(౨౧) ౧. సప్పురిసవగ్గో

౧. సిక్ఖాపదసుత్తం

౨౦౧. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ, సాధుకం మనసి కరోథ; భాసిస్సామీ’’తి. ‘‘ఏవం, భన్తే’’తి ఖో తే భిక్ఖూ భగవతో పచ్చస్సోసుం. భగవా ఏతదవోచ –

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో పాణాతిపాతీ హోతి, అదిన్నాదాయీ హోతి, కామేసుమిచ్ఛాచారీ హోతి, ముసావాదీ హోతి, సురామేరయమజ్జపమాదట్ఠాయీ హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ, భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి; అత్తనా చ అదిన్నాదాయీ హోతి, పరఞ్చ అదిన్నాదానే సమాదపేతి; అత్తనా చ కామేసుమిచ్ఛాచారీ హోతి, పరఞ్చ కామేసుమిచ్ఛాచారే సమాదపేతి; అత్తనా చ ముసావాదీ హోతి, పరఞ్చ ముసావాదే సమాదపేతి; అత్తనా చ సురామేరయమజ్జపమాదట్ఠాయీ హోతి, పరఞ్చ సురామేరయమజ్జపమాదట్ఠానే సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో పాణాతిపాతా పటివిరతో హోతి, అదిన్నాదానా పటివిరతో హోతి, కామేసుమిచ్ఛాచారా పటివిరతో హోతి, ముసావాదా పటివిరతో హోతి, సురామేరయమజ్జపమాదట్ఠానా పటివిరతో హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ, భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి; అత్తనా చ అదిన్నాదానా పటివిరతో హోతి, పరఞ్చ అదిన్నాదానా వేరమణియా సమాదపేతి; అత్తనా చ కామేసుమిచ్ఛాచారా పటివిరతో హోతి, పరఞ్చ కామేసుమిచ్ఛాచారా వేరమణియా సమాదపేతి; అత్తనా చ ముసావాదా పటివిరతో హోతి, పరఞ్చ ముసావాదా వేరమణియా సమాదపేతి; అత్తనా చ సురామేరయమజ్జపమాదట్ఠానా పటివిరతో హోతి, పరఞ్చ సురామేరయమజ్జపమాదట్ఠానా వేరమణియా సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి [పు. ప. ౧౩౫]. పఠమం.

౨. అస్సద్ధసుత్తం

౨౦౨. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ…పే….

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో అస్సద్ధో హోతి, అహిరికో హోతి, అనోత్తప్పీ హోతి, అప్పస్సుతో హోతి, కుసీతో హోతి, ముట్ఠస్సతి హోతి, దుప్పఞ్ఞో హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ, భిక్ఖవే, ఏకచ్చో అత్తనా చ అస్సద్ధో హోతి, పరఞ్చ అస్సద్ధియే [అసద్ధాయ (క.)] సమాదపేతి; అత్తనా చ అహిరికో హోతి, పరఞ్చ అహిరికతాయ సమాదపేతి; అత్తనా చ అనోత్తప్పీ హోతి, పరఞ్చ అనోత్తప్పే సమాదపేతి; అత్తనా చ అప్పస్సుతో హోతి, పరఞ్చ అప్పస్సుతే సమాదపేతి; అత్తనా చ కుసీతో హోతి, పరఞ్చ కోసజ్జే సమాదపేతి; అత్తనా చ ముట్ఠస్సతి హోతి, పరఞ్చ ముట్ఠస్సచ్చే [ముట్ఠసచ్చే (సీ. స్యా. కం. పీ.)] సమాదపేతి; అత్తనా చ దుప్పఞ్ఞో హోతి, పరఞ్చ దుప్పఞ్ఞతాయ సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో సద్ధో హోతి, హిరిమా హోతి, ఓత్తప్పీ హోతి, బహుస్సుతో హోతి, ఆరద్ధవీరియో హోతి, సతిమా హోతి, పఞ్ఞవా హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ, భిక్ఖవే, ఏకచ్చో అత్తనా చ సద్ధాసమ్పన్నో హోతి, పరఞ్చ సద్ధాసమ్పదాయ సమాదపేతి; అత్తనా చ హిరిమా హోతి, పరఞ్చ హిరిమతాయ [హిరిసమ్పదాయ (క.)] సమాదపేతి; అత్తనా చ ఓత్తప్పీ హోతి, పరఞ్చ ఓత్తప్పే సమాదపేతి; అత్తనా చ బహుస్సుతో హోతి, పరఞ్చ బాహుసచ్చే సమాదపేతి; అత్తనా చ ఆరద్ధవీరియో హోతి, పరఞ్చ వీరియారమ్భే సమాదపేతి; అత్తనా చ ఉపట్ఠితస్సతి హోతి, పరఞ్చ సతిఉపట్ఠానే [సతిపట్ఠానే (సీ. స్యా. కం. పీ.)] సమాదపేతి; అత్తనా చ పఞ్ఞాసమ్పన్నో హోతి, పరఞ్చ పఞ్ఞాసమ్పదాయ సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి. దుతియం.

౩. సత్తకమ్మసుత్తం

౨౦౩. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ…పే….

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో పాణాతిపాతీ హోతి, అదిన్నాదాయీ హోతి, కామేసుమిచ్ఛాచారీ హోతి, ముసావాదీ హోతి, పిసుణవాచో హోతి, ఫరుసవాచో హోతి, సమ్ఫప్పలాపీ హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ, భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి; అత్తనా చ అదిన్నాదాయీ హోతి, పరఞ్చ అదిన్నాదానే సమాదపేతి; అత్తనా చ కామేసుమిచ్ఛాచారీ హోతి, పరఞ్చ కామేసుమిచ్ఛాచారే సమాదపేతి; అత్తనా చ ముసావాదీ హోతి, పరఞ్చ ముసావాదే సమాదపేతి; అత్తనా చ పిసుణవాచో హోతి, పరఞ్చ పిసుణాయ వాచాయ సమాదపేతి; అత్తనా చ ఫరుసవాచో హోతి, పరఞ్చ ఫరుసాయ వాచాయ సమాదపేతి; అత్తనా చ సమ్ఫప్పలాపీ హోతి, పరఞ్చ సమ్ఫప్పలాపే సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో పాణాతిపాతా పటివిరతో హోతి, అదిన్నాదానా పటివిరతో హోతి, కామేసుమిచ్ఛాచారా పటివిరతో హోతి, ముసావాదా పటివిరతో హోతి, పిసుణాయ వాచాయ పటివిరతో హోతి, ఫరుసాయ వాచాయ పటివిరతో, హోతి, సమ్ఫప్పలాపా పటివిరతో హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి; అత్తనా చ అదిన్నాదానా పటివిరతో హోతి, పరఞ్చ అదిన్నాదానా వేరమణియా సమాదపేతి; అత్తనా చ కామేసుమిచ్ఛాచారా పటివిరతో హోతి, పరఞ్చ కామేసుమిచ్ఛాచారా వేరమణియా సమాదపేతి; అత్తనా చ ముసావాదా పటివిరతో హోతి, పరఞ్చ ముసావాదా వేరమణియా సమాదపేతి; అత్తనా చ పిసుణాయ వాచాయ పటివిరతో హోతి, పరఞ్చ పిసుణాయ వాచాయ వేరమణియా సమాదపేతి; అత్తనా చ ఫరుసాయ వాచాయ పటివిరతో హోతి, పరఞ్చ ఫరుసాయ వాచాయ వేరమణియా సమాదపేతి; అత్తనా చ సమ్ఫప్పలాపా పటివిరతో హోతి, పరఞ్చ సమ్ఫప్పలాపా వేరమణియా సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి. తతియం.

౪. దసకమ్మసుత్తం

౨౦౪. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ…పే….

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో పాణాతిపాతీ హోతి, అదిన్నాదాయీ హోతి, కామేసుమిచ్ఛాచారీ హోతి, ముసావాదీ హోతి, పిసుణవాచో హోతి, ఫరుసవాచో హోతి, సమ్ఫప్పలాపీ హోతి, అభిజ్ఝాలు హోతి, బ్యాపన్నచిత్తో హోతి, మిచ్ఛాదిట్ఠికో హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ, భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి…పే… అత్తనా చ అభిజ్ఝాలు హోతి, పరఞ్చ అభిజ్ఝాయ సమాదపేతి; అత్తనా చ బ్యాపన్నచిత్తో హోతి, పరఞ్చ బ్యాపాదే సమాదపేతి, అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో పాణాతిపాతా పటివిరతో హోతి…పే… అనభిజ్ఝాలు హోతి, అబ్యాపన్నచిత్తో హోతి, సమ్మాదిట్ఠికో హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ, భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి…పే… అత్తనా చ అనభిజ్ఝాలు హోతి, పరఞ్చ అనభిజ్ఝాయ సమాదపేతి; అత్తనా చ అబ్యాపన్నచిత్తో హోతి, పరఞ్చ అబ్యాపాదే సమాదపేతి; అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి. చతుత్థం.

౫. అట్ఠఙ్గికసుత్తం

౨౦౫. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ…పే….

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో మిచ్ఛాదిట్ఠికో హోతి, మిచ్ఛాసఙ్కప్పో హోతి, మిచ్ఛావాచో హోతి, మిచ్ఛాకమ్మన్తో హోతి, మిచ్ఛాఆజీవో హోతి, మిచ్ఛావాయామో హోతి, మిచ్ఛాసతి హోతి, మిచ్ఛాసమాధి హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ భిక్ఖవే, ఏకచ్చో అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి; అత్తనా చ మిచ్ఛాసఙ్కప్పో హోతి, పరఞ్చ మిచ్ఛాసఙ్కప్పే సమాదపేతి; అత్తనా చ మిచ్ఛావాచో హోతి, పరఞ్చ మిచ్ఛావాచాయ సమాదపేతి; అత్తనా చ మిచ్ఛాకమ్మన్తో హోతి, పరఞ్చ మిచ్ఛాకమ్మన్తే సమాదపేతి; అత్తనా చ మిచ్ఛాఆజీవో హోతి, పరఞ్చ మిచ్ఛాఆజీవే సమాదపేతి; అత్తనా చ మిచ్ఛావాయామో హోతి, పరఞ్చ మిచ్ఛావాయామే సమాదపేతి; అత్తనా చ మిచ్ఛాసతి హోతి, పరఞ్చ మిచ్ఛాసతియా సమాదపేతి; అత్తనా చ మిచ్ఛాసమాధి హోతి, పరఞ్చ మిచ్ఛాసమాధిమ్హి సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో సమ్మాదిట్ఠికో హోతి, సమ్మాసఙ్కప్పో హోతి, సమ్మావాచో హోతి, సమ్మాకమ్మన్తో హోతి, సమ్మాఆజీవో హోతి, సమ్మావాయామో హోతి, సమ్మాసతి హోతి, సమ్మాసమాధి హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ, భిక్ఖవే, ఏకచ్చో అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి; అత్తనా చ సమ్మాసఙ్కప్పో హోతి, పరఞ్చ సమ్మాసఙ్కప్పే సమాదపేతి; అత్తనా చ సమ్మావాచో హోతి, పరఞ్చ సమ్మావాచాయ సమాదపేతి; అత్తనా చ సమ్మాకమ్మన్తో హోతి, పరఞ్చ సమ్మాకమ్మన్తే సమాదపేతి; అత్తనా చ సమ్మాఆజీవో హోతి, పరఞ్చ సమ్మాఆజీవే సమాదపేతి; అత్తనా చ సమ్మావాయామో హోతి, పరఞ్చ సమ్మావాయామే సమాదపేతి; అత్తనా చ సమ్మాసతి హోతి, పరఞ్చ సమ్మాసతియా సమాదపేతి; అత్తనా చ సమ్మాసమాధి హోతి, పరఞ్చ సమ్మాసమాధిమ్హి సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి. పఞ్చమం.

౬. దసమగ్గసుత్తం

౨౦౬. ‘‘అసప్పురిసఞ్చ వో, భిక్ఖవే, దేసేస్సామి, అసప్పురిసేన అసప్పురిసతరఞ్చ; సప్పురిసఞ్చ, సప్పురిసేన సప్పురిసతరఞ్చ. తం సుణాథ…పే….

‘‘కతమో చ, భిక్ఖవే, అసప్పురిసో? ఇధ, భిక్ఖవే, ఏకచ్చో మిచ్ఛాదిట్ఠికో హోతి …పే… మిచ్ఛాఞాణీ హోతి, మిచ్ఛావిముత్తి హోతి. అయం వుచ్చతి, భిక్ఖవే, అసప్పురిసో.

‘‘కతమో చ, భిక్ఖవే, అసప్పురిసేన అసప్పురిసతరో? ఇధ, భిక్ఖవే, ఏకచ్చో అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి…పే… అత్తనా చ మిచ్ఛాఞాణీ హోతి, పరఞ్చ మిచ్ఛాఞాణే సమాదపేతి; అత్తనా చ మిచ్ఛావిముత్తి హోతి, పరఞ్చ మిచ్ఛావిముత్తియా సమాదపేతి. అయం వుచ్చతి, భిక్ఖవే, అసప్పురిసేన అసప్పురిసతరో.

‘‘కతమో చ, భిక్ఖవే, సప్పురిసో? ఇధ, భిక్ఖవే, ఏకచ్చో సమ్మాదిట్ఠికో హోతి…పే… సమ్మాఞాణీ హోతి, సమ్మావిముత్తి హోతి. అయం వుచ్చతి, భిక్ఖవే, సప్పురిసో.

‘‘కతమో చ, భిక్ఖవే, సప్పురిసేన సప్పురిసతరో? ఇధ, భిక్ఖవే, ఏకచ్చో అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి…పే… అత్తనా చ సమ్మాఞాణీ హోతి, పరఞ్చ సమ్మాఞాణే సమాదపేతి; అత్తనా చ సమ్మావిముత్తి హోతి, పరఞ్చ సమ్మావిముత్తియా సమాదపేతి. అయం వుచ్చతి, భిక్ఖవే, సప్పురిసేన సప్పురిసతరో’’తి. ఛట్ఠం.

౭. పఠమపాపధమ్మసుత్తం

౨౦౭. ‘‘పాపఞ్చ వో, భిక్ఖవే, దేసేస్సామి, పాపేన పాపతరఞ్చ; కల్యాణఞ్చ, కల్యాణేన కల్యాణతరఞ్చ. తం సుణాథ…పే….

‘‘కతమో చ, భిక్ఖవే, పాపో? ఇధ, భిక్ఖవే, ఏకచ్చో పాణాతిపాతీ హోతి…పే… మిచ్ఛాదిట్ఠికో హోతి. అయం వుచ్చతి, భిక్ఖవే, పాపో.

‘‘కతమో చ, భిక్ఖవే, పాపేన పాపతరో? ఇధ, భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి…పే… అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి. అయం వుచ్చతి, భిక్ఖవే, పాపేన పాపతరో.

‘‘కతమో చ, భిక్ఖవే, కల్యాణో? ఇధ, భిక్ఖవే, ఏకచ్చో పాణాతిపాతా పటివిరతో హోతి…పే… సమ్మాదిట్ఠికో హోతి. అయం వుచ్చతి, భిక్ఖవే, కల్యాణో.

‘‘కతమో చ, భిక్ఖవే, కల్యాణేన కల్యాణతరో? ఇధ, భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి…పే… అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి. అయం వుచ్చతి, భిక్ఖవే, కల్యాణేన కల్యాణతరో’’తి. సత్తమం.

౮. దుతియపాపధమ్మసుత్తం

౨౦౮. ‘‘పాపఞ్చ వో, భిక్ఖవే, దేసేస్సామి, పాపేన పాపతరఞ్చ; కల్యాణఞ్చ, కల్యాణేన కల్యాణతరఞ్చ. తం సుణాథ, సాధుకం మనసికరోథ; భాసిస్సామీ’’తి. ఏవం…పే… ఏతదవోచ –

‘‘కతమో చ, భిక్ఖవే, పాపో? ఇధ, భిక్ఖవే, ఏకచ్చో మిచ్ఛాదిట్ఠికో హోతి…పే… మిచ్ఛాఞాణీ హోతి, మిచ్ఛావిముత్తి హోతి. అయం వుచ్చతి, భిక్ఖవే, పాపో.

‘‘కతమో చ, భిక్ఖవే, పాపేన పాపతరో? ఇధ, భిక్ఖవే, ఏకచ్చో అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి…పే… అత్తనా చ మిచ్ఛాఞాణీ హోతి, పరఞ్చ మిచ్ఛాఞాణే సమాదపేతి; అత్తనా చ మిచ్ఛావిముత్తి హోతి, పరఞ్చ మిచ్ఛావిముత్తియా సమాదపేతి. అయం వుచ్చతి, భిక్ఖవే, పాపేన పాపతరో.

‘‘కతమో చ, భిక్ఖవే, కల్యాణో? ఇధ, భిక్ఖవే, ఏకచ్చో సమ్మాదిట్ఠికో హోతి …పే… సమ్మాఞాణీ హోతి, సమ్మావిముత్తి హోతి. అయం వుచ్చతి, భిక్ఖవే, కల్యాణో.

‘‘కతమో చ, భిక్ఖవే, కల్యాణేన కల్యాణతరో? ఇధ, భిక్ఖవే, ఏకచ్చో అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి…పే… అత్తనా చ సమ్మాఞాణీ హోతి, పరఞ్చ సమ్మాఞాణే సమాదపేతి; అత్తనా చ సమ్మావిముత్తి హోతి, పరఞ్చ సమ్మావిముత్తియా సమాదపేతి. అయం వుచ్చతి, భిక్ఖవే, కల్యాణేన కల్యాణతరో’’తి. అట్ఠమం.

౯. తతియపాపధమ్మసుత్తం

౨౦౯. ‘‘పాపధమ్మఞ్చ వో, భిక్ఖవే, దేసేస్సామి, పాపధమ్మేన పాపధమ్మతరఞ్చ; కల్యాణధమ్మఞ్చ, కల్యాణధమ్మేన కల్యాణధమ్మతరఞ్చ. తం సుణాథ…పే….

‘‘కతమో చ, భిక్ఖవే, పాపధమ్మో? ఇధ, భిక్ఖవే, ఏకచ్చో పాణాతిపాతీ హోతి…పే… మిచ్ఛాదిట్ఠికో హోతి. అయం వుచ్చతి, భిక్ఖవే, పాపధమ్మో.

‘‘కతమో చ, భిక్ఖవే, పాపధమ్మేన పాపధమ్మతరో? ఇధ భిక్ఖవే, ఏకచ్చో అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి…పే… అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి. అయం వుచ్చతి, భిక్ఖవే, పాపధమ్మేన పాపధమ్మతరో.

‘‘కతమో చ, భిక్ఖవే, కల్యాణధమ్మో? ఇధ, భిక్ఖవే, ఏకచ్చో పాణాతిపాతా పటివిరతో హోతి…పే… సమ్మాదిట్ఠికో హోతి. అయం వుచ్చతి, భిక్ఖవే, కల్యాణధమ్మో.

‘‘కతమో చ, భిక్ఖవే, కల్యాణధమ్మేన కల్యాణధమ్మతరో? ఇధ, భిక్ఖవే, ఏకచ్చో అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి…పే… అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి. అయం వుచ్చతి, భిక్ఖవే, కల్యాణధమ్మేన కల్యాణధమ్మతరో’’తి. నవమం.

౧౦. చతుత్థపాపధమ్మసుత్తం

౨౧౦. ‘‘పాపధమ్మఞ్చ వో, భిక్ఖవే, దేసేస్సామి, పాపధమ్మేన పాపధమ్మతరఞ్చ; కల్యాణధమ్మఞ్చ, కల్యాణధమ్మేన కల్యాణధమ్మతరఞ్చ. తం సుణాథ…పే….

‘‘కతమో చ, భిక్ఖవే, పాపధమ్మో? ఇధ, భిక్ఖవే, ఏకచ్చో మిచ్ఛాదిట్ఠికో హోతి…పే… మిచ్ఛాఞాణీ హోతి, మిచ్ఛావిముత్తి హోతి. అయం వుచ్చతి, భిక్ఖవే, పాపధమ్మో.

‘‘కతమో చ, భిక్ఖవే, పాపధమ్మేన పాపధమ్మతరో? ఇధ, భిక్ఖవే, ఏకచ్చో అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి…పే… అత్తనా చ మిచ్ఛాఞాణీ హోతి, పరఞ్చ మిచ్ఛాఞాణే సమాదపేతి; అత్తనా చ మిచ్ఛావిముత్తి హోతి, పరఞ్చ మిచ్ఛావిముత్తియా సమాదపేతి. అయం వుచ్చతి, భిక్ఖవే, పాపధమ్మేన పాపధమ్మతరో.

‘‘కతమో చ, భిక్ఖవే, కల్యాణధమ్మో? ఇధ, భిక్ఖవే, ఏకచ్చో సమ్మాదిట్ఠికో హోతి…పే… సమ్మాఞాణీ హోతి, సమ్మావిముత్తి హోతి. అయం వుచ్చతి, భిక్ఖవే, కల్యాణధమ్మో.

‘‘కతమో చ, భిక్ఖవే, కల్యాణధమ్మేన కల్యాణధమ్మతరో? ఇధ, భిక్ఖవే, ఏకచ్చో అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి…పే… అత్తనా చ సమ్మాఞాణీ హోతి, పరఞ్చ సమ్మాఞాణే సమాదపేతి; అత్తనా చ సమ్మావిముత్తి హోతి, పరఞ్చ సమ్మావిముత్తియా సమాదపేతి. అయం వుచ్చతి, భిక్ఖవే, కల్యాణధమ్మేన కల్యాణధమ్మతరో’’తి. దసమం.

సప్పురిసవగ్గో పఠమో.