(౧౫) ౫. ఆభావగ్గో

౧. ఆభాసుత్తం

౧౪౧. ‘‘చతస్సో ఇమా, భిక్ఖవే, ఆభా. కతమా చతస్సో? చన్దాభా, సూరియాభా, అగ్గాభా, పఞ్ఞాభా – ఇమా ఖో, భిక్ఖవే, చతస్సో ఆభా. ఏతదగ్గం, భిక్ఖవే, ఇమాసం చతున్నం [చతస్సన్నం (స్యా. కం.) సద్దనీతిపదమాలా పస్సితబ్బా] ఆభానం యదిదం పఞ్ఞాభా’’తి. పఠమం.

౨. పభాసుత్తం

౧౪౨. ‘‘చతస్సో ఇమా, భిక్ఖవే, పభా. కతమా చతస్సో? చన్దప్పభా, సూరియప్పభా, అగ్గిప్పభా, పఞ్ఞాపభా – ఇమా ఖో, భిక్ఖవే, చతస్సో పభా. ఏతదగ్గం, భిక్ఖవే, ఇమాసం చతున్నం పభానం యదిదం పఞ్ఞాపభా’’తి. దుతియం.

౩. ఆలోకసుత్తం

౧౪౩. ‘‘చత్తారోమే, భిక్ఖవే, ఆలోకా. కతమే చత్తారో? చన్దాలోకో, సూరియాలోకో, అగ్గాలోకో, పఞ్ఞాలోకో – ఇమే ఖో, భిక్ఖవే, చత్తారో ఆలోకా. ఏతదగ్గం, భిక్ఖవే, ఇమేసం చతున్నం ఆలోకానం యదిదం పఞ్ఞాలోకో’’తి. తతియం.

౪. ఓభాససుత్తం

౧౪౪. ‘‘చత్తారోమే, భిక్ఖవే, ఓభాసా. కతమే చత్తారో? చన్దోభాసో, సూరియోభాసో, అగ్గోభాసో, పఞ్ఞోభాసో – ఇమే ఖో, భిక్ఖవే, చత్తారో ఓభాసా. ఏతదగ్గం, భిక్ఖవే, ఇమేసం చతున్నం ఓభాసానం యదిదం పఞ్ఞోభాసో’’తి. చతుత్థం.

౫. పజ్జోతసుత్తం

౧౪౫. ‘‘చత్తారోమే, భిక్ఖవే, పజ్జోతా. కతమే చత్తారో? చన్దపజ్జోతో, సూరియపజ్జోతో, అగ్గిపజ్జోతో, పఞ్ఞాపజ్జోతో – ఇమే ఖో, భిక్ఖవే, చత్తారో పజ్జోతా. ఏతదగ్గం, భిక్ఖవే, ఇమేసం చతున్నం పజ్జోతానం యదిదం పఞ్ఞాపజ్జోతో’’తి. పఞ్చమం.

౬. పఠమకాలసుత్తం

౧౪౬. ‘‘చత్తారోమే, భిక్ఖవే, కాలా. కతమే చత్తారో? కాలేన ధమ్మస్సవనం, కాలేన ధమ్మసాకచ్ఛా, కాలేన సమ్మసనా [కాలేన సమథో (సీ. స్యా. కం. పీ.)], కాలేన విపస్సనా – ఇమే ఖో, భిక్ఖవే, చత్తారో కాలా’’తి. ఛట్ఠం.

౭. దుతియకాలసుత్తం

౧౪౭. ‘‘చత్తారోమే, భిక్ఖవే, కాలా సమ్మా భావియమానా సమ్మా అనుపరివత్తియమానా అనుపుబ్బేన ఆసవానం ఖయం పాపేన్తి. కతమే చత్తారో? కాలేన ధమ్మస్సవనం, కాలేన ధమ్మసాకచ్ఛా, కాలేన సమ్మసనా, కాలేన విపస్సనా – ఇమే ఖో, భిక్ఖవే, చత్తారో కాలా సమ్మా భావియమానా సమ్మా అనుపరివత్తియమానా అనుపుబ్బేన ఆసవానం ఖయం పాపేన్తి.

‘‘సేయ్యథాపి, భిక్ఖవే, ఉపరిపబ్బతే థుల్లఫుసితకే దేవే వస్సన్తే తం ఉదకం యథానిన్నం పవత్తమానం పబ్బతకన్దరపదరసాఖా పరిపూరేతి; పబ్బతకన్దరపదరసాఖా పరిపూరా కుసోబ్భే పరిపూరేన్తి; కుసోబ్భా పరిపూరా మహాసోబ్భే పరిపూరేన్తి; మహాసోబ్భా పరిపూరా కున్నదియో పరిపూరేన్తి; కున్నదియో పరిపూరా మహానదియో పరిపూరేన్తి; మహానదియో పరిపూరా సముద్దం [సముద్దం సాగరం (సీ. పీ. క.), సముద్దసాగరం (స్యా. కం.)] పరిపూరేన్తి. ఏవమేవం ఖో, భిక్ఖవే, ఇమే చత్తారో కాలా సమ్మా భావియమానా సమ్మా అనుపరివత్తియమానా అనుపుబ్బేన ఆసవానం ఖయం పాపేన్తీ’’తి. సత్తమం.

౮. దుచ్చరితసుత్తం

౧౪౮. ‘‘చత్తారిమాని, భిక్ఖవే, వచీదుచ్చరితాని. కతమాని చత్తారి? ముసావాదో, పిసుణా వాచా, ఫరుసా వాచా, సమ్ఫప్పలాపో – ఇమాని ఖో, భిక్ఖవే, చత్తారి వచీదుచ్చరితానీ’’తి. అట్ఠమం.

౯. సుచరితసుత్తం

౧౪౯. ‘‘చత్తారిమాని, భిక్ఖవే, వచీసుచరితాని. కతమాని చత్తారి? సచ్చవాచా, అపిసుణా వాచా, సణ్హా వాచా, మన్తభాసా – ఇమాని ఖో, భిక్ఖవే, చత్తారి వచీసుచరితానీ’’తి. నవమం.

౧౦. సారసుత్తం

౧౫౦. ‘‘చత్తారోమే, భిక్ఖవే, సారా. కతమే చత్తారో? సీలసారో, సమాధిసారో, పఞ్ఞాసారో, విముత్తిసారో – ఇమే ఖో, భిక్ఖవే, చత్తారో సారా’’తి. దసమం.

ఆభావగ్గో పఞ్చమో.