౮. దుతియఅనాగతభయసుత్తం

౭౮. ‘‘పఞ్చిమాని, భిక్ఖవే, అనాగతభయాని సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. కతమాని పఞ్చ? ఇధ, భిక్ఖవే, భిక్ఖు ఇతి పటిసఞ్చిక్ఖతి – ‘అహం ఖో ఏతరహి దహరో యువా సుసుకాళకేసో భద్రేన యోబ్బనేన సమన్నాగతో పఠమేన వయసా. హోతి ఖో పన సో సమయో యం ఇమం కాయం జరా ఫుసతి. జిణ్ణేన ఖో పన జరాయ అభిభూతేన న సుకరం బుద్ధానం సాసనం మనసి కాతుం, న సుకరాని అరఞ్ఞవనపత్థాని పన్తాని సేనాసనాని పటిసేవితుం. పురా మం సో ధమ్మో ఆగచ్ఛతి అనిట్ఠో అకన్తో అమనాపో; హన్దాహం పటికచ్చేవ [పటిగచ్చేవ (సీ.)] వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, యేనాహం ధమ్మేన సమన్నాగతో జిణ్ణకోపి ఫాసుం [ఫాసు (పీ. క.)] విహరిస్సామీ’తి. ఇదం, భిక్ఖవే, పఠమం అనాగతభయం సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ.

‘‘పున చపరం, భిక్ఖవే, భిక్ఖు ఇతి పటిసఞ్చిక్ఖతి – ‘అహం ఖో ఏతరహి అప్పాబాధో అప్పాతఙ్కో సమవేపాకినియా గహణియా సమన్నాగతో నాతిసీతాయ నాచ్చుణ్హాయ మజ్ఝిమాయ పధానక్ఖమాయ. హోతి ఖో పన సో సమయో యం ఇమం కాయం బ్యాధి ఫుసతి. బ్యాధితేన ఖో పన బ్యాధినా అభిభూతేన [బ్యాధాభిభూతేన (సీ. పీ. క.)] న సుకరం బుద్ధానం సాసనం మనసి కాతుం, న సుకరాని అరఞ్ఞవనపత్థాని పన్తాని సేనాసనాని పటిసేవితుం. పురా మం సో ధమ్మో ఆగచ్ఛతి అనిట్ఠో అకన్తో అమనాపో; హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, యేనాహం ధమ్మేన సమన్నాగతో బ్యాధితోపి ఫాసుం విహరిస్సామీ’తి. ఇదం, భిక్ఖవే, దుతియం అనాగతభయం సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ.

‘‘పున చపరం, భిక్ఖవే, భిక్ఖు ఇతి పటిసఞ్చిక్ఖతి – ‘ఏతరహి ఖో సుభిక్ఖం సుసస్సం సులభపిణ్డం, సుకరం ఉఞ్ఛేన పగ్గహేన యాపేతుం. హోతి ఖో పన సో సమయో యం దుబ్భిక్ఖం హోతి దుస్సస్సం దుల్లభపిణ్డం, న సుకరం ఉఞ్ఛేన పగ్గహేన యాపేతుం. దుబ్భిక్ఖే ఖో పన మనుస్సా యేన సుభిక్ఖం తేన సఙ్కమన్తి [తేనుపసఙ్కమన్తి (క.)]. తత్థ సఙ్గణికవిహారో హోతి ఆకిణ్ణవిహారో. సఙ్గణికవిహారే ఖో పన సతి ఆకిణ్ణవిహారే న సుకరం బుద్ధానం సాసనం మనసి కాతుం, న సుకరాని అరఞ్ఞవనపత్థాని పన్తాని సేనాసనాని పటిసేవితుం. పురా మం సో ధమ్మో ఆగచ్ఛతి అనిట్ఠో అకన్తో అమనాపో; హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, యేనాహం ధమ్మేన సమన్నాగతో దుబ్భిక్ఖేపి ఫాసు విహరిస్సామీ’తి. ఇదం, భిక్ఖవే, తతియం అనాగతభయం సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ.

‘‘పున చపరం, భిక్ఖవే, భిక్ఖు ఇతి పటిసఞ్చిక్ఖతి – ‘ఏతరహి ఖో మనుస్సా సమగ్గా సమ్మోదమానా అవివదమానా ఖీరోదకీభూతా అఞ్ఞమఞ్ఞం పియచక్ఖూహి సమ్పస్సన్తా విహరన్తి. హోతి ఖో పన సో సమయో యం భయం హోతి అటవిసఙ్కోపో, చక్కసమారూళ్హా జానపదా పరియాయన్తి. భయే ఖో పన సతి మనుస్సా యేన ఖేమం తేన సఙ్కమన్తి. తత్థ సఙ్గణికవిహారో హోతి ఆకిణ్ణవిహారో. సఙ్గణికవిహారే ఖో పన సతి ఆకిణ్ణవిహారే న సుకరం బుద్ధానం సాసనం మనసి కాతుం, న సుకరాని అరఞ్ఞవనపత్థాని పన్తాని సేనాసనాని పటిసేవితుం. పురా మం సో ధమ్మో ఆగచ్ఛతి అనిట్ఠో అకన్తో అమనాపో; హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, యేనాహం ధమ్మేన సమన్నాగతో భయేపి ఫాసుం విహరిస్సామీ’తి. ఇదం, భిక్ఖవే, చతుత్థం అనాగతభయం సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ.

‘‘పున చపరం, భిక్ఖవే, భిక్ఖు ఇతి పటిసఞ్చిక్ఖతి – ‘ఏతరహి ఖో సఙ్ఘో సమగ్గో సమ్మోదమానో అవివదమానో ఏకుద్దేసో ఫాసు విహరతి. హోతి ఖో పన సో సమయో యం సఙ్ఘో భిజ్జతి. సఙ్ఘే ఖో పన భిన్నే న సుకరం బుద్ధానం సాసనం మనసి కాతుం, న సుకరాని అరఞ్ఞవనపత్థాని పన్తాని సేనాసనాని పటిసేవితుం. పురా మం సో ధమ్మో ఆగచ్ఛతి అనిట్ఠో అకన్తో అమనాపో; హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, యేనాహం ధమ్మేన సమన్నాగతో భిన్నేపి సఙ్ఘే ఫాసుం విహరిస్సామీ’తి. ఇదం, భిక్ఖవే, పఞ్చమం అనాగతభయం సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ.

‘‘ఇమాని ఖో, భిక్ఖవే, పఞ్చ అనాగతభయాని సమ్పస్సమానేన అలమేవ భిక్ఖునా అప్పమత్తేన ఆతాపినా పహితత్తేన విహరితుం అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయా’’తి. అట్ఠమం.