిక్ఖవే, ధమ్మేహి సమన్నాగతో గిలానో సూపట్ఠాకో హోతి. కతమేహి పఞ్చహి? సప్పాయకారీ హోతి, సప్పాయే మత్తం జానాతి, భేసజ్జం పటిసేవితా హోతి, అత్థకామస్స గిలానుపట్ఠాకస్స యథాభూతం ఆబాధం ఆవికత్తా హోతి అభిక్కమన్తం వా అభిక్కమతీతి పటిక్కమన్తం వా పటిక్కమతీతి ఠితం వా ఠితోతి, ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అధివాసకజాతికో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో గిలానో సూపట్ఠాకో హోతీ’’తి. తతియం.