౬. ఉభయసుత్తం

౧౬౬. ‘‘చతస్సో ఇమా, భిక్ఖవే, పటిపదా. కతమా చతస్సో? దుక్ఖా పటిపదా దన్ధాభిఞ్ఞా, దుక్ఖా పటిపదా ఖిప్పాభిఞ్ఞా, సుఖా పటిపదా దన్ధాభిఞ్ఞా, సుఖా పటిపదా ఖిప్పాభిఞ్ఞా.

‘‘తత్ర, భిక్ఖవే, యాయం పటిపదా దుక్ఖా దన్ధాభిఞ్ఞా, అయం, భిక్ఖవే, పటిపదా ఉభయేనేవ హీనా అక్ఖాయతి. యమ్పాయం పటిపదా దుక్ఖా, ఇమినాపాయం హీనా అక్ఖాయతి; యమ్పాయం పటిపదా దన్ధా, ఇమినాపాయం హీనా అక్ఖాయతి. అయం, భిక్ఖవే, పటిపదా ఉభయేనేవ హీనా అక్ఖాయతి.

‘‘తత్ర, భిక్ఖవే, యాయం పటిపదా దుక్ఖా ఖిప్పాభిఞ్ఞా, అయం, భిక్ఖవే, పటిపదా దుక్ఖత్తా హీనా అక్ఖాయతి.

‘‘తత్ర, భిక్ఖవే, యాయం పటిపదా సుఖా దన్ధాభిఞ్ఞా, అయం, భిక్ఖవే, పటిపదా దన్ధత్తా హీనా అక్ఖాయతి.

‘‘తత్ర, భిక్ఖవే, యాయం పటిపదా సుఖా ఖిప్పాభిఞ్ఞా, అయం, భిక్ఖవే, పటిపదా ఉభయేనేవ పణీతా అక్ఖాయతి. యమ్పాయం పటిపదా సుఖా, ఇమినాపాయం పణీతా అక్ఖాయతి; యమ్పాయం పటిపదా ఖిప్పా, ఇమినాపాయం పణీతా అక్ఖాయతి. అయం, భిక్ఖవే, పటిపదా ఉభయేనేవ పణీతా అక్ఖాయతి. ఇమా ఖో, భిక్ఖవే, చతస్సో పటిపదా’’తి. ఛట్ఠం.