౯. తతియపాపధమ్మసుత్తం

౨౦౯. ‘‘పాపధమ్మఞ్చ వో, భిక్ఖవే, దేసేస్సామి, పాపధమ్మేన పాపధమ్మతరఞ్చ; కల్యాణధమ్మఞ్చ, కల్యాణధమ్మేన కల్యాణధమ్మతరఞ్చ. తం సుణాథ…పే….

‘‘కతమో చ, భిక్ఖవే, పాపధమ్మో? ఇధ, భిక్ఖవే, ఏకచ్చో పాణాతిపాతీ హోతి…పే… మిచ్ఛాదిట్ఠికో హోతి. అయం వుచ్చతి, భిక్ఖవే, పాపధమ్మో.

‘‘కతమో చ, భిక్ఖవే, పాపధమ్మేన పాపధమ్మతరో? ఇధ భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి…పే… అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి. అయం వుచ్చతి, భిక్ఖవే, పాపధమ్మేన పాపధమ్మతరో.

‘‘కతమో చ, భిక్ఖవే, కల్యాణధమ్మో? ఇధ, భిక్ఖవే, ఏకచ్చో పాణాతిపాతా పటివిరతో హోతి…పే… సమ్మాదిట్ఠికో హోతి. అయం వుచ్చతి, భిక్ఖవే, కల్యాణధమ్మో.

‘‘కతమో చ, భిక్ఖవే, కల్యాణధమ్మేన కల్యాణధమ్మతరో? ఇధ, భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి…పే… అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి. అయం వుచ్చతి, భిక్ఖవే, కల్యాణధమ్మేన కల్యాణధమ్మతరో’’తి. నవమం.