(౨౫) ౫. ఆపత్తిభయవగ్గో

౧. సఙ్ఘభేదకసుత్తం

౨౪౩. ఏకం సమయం భగవా కోసమ్బియం విహరతి ఘోసితారామే. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం ఆనన్దం భగవా ఏతదవోచ – ‘‘అపి ను తం, ఆనన్ద, అధికరణం వూపసన్త’’న్తి? ‘‘కుతో తం, భన్తే, అధికరణం వూపసమిస్సతి [వూపసమ్మిస్సతి (?)]! ఆయస్మతో, భన్తే, అనురుద్ధస్స బాహియో నామ సద్ధివిహారికో కేవలకప్పం సఙ్ఘభేదాయ ఠితో. తత్రాయస్మా అనురుద్ధో న ఏకవాచికమ్పి భణితబ్బం మఞ్ఞతీ’’తి.

‘‘కదా పనానన్ద, అనురుద్ధో సఙ్ఘమజ్ఝే అధికరణేసు [అధికరణేసు తేసు (క.)] వోయుఞ్జతి! నను, ఆనన్ద, యాని కానిచి అధికరణాని ఉప్పజ్జన్తి, సబ్బాని తాని తుమ్హే చేవ వూపసమేథ సారిపుత్తమోగ్గల్లానా చ.

‘‘చత్తారోమే, ఆనన్ద, అత్థవసే సమ్పస్సమానో పాపభిక్ఖు సఙ్ఘభేదేన నన్దతి. కతమే చత్తారో? ఇధానన్ద, పాపభిక్ఖు దుస్సీలో హోతి పాపధమ్మో అసుచి సఙ్కస్సరసమాచారో పటిచ్ఛన్నకమ్మన్తో అస్సమణో సమణపటిఞ్ఞో అబ్రహ్మచారీ బ్రహ్మచారిపటిఞ్ఞో అన్తోపూతి అవస్సుతో కసమ్బుజాతో. తస్స ఏవం హోతి – ‘సచే ఖో మం భిక్ఖూ జానిస్సన్తి – దుస్సీలో పాపధమ్మో అసుచి సఙ్కస్సరసమాచారో పటిచ్ఛన్నకమ్మన్తో అస్సమణో సమణపటిఞ్ఞో అబ్రహ్మచారీ బ్రహ్మచారిపటిఞ్ఞో అన్తోపూతి అవస్సుతో కసమ్బుజాతోతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, పఠమం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు మిచ్ఛాదిట్ఠికో హోతి, అన్తగ్గాహికాయ దిట్ఠియా సమన్నాగతో. తస్స ఏవం హోతి – ‘సచే ఖో మం భిక్ఖూ జానిస్సన్తి – మిచ్ఛాదిట్ఠికో అన్తగ్గాహికాయ దిట్ఠియా సమన్నాగతోతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, దుతియం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు మిచ్ఛాఆజీవో హోతి, మిచ్ఛాఆజీవేన జీవికం [జీవితం (స్యా. కం. పీ. క.)] కప్పేతి. తస్స ఏవం హోతి – ‘సచే ఖో మం భిక్ఖూ జానిస్సన్తి – మిచ్ఛాఆజీవో మిచ్ఛాఆజీవేన జీవికం కప్పేతీతి, సమగ్గా మం సన్తా నాసేస్సన్తి; వగ్గా పన మం న నాసేస్సన్తీ’తి. ఇదం, ఆనన్ద, తతియం అత్థవసం సమ్పస్సమానో పాపభిక్ఖు సఙ్ఘభేదేన నన్దతి.

‘‘పున చపరం, ఆనన్ద, పాపభిక్ఖు లాభకామో హోతి సక్కారకామో అనవఞ్ఞత్తికామో. తస్స ఏవం హోతి – ‘సచే ఖో మం భిక్ఖూ జానిస్సన్తి – లాభకామో సక్కారకామో అనవఞ్ఞత్తికామోతి, సమగ్గా మం సన్తా న సక్కరిస్సన్తి న గరుం కరిస్సన్తి న మానేస్సన్తి న పూజేస్సన్తి; వగ్గా పన మం సక్కరిస్సన్తి గరుం కరిస్సన్తి మానేస్సన్తి పూజేస్సన్తీ’తి. ఇదం, ఆనన్ద, చతుత్థం అత్థవసం సమ్పస్సమానో పాపభిక్ఖు సఙ్ఘభేదేన నన్దతి. ఇమే ఖో, ఆనన్ద, చత్తారో అత్థవసే సమ్పస్సమానో పాపభిక్ఖు సఙ్ఘభేదేన నన్దతీ’’తి. పఠమం.

౨. ఆపత్తిభయసుత్తం

౨౪౪. ‘‘చత్తారిమాని, భిక్ఖవే, ఆపత్తిభయాని. కతమాని చత్తారి? సేయ్యథాపి, భిక్ఖవే, చోరం ఆగుచారిం గహేత్వా రఞ్ఞో దస్సేయ్యుం – ‘అయం తే, దేవ, చోరో ఆగుచారీ. ఇమస్స దేవో దణ్డం పణేతూ’తి. తమేనం రాజా ఏవం వదేయ్య – ‘గచ్ఛథ, భో, ఇమం పురిసం దళ్హాయ రజ్జుయా పచ్ఛాబాహం గాళ్హబన్ధనం బన్ధిత్వా ఖురముణ్డం కరిత్వా ఖరస్సరేన పణవేన రథికాయ రథికం సిఙ్ఘాటకేన సిఙ్ఘాటకం పరినేత్వా దక్ఖిణేన ద్వారేన నిక్ఖామేత్వా దక్ఖిణతో నగరస్స సీసం ఛిన్దథా’తి. తమేనం రఞ్ఞో పురిసా దళ్హాయ రజ్జుయా పచ్ఛాబాహం గాళ్హబన్ధనం బన్ధిత్వా ఖురముణ్డం కరిత్వా ఖరస్సరేన పణవేన రథికాయ రథికం సిఙ్ఘాటకేన సిఙ్ఘాటకం పరినేత్వా దక్ఖిణేన ద్వారేన నిక్ఖామేత్వా దక్ఖిణతో నగరస్స సీసం ఛిన్దేయ్యుం. తత్రఞ్ఞతరస్స థలట్ఠస్స పురిసస్స ఏవమస్స – ‘పాపకం వత, భో, అయం పురిసో కమ్మం అకాసి గారయ్హం సీసచ్ఛేజ్జం. యత్ర హి నామ రఞ్ఞో పురిసా దళ్హాయ రజ్జుయా పచ్ఛాబాహం గాళ్హబన్ధనం బన్ధిత్వా ఖురముణ్డం కరిత్వా ఖరస్సరేన పణవేన రథికాయ రథికం సిఙ్ఘాటకేన సిఙ్ఘాటకం పరినేత్వా దక్ఖిణేన ద్వారేన నిక్ఖామేత్వా దక్ఖిణతో నగరస్స సీసం ఛిన్దిస్సన్తి! సో వతస్సాహం [సో వతస్సాయం (సీ.)] ఏవరూపం పాపకమ్మం [పాపం కమ్మం (సీ. పీ.)] న కరేయ్యం [న కరేయ్య (సీ.) దీ. ని. ౧.౧౮౩ పాళియా తదట్ఠకథాయ చ సంసన్దేతబ్బం] గారయ్హం సీసచ్ఛేజ్జ’న్తి. ఏవమేవం ఖో, భిక్ఖవే, యస్స కస్సచి భిక్ఖుస్స వా భిక్ఖునియా వా ఏవం తిబ్బా భయసఞ్ఞా పచ్చుపట్ఠితా హోతి పారాజికేసు ధమ్మేసు. తస్సేతం పాటికఙ్ఖం – అనాపన్నో వా పారాజికం ధమ్మం న ఆపజ్జిస్సతి, ఆపన్నో వా పారాజికం ధమ్మం యథాధమ్మం పటికరిస్సతి.

‘‘సేయ్యథాపి, భిక్ఖవే, పురిసో కాళవత్థం [కాళకం వత్థం (సీ. స్యా. కం. పీ.)] పరిధాయ కేసే పకిరిత్వా ముసలం ఖన్ధే ఆరోపేత్వా మహాజనకాయం ఉపసఙ్కమిత్వా ఏవం వదేయ్య – ‘అహం, భన్తే, పాపకమ్మం అకాసిం గారయ్హం మోసల్లం, యేన మే ఆయస్మన్తో అత్తమనా హోన్తి తం కరోమీ’తి. తత్రఞ్ఞతరస్స థలట్ఠస్స పురిసస్స ఏవమస్స – ‘పాపకం వత, భో, అయం పురిసో కమ్మం అకాసి గారయ్హం మోసల్లం. యత్ర హి నామ కాళవత్థం పరిధాయ కేసే పకిరిత్వా ముసలం ఖన్ధే ఆరోపేత్వా మహాజనకాయం ఉపసఙ్కమిత్వా ఏవం వక్ఖతి – ‘అహం, భన్తే, పాపకమ్మం అకాసిం గారయ్హం మోసల్లం, యేన మే ఆయస్మన్తో అత్తమనా హోన్తి తం కరోమీతి. సో వతస్సాహం ఏవరూపం పాపకమ్మం న కరేయ్యం గారయ్హం మోసల్ల’న్తి. ఏవమేవం ఖో, భిక్ఖవే, యస్స కస్సచి భిక్ఖుస్స వా భిక్ఖునియా వా ఏవం తిబ్బా భయసఞ్ఞా పచ్చుపట్ఠితా హోతి సఙ్ఘాదిసేసేసు ధమ్మేసు, తస్సేతం పాటికఙ్ఖం – అనాపన్నో వా సఙ్ఘాదిసేసం ధమ్మం న ఆపజ్జిస్సతి, ఆపన్నో వా సఙ్ఘాదిసేసం ధమ్మం యథాధమ్మం పటికరిస్సతి.

‘‘సేయ్యథాపి, భిక్ఖవే, పురిసో కాళవత్థం పరిధాయ కేసే పకిరిత్వా భస్మపుటం [అస్సపుటం (సీ. స్యా. కం. పీ.)] ఖన్ధే ఆరోపేత్వా మహాజనకాయం ఉపసఙ్కమిత్వా ఏవం వదేయ్య – ‘అహం, భన్తే, పాపకమ్మం అకాసిం గారయ్హం భస్మపుటం. యేన మే ఆయస్మన్తో అత్తమనా హోన్తి తం కరోమీ’తి. తత్రఞ్ఞతరస్స థలట్ఠస్స పురిసస్స ఏవమస్స – ‘పాపకం వత, భో, అయం పురిసో కమ్మం అకాసి గారయ్హం భస్మపుటం. యత్ర హి నామ కాళవత్థం పరిధాయ కేసే పకిరిత్వా భస్మపుటం ఖన్ధే ఆరోపేత్వా మహాజనకాయం ఉపసఙ్కమిత్వా ఏవం వక్ఖతి – అహం, భన్తే, పాపకమ్మం అకాసిం గారయ్హం భస్మపుటం; యేన మే ఆయస్మన్తో అత్తమనా హోన్తి తం కరోమీతి. సో వతస్సాహం ఏవరూపం పాపకమ్మం న కరేయ్యం గారయ్హం భస్మపుట’న్తి. ఏవమేవం ఖో, భిక్ఖవే, యస్స కస్సచి భిక్ఖుస్స వా భిక్ఖునియా వా ఏవం తిబ్బా భయసఞ్ఞా పచ్చుపట్ఠితా హోతి పాచిత్తియేసు ధమ్మేసు, తస్సేతం పాటికఙ్ఖం – అనాపన్నో వా పాచిత్తియం ధమ్మం న ఆపజ్జిస్సతి, ఆపన్నో వా పాచిత్తియం ధమ్మం యథాధమ్మం పటికరిస్సతి.

‘‘సేయ్యథాపి, భిక్ఖవే, పురిసో కాళవత్థం పరిధాయ కేసే పకిరిత్వా మహాజనకాయం ఉపసఙ్కమిత్వా ఏవం వదేయ్య – ‘అహం, భన్తే, పాపకమ్మం అకాసిం గారయ్హం ఉపవజ్జం. యేన మే ఆయస్మన్తో అత్తమనా హోన్తి తం కరోమీ’తి. తత్రఞ్ఞతరస్స థలట్ఠస్స పురిసస్స ఏవమస్స – ‘పాపకం వత, భో, అయం పురిసో కమ్మం అకాసి గారయ్హం ఉపవజ్జం. యత్ర హి నామ కాళవత్థం పరిధాయ కేసే పకిరిత్వా మహాజనకాయం ఉపసఙ్కమిత్వా ఏవం వక్ఖతి – అహం, భన్తే, పాపకమ్మం అకాసిం గారయ్హం ఉపవజ్జం; యేన మే ఆయస్మన్తో అత్తమనా హోన్తి తం కరోమీతి. సో వతస్సాహం ఏవరూపం పాపకమ్మం న కరేయ్యం గారయ్హం ఉపవజ్జ’న్తి. ఏవమేవం ఖో, భిక్ఖవే, యస్స కస్సచి భిక్ఖుస్స వా భిక్ఖునియా వా ఏవం తిబ్బా భయసఞ్ఞా పచ్చుపట్ఠితా హోతి పాటిదేసనీయేసు ధమ్మేసు, తస్సేతం పాటికఙ్ఖం – అనాపన్నో వా పాటిదేసనీయం ధమ్మం న ఆపజ్జిస్సతి, ఆపన్నో వా పాటిదేసనీయం ధమ్మం యథాధమ్మం పటికరిస్సతి. ఇమాని ఖో, భిక్ఖవే, చత్తారి ఆపత్తిభయానీ’’తి. దుతియం.

౩. సిక్ఖానిసంససుత్తం

౨౪౫. ‘‘సిక్ఖానిసంసమిదం, భిక్ఖవే, బ్రహ్మచరియం వుస్సతి పఞ్ఞుత్తరం విముత్తిసారం సతాధిపతేయ్యం. కథఞ్చ, భిక్ఖవే, సిక్ఖానిసంసం హోతి? ఇధ, భిక్ఖవే, మయా సావకానం ఆభిసమాచారికా సిక్ఖా పఞ్ఞత్తా అప్పసన్నానం పసాదాయ పసన్నానం భియ్యోభావాయ. యథా యథా, భిక్ఖవే, మయా సావకానం ఆభిసమాచారికా సిక్ఖా పఞ్ఞత్తా అప్పసన్నానం పసాదాయ పసన్నానం భియ్యోభావాయ తథా తథా సో తస్సా సిక్ఖాయ అఖణ్డకారీ హోతి అచ్ఛిద్దకారీ అసబలకారీ అకమ్మాసకారీ, సమాదాయ సిక్ఖతి సిక్ఖాపదేసు.

‘‘పున చపరం, భిక్ఖవే, మయా సావకానం ఆదిబ్రహ్మచరియికా సిక్ఖా పఞ్ఞత్తా సబ్బసో సమ్మా దుక్ఖక్ఖయాయ. యథా యథా, భిక్ఖవే, మయా సావకానం ఆదిబ్రహ్మచరియికా సిక్ఖా పఞ్ఞత్తా సబ్బసో సమ్మా దుక్ఖక్ఖయాయ తథా తథా సో తస్సా సిక్ఖాయ అఖణ్డకారీ హోతి అచ్ఛిద్దకారీ అసబలకారీ అకమ్మాసకారీ, సమాదాయ సిక్ఖతి సిక్ఖాపదేసు. ఏవం ఖో, భిక్ఖవే, సిక్ఖానిసంసం హోతి.

‘‘కథఞ్చ, భిక్ఖవే, పఞ్ఞుత్తరం హోతి? ఇధ, భిక్ఖవే, మయా సావకానం ధమ్మా దేసితా సబ్బసో సమ్మా దుక్ఖక్ఖయాయ. యథా యథా, భిక్ఖవే, మయా సావకానం ధమ్మా దేసితా సబ్బసో సమ్మా దుక్ఖక్ఖయాయ తథా తథాస్స తే ధమ్మా పఞ్ఞాయ సమవేక్ఖితా హోన్తి. ఏవం ఖో, భిక్ఖవే, పఞ్ఞుత్తరం హోతి.

‘‘కథఞ్చ, భిక్ఖవే, విముత్తిసారం హోతి? ఇధ, భిక్ఖవే, మయా సావకానం ధమ్మా దేసితా సబ్బసో సమ్మా దుక్ఖక్ఖయాయ. యథా యథా, భిక్ఖవే, మయా సావకానం ధమ్మా దేసితా సబ్బసో సమ్మా దుక్ఖక్ఖయాయ తథా తథాస్స తే ధమ్మా విముత్తియా ఫుసితా హోన్తి. ఏవం ఖో, భిక్ఖవే, విముత్తిసారం హోతి.

‘‘కథఞ్చ, భిక్ఖవే, సతాధిపతేయ్యం హోతి? ‘ఇతి అపరిపూరం వా ఆభిసమాచారికం సిక్ఖం పరిపూరేస్సామి, పరిపూరం వా ఆభిసమాచారికం సిక్ఖం తత్థ తత్థ పఞ్ఞాయ అనుగ్గహేస్సామీ’తి – అజ్ఝత్తంయేవ సతి సూపట్ఠితా హోతి. ‘ఇతి అపరిపూరం వా ఆదిబ్రహ్మచరియికం సిక్ఖం పరిపూరేస్సామి, పరిపూరం వా ఆదిబ్రహ్మచరియికం సిక్ఖం తత్థ తత్థ పఞ్ఞాయ అనుగ్గహేస్సామీ’తి – అజ్ఝత్తంయేవ సతి సూపట్ఠితా హోతి. ‘ఇతి అసమవేక్ఖితం వా ధమ్మం పఞ్ఞాయ సమవేక్ఖిస్సామి, సమవేక్ఖితం వా ధమ్మం తత్థ తత్థ పఞ్ఞాయ అనుగ్గహేస్సామీ’తి – అజ్ఝత్తంయేవ సతి సూపట్ఠితా హోతి. ‘ఇతి అఫుసితం వా ధమ్మం విముత్తియా ఫుసిస్సామి, ఫుసితం వా ధమ్మం తత్థ తత్థ పఞ్ఞాయ అనుగ్గహేస్సామీ’తి – అజ్ఝత్తంయేవ సతి సూపట్ఠితా హోతి. ఏవం ఖో, భిక్ఖవే, సతాధిపతేయ్యం హోతి. ‘సిక్ఖానిసంసమిదం, భిక్ఖవే, బ్రహ్మచరియం వుస్సతి పఞ్ఞుత్తరం విముత్తిసారం సతాధిపతేయ్య’న్తి, ఇతి యం తం వుత్తం ఇదమేతం పటిచ్చ వుత్త’’న్తి. తతియం.

౪. సేయ్యాసుత్తం

౨౪౬. ‘‘చతస్సో ఇమా, భిక్ఖవే, సేయ్యా. కతమా చతస్సో? పేతసేయ్యా, కామభోగిసేయ్యా, సీహసేయ్యా, తథాగతసేయ్యా. కతమా చ, భిక్ఖవే, పేతసేయ్యా? యేభుయ్యేన, భిక్ఖవే, పేతా ఉత్తానా సేన్తి; అయం వుచ్చతి, భిక్ఖవే, పేతసేయ్యా.

‘‘కతమా చ, భిక్ఖవే, కామభోగిసేయ్యా? యేభుయ్యేన, భిక్ఖవే, కామభోగీ వామేన పస్సేన సేన్తి; అయం వుచ్చతి, భిక్ఖవే, కామభోగిసేయ్యా.

‘‘కతమా చ, భిక్ఖవే, సీహసేయ్యా? సీహో, భిక్ఖవే, మిగరాజా దక్ఖిణేన పస్సేన సేయ్యం కప్పేతి, పాదే పాదం అచ్చాధాయ, అన్తరసత్థిమ్హి నఙ్గుట్ఠం అనుపక్ఖిపిత్వా. సో పటిబుజ్ఝిత్వా పురిమం కాయం అబ్భున్నామేత్వా పచ్ఛిమం కాయం అనువిలోకేతి. సచే, భిక్ఖవే, సీహో మిగరాజా కిఞ్చి పస్సతి కాయస్స విక్ఖిత్తం వా విసటం వా, తేన, భిక్ఖవే, సీహో మిగరాజా అనత్తమనో హోతి. సచే పన, భిక్ఖవే, సీహో మిగరాజా న కిఞ్చి పస్సతి కాయస్స విక్ఖిత్తం వా విసటం వా, తేన, భిక్ఖవే, సీహో మిగరాజా అత్తమనో హోతి. అయం వుచ్చతి, భిక్ఖవే, సీహసేయ్యా.

‘‘కతమా చ, భిక్ఖవే, తథాగతసేయ్యా? ఇధ, భిక్ఖవే, తథాగతో వివిచ్చేవ కామేహి…పే… చతుత్థం ఝానం ఉపసమ్పజ్జ విహరతి. అయం వుచ్చతి, భిక్ఖవే, తథాగతసేయ్యా. ఇమా ఖో, భిక్ఖవే, చతస్సో సేయ్యా’’తి. చతుత్థం.

౫. థూపారహసుత్తం

౨౪౭. ‘‘చత్తారోమే, భిక్ఖవే, థూపారహా. కతమే చత్తారో? తథాగతో అరహం సమ్మాసమ్బుద్ధో థూపారహో, పచ్చేకబుద్ధో థూపారహో, తథాగతసావకో థూపారహో, రాజా చక్కవత్తీ థూపారహో – ఇమే ఖో, భిక్ఖవే, చత్తారో థూపారహా’’తి. పఞ్చమం.

౬. పఞ్ఞావుద్ధిసుత్తం

౨౪౮. ‘‘చత్తారోమే, భిక్ఖవే, ధమ్మా పఞ్ఞావుద్ధియా సంవత్తన్తి. కతమే చత్తారో? సప్పురిససంసేవో, సద్ధమ్మసవనం, యోనిసోమనసికారో, ధమ్మానుధమ్మప్పటిపత్తి – ఇమే ఖో, భిక్ఖవే, చత్తారో ధమ్మా పఞ్ఞావుద్ధియా సంవత్తన్తీ’’తి. ఛట్ఠం.

౭. బహుకారసుత్తం

౨౪౯. ‘‘చత్తారోమే, భిక్ఖవే, ధమ్మా మనుస్సభూతస్స బహుకారా హోన్తి. కతమే చత్తారో? సప్పురిససంసేవో, సద్ధమ్మసవనం, యోనిసోమనసికారో, ధమ్మానుధమ్మప్పటిపత్తి – ఇమే ఖో, భిక్ఖవే, చత్తారో ధమ్మా మనుస్సభూతస్స బహుకారా హోన్తీ’’తి. సత్తమం.

౮. పఠమవోహారసుత్తం

౨౫౦. ‘‘చత్తారోమే, భిక్ఖవే, అనరియవోహారా. కతమే చత్తారో? అదిట్ఠే దిట్ఠవాదితా, అసుతే సుతవాదితా, అముతే ముతవాదితా, అవిఞ్ఞాతే విఞ్ఞాతవాదితా – ఇమే ఖో, భిక్ఖవే, చత్తారో అనరియవోహారా’’తి. అట్ఠమం.

౯. దుతియవోహారసుత్తం

౨౫౧. ‘‘చత్తారోమే, భిక్ఖవే, అరియవోహారా. కతమే చత్తారో? అదిట్ఠే అదిట్ఠవాదితా, అసుతే అసుతవాదితా, అముతే అముతవాదితా, అవిఞ్ఞాతే అవిఞ్ఞాతవాదితా – ఇమే ఖో, భిక్ఖవే, చత్తారో అరియవోహారా’’తి. నవమం.

౧౦. తతియవోహారసుత్తం

౨౫౨. ‘‘చత్తారోమే, భిక్ఖవే, అనరియవోహారా. కతమే చత్తారో? దిట్ఠే అదిట్ఠవాదితా, సుతే అసుతవాదితా, ముతే అముతవాదితా, విఞ్ఞాతే అవిఞ్ఞాతవాదితా – ఇమే ఖో, భిక్ఖవే, చత్తారో అనరియవోహారా’’తి. దసమం.

౧౧. చతుత్థవోహారసుత్తం

౨౫౩. ‘‘చత్తారోమే, భిక్ఖవే, అరియవోహారా. కతమే చత్తారో? దిట్ఠే దిట్ఠవాదితా, సుతే సుతవాదితా, ముతే ముతవాదితా, విఞ్ఞాతే విఞ్ఞాతవాదితా – ఇమే ఖో, భిక్ఖవే, చత్తారో అరియవోహారా’’తి. ఏకాదసమం.

ఆపత్తిభయవగ్గో పఞ్చమో.