౧౦. చతుత్థఅనాగతభయసుత్తం

౮౦. ‘‘పఞ్చిమాని, భిక్ఖవే, అనాగతభయాని ఏతరహి అసముప్పన్నాని ఆయతిం సముప్పజ్జిస్సన్తి. తాని వో పటిబుజ్ఝితబ్బాని; పటిబుజ్ఝిత్వా చ తేసం పహానాయ వాయమితబ్బం.

‘‘కతమాని పఞ్చ? భవిస్సన్తి, భిక్ఖవే, భిక్ఖూ అనాగతమద్ధానం చీవరే కల్యాణకామా. తే చీవరే కల్యాణకామా సమానా రిఞ్చిస్సన్తి పంసుకూలికత్తం, రిఞ్చిస్సన్తి అరఞ్ఞవనపత్థాని పన్తాని సేనాసనాని; గామనిగమరాజధానీసు ఓసరిత్వా వాసం కప్పేస్సన్తి, చీవరహేతు చ అనేకవిహితం అనేసనం అప్పతిరూపం ఆపజ్జిస్సన్తి. ఇదం, భిక్ఖవే, పఠమం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం పిణ్డపాతే కల్యాణకామా. తే పిణ్డపాతే కల్యాణకామా సమానా రిఞ్చిస్సన్తి పిణ్డపాతికత్తం, రిఞ్చిస్సన్తి అరఞ్ఞవనపత్థాని పన్తాని సేనాసనాని; గామనిగమరాజధానీసు ఓసరిత్వా వాసం కప్పేస్సన్తి జివ్హగ్గేన రసగ్గాని పరియేసమానా, పిణ్డపాతహేతు చ అనేకవిహితం అనేసనం అప్పతిరూపం ఆపజ్జిస్సన్తి. ఇదం, భిక్ఖవే, దుతియం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం సేనాసనే కల్యాణకామా. తే సేనాసనే కల్యాణకామా సమానా రిఞ్చిస్సన్తి రుక్ఖమూలికత్తం [ఆరఞ్ఞకత్తం (స్యా. కం.)], రిఞ్చిస్సన్తి అరఞ్ఞవనపత్థాని పన్తాని సేనాసనాని; గామనిగమరాజధానీసు ఓసరిత్వా వాసం కప్పేస్సన్తి, సేనాసనహేతు చ అనేకవిహితం అనేసనం అప్పతిరూపం ఆపజ్జిస్సన్తి. ఇదం, భిక్ఖవే, తతియం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం భిక్ఖునీసిక్ఖమానాసమణుద్దేసేహి సంసట్ఠా విహరిస్సన్తి. భిక్ఖునీసిక్ఖమానాసమణుద్దేసేహి సంసగ్గే ఖో పన, భిక్ఖవే, సతి ఏతం పాటికఙ్ఖం – ‘అనభిరతా వా బ్రహ్మచరియం చరిస్సన్తి, అఞ్ఞతరం వా సంకిలిట్ఠం ఆపత్తిం ఆపజ్జిస్సన్తి, సిక్ఖం వా పచ్చక్ఖాయ హీనాయావత్తిస్సన్తి’. ఇదం, భిక్ఖవే, చతుత్థం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘పున చపరం, భిక్ఖవే, భవిస్సన్తి భిక్ఖూ అనాగతమద్ధానం ఆరామికసమణుద్దేసేహి సంసట్ఠా విహరిస్సన్తి. ఆరామికసమణుద్దేసేహి సంసగ్గే ఖో పన, భిక్ఖవే, సతి ఏతం పాటికఙ్ఖం – ‘అనేకవిహితం సన్నిధికారపరిభోగం అనుయుత్తా విహరిస్సన్తి, ఓళారికమ్పి నిమిత్తం కరిస్సన్తి, పథవియాపి హరితగ్గేపి’. ఇదం, భిక్ఖవే, పఞ్చమం అనాగతభయం ఏతరహి అసముప్పన్నం ఆయతిం సముప్పజ్జిస్సతి. తం వో పటిబుజ్ఝితబ్బం; పటిబుజ్ఝిత్వా చ తస్స పహానాయ వాయమితబ్బం.

‘‘ఇమాని ఖో, భిక్ఖవే, పఞ్చ అనాగతభయాని ఏతరహి అసముప్పన్నాని ఆయతిం సముప్పజ్జిస్సన్తి. తాని వో పటిబుజ్ఝితబ్బాని; పటిబుజ్ఝిత్వా చ తేసం పహానాయ వాయమితబ్బ’’న్తి. దసమం.

యోధాజీవవగ్గో తతియో.