౧. సఙ్ఘభేదకసుత్తం

౨౪౩. ఏకం సమయం భగవా కోసమ్బియం విహరతి ఘోసితారామే. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం ఆనన్దం భగవా ఏతదవోచ – ‘‘అపి ను తం, ఆనన్ద, అధికరణం వూపసన్త’’న్తి? ‘‘కుతో తం, భన్తే, అధికరణం వూపసమిస్సతి [వూపసమ్మిస్సతి (?)]! ఆయస్మతో, భన్తే, అనురుద్ధస్స బాహియో నామ సద్ధివిహారికో కేవలకప్పం సఙ్ఘభేదాయ ఠితో. తత్రాయస్మా అనురుద్ధో న ఏకవాచికమ్పి భణితబ్బం మఞ్ఞతీ’’తి.

‘‘కదా పనానన్ద, అనురుద్ధో సఙ్ఘమజ్ఝే అధికరణేసు [అధికరణేసు తేసు (క.)] వోయుఞ్జతి! నను, ఆనన్ద, యాని కానిచి అధికరణాని ఉప్పజ్జన్తి, సబ్బాని తాని తుమ్హే చేవ వూపసమేథ సారిపుత్తమోగ్గల్లానా చ.

‘‘చత్తారోమే, ఆనన్ద, అత్థవసే సమ్పస్సమానో పాపభిక్ఖు సఙ్ఘభేదేన నన్దతి. కతమే చత్తారో? ఇధానన్ద, పాపభిక్ఖు దుస్సీలో హోతి పాపధమ్మో అసుచి సఙ్కస్సరసమాచారో పటిచ్ఛన్నకమ్మన్తో అస్సమణో సమణపటిఞ్ఞో అబ్రహ్మచారీ బ్రహ్మచారిపటిఞ్ఞో అన్తోపూతి అవస్సుతో కసమ్బుజాతో. తస్స ఏవం హోతి – ‘సచే ఖో మం భిక్ఖూ జానిస్సన్తి – దుస్సీలో పాపధమ్మో అసుచి సఙ్కస్సరసమాచారో పటిచ్ఛన్నకమ్మన్తో అస్సమణో సమణపటిఞ్ఞో అబ్రహ్మచారీ బ్రహ్మచారిపటిఞ్ఞో అన్తోపూతి అవస్సుతో కసమ్బుజాతోతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, పఠమం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు మిచ్ఛాదిట్ఠికో హోతి, అన్తగ్గాహికాయ దిట్ఠియా సమన్నాగతో. తస్స ఏవం హోతి – ‘సచే ఖో మం భిక్ఖూ జానిస్సన్తి – మిచ్ఛాదిట్ఠికో అన్తగ్గాహికాయ దిట్ఠియా సమన్నాగతోతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, దుతియం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు మిచ్ఛాఆజీవో హోతి, మిచ్ఛాఆజీవేన జీవికం [జీవితం (స్యా. కం. పీ. క.)] కప్పేతి. తస్స ఏవం హోతి – ‘సచే ఖో మం భిక్ఖూ జానిస్సన్తి – మిచ్ఛాఆజీవో మిచ్ఛాఆజీవేన జీవికం కప్పేతీతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, తతియం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు లాభకామో హోతి సక్కారకామో అనవఞ్ఞత్తికామో. తస్స ఏవం హోతి – ‘సచే ఖో మం భిక్ఖూ జానిస్సన్తి – లాభకామో సక్కారకామో అనవఞ్ఞత్తికామోతి, సమగ్గా మం సన్తా న సక్కరిస్సన్తి న గరుం కరిస్సన్తి న మానేస్సన్తి న పూజేస్సన్తి; వగ్గా పన మం సక్కరిస్సన్తి గరుం కరిస్సన్తి మానేస్సన్తి పూజేస్సన్తీ’తి. ఇదం, ఆనన్ద, చతుత్థం అత్థవసం సమ్పస్సమానో పాపభిక్ఖు సఙ్ఘభేదేన నన్దతి. ఇమే ఖో, ఆనన్ద, చత్తారో అత్థవసే సమ్పస్సమానో పాపభిక్ఖు సఙ్ఘభేదేన నన్దతీ’’తి. పఠమం.