౬. పఠమసీలసుత్తం

౧౩౬. ‘‘చత్తారోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే చత్తారో? ఇధ, భిక్ఖవే, ఏకచ్చో పుగ్గలో సీలేసు న పరిపూరకారీ హోతి, సమాధిస్మిం న పరిపూరకారీ, పఞ్ఞాయ న పరిపూరకారీ.

‘‘ఇధ పన, భిక్ఖవే, ఏకచ్చో పుగ్గలో సీలేసు పరిపూరకారీ హోతి, సమాధిస్మిం న పరిపూరకారీ, పఞ్ఞాయ న పరిపూరకారీ.

‘‘ఇధ పన, భిక్ఖవే, ఏకచ్చో పుగ్గలో సీలేసు పరిపూరకారీ హోతి, సమాధిస్మిం పరిపూరకారీ, పఞ్ఞాయ న పరిపూరకారీ.

‘‘ఇధ పన, భిక్ఖవే, ఏకచ్చో పుగ్గలో సీలేసు పరిపూరకారీ హోతి, సమాధిస్మిం పరిపూరకారీ, పఞ్ఞాయ పరిపూరకారీ. ఇమే ఖో, భిక్ఖవే, చత్తారో పుగ్గలా సన్తో సంవిజ్జమానా లోకస్మి’’న్తి. ఛట్ఠం.