౯. తతియఅనాగతభయసుత్తం

౭౯. ‘‘పఞ్చిమాని, భిక్ఖవే, అనాగతభయాని ఏతరహి అసముప్పన్నాని ఆయతిం సముప్పజ్జిస్సన్తి. తాని వో [ఖో (కత్థచి)] పటిబుజ్ఝితబ్బాని; పటిబుజ్ఝిత్వా చ తేసం పహానాయ వాయమితబ్బం.

‘‘కతమాని పఞ్చ? భవిస్సన్తి, భిక్ఖవే, భిక్ఖూ అనాగతమద్ధానం అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా అఞ్ఞే ఉపసమ్పాదేస్సన్తి. తేపి [తే (సీ.)] న సక్ఖిస్సన్తి వినేతుం అధిసీలే అధిచిత్తే అధిపఞ్ఞాయ. తేపి భవిస్సన్తి అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా అఞ్ఞే ఉపసమ్పాదేస్సన్తి. తేపి [తే (?)] న సక్ఖిస్సన్తి వినేతుం అధిసీలే అధిచిత్తే అధిపఞ్ఞాయ. తేపి భవిస్సన్తి అభావితకాయా అభావితసీలా అభావితచిత్తా అభావితపఞ్ఞా. ఇతి ఖో, భిక్ఖవే, ధమ్మసన్దోసా వినయసన్దోసో; వినయసన్దోసా ధమ్మసన్దోసో. ఇదం, భిక్ఖవే, పఠమం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా అఞ్ఞేసం నిస్సయం దస్సన్తి. తేపి న సక్ఖిస్సన్తి వినేతుం అధిసీలే అధిచిత్తే అధిపఞ్ఞాయ. తేపి భవిస్సన్తి అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా అఞ్ఞేసం నిస్సయం దస్సన్తి. తేపి న సక్ఖిస్సన్తి వినేతుం అధిసీలే అధిచిత్తే అధిపఞ్ఞాయ. తేపి భవిస్సన్తి అభావితకాయా అభావితసీలా అభావితచిత్తా అభావితపఞ్ఞా. ఇతి ఖో, భిక్ఖవే, ధమ్మసన్దోసా వినయసన్దోసో; వినయసన్దోసా ధమ్మసన్దోసో. ఇదం, భిక్ఖవే, దుతియం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా అభిధమ్మకథం వేదల్లకథం కథేన్తా కణ్హధమ్మం ఓక్కమమానా న బుజ్ఝిస్సన్తి. ఇతి ఖో, భిక్ఖవే, ధమ్మసన్దోసా వినయసన్దోసో; వినయసన్దోసా ధమ్మసన్దోసో. ఇదం, భిక్ఖవే, తతియం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా యే తే సుత్తన్తా తథాగతభాసితా గమ్భీరా గమ్భీరత్థా లోకుత్తరా సుఞ్ఞతాప్పటిసంయుత్తా, తేసు భఞ్ఞమానేసు న సుస్సూసిస్సన్తి, న సోతం ఓదహిస్సన్తి, న అఞ్ఞా చిత్తం ఉపట్ఠపేస్సన్తి, న చ తే ధమ్మే ఉగ్గహేతబ్బం పరియాపుణితబ్బం మఞ్ఞిస్సన్తి. యే పన తే సుత్తన్తా కవితా [కవికతా (సీ. స్యా. కం. పీ., సం. ని. ౨.౨౨౯) టీకా ఓలోకేతబ్బా] కావేయ్యా చిత్తక్ఖరా చిత్తబ్యఞ్జనా బాహిరకా సావకభాసితా, తేసు భఞ్ఞమానేసు సుస్సూసిస్సన్తి, సోతం ఓదహిస్సన్తి, అఞ్ఞా చిత్తం ఉపట్ఠపేస్సన్తి, తే చ ధమ్మే ఉగ్గహేతబ్బం పరియాపుణితబ్బం మఞ్ఞిస్సన్తి. ఇతి ఖో, భిక్ఖవే, ధమ్మసన్దోసా వినయసన్దోసో; వినయసన్దోసా ధమ్మసన్దోసో. ఇదం, భిక్ఖవే, చతుత్థం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం అభావితకాయా అభావితసీలా అభావితచిత్తా అభావితపఞ్ఞా. తే అభావితకాయా సమానా అభావితసీలా అభావితచిత్తా అభావితపఞ్ఞా థేరా భిక్ఖూ బాహులికా [బాహుల్లికా (స్యా. కం.) అ. ని. ౨.౪౯; ౩.౯౬] భవిస్సన్తి సాథలికా ఓక్కమనే పుబ్బఙ్గమా పవివేకే నిక్ఖిత్తధురా, న వీరియం ఆరభిస్సన్తి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. తేసం పచ్ఛిమా జనతా దిట్ఠానుగతిం ఆపజ్జిస్సతి. సాపి భవిస్సతి బాహులికా సాథలికా ఓక్కమనే పుబ్బఙ్గమా పవివేకే నిక్ఖిత్తధురా, న వీరియం ఆరభిస్సతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇతి ఖో, భిక్ఖవే, ధమ్మసన్దోసా వినయసన్దోసో; వినయసన్దోసా ధమ్మసన్దోసో. ఇదం, భిక్ఖవే, పఞ్చమం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం. ‘‘ఇమాని ఖో, భిక్ఖవే, పఞ్చ అనాగతభయాని ఏతరహి అసముప్పన్నాని ఆయతిం సముప్పజ్జిస్సన్తి. తాని వో పటిబుజ్ఝితబ్బాని; పటిబుజ్ఝిత్వా చ తేసం పహానాయ వాయమితబ్బ’’న్తి. నవమం.