౬. సరాగసుత్తం

౬౬. ‘‘చత్తారోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే చత్తారో? సరాగో, సదోసో, సమోహో, సమానో – ఇమే ఖో, భిక్ఖవే, చత్తారో పుగ్గలా సన్తో సంవిజ్జమానా లోకస్మి’’న్తి.

‘‘సారత్తా రజనీయేసు, పియరూపాభినన్దినో;

మోహేన ఆవుతా [అధమా (సీ. స్యా. కం. పీ.)] సత్తా, బద్ధా [బన్ధా (క.)] వడ్ఢేన్తి బన్ధనం.

‘‘రాగజం దోసజఞ్చాపి, మోహజం చాపవిద్దసూ;

కరోన్తాకుసలం కమ్మం [ధమ్మం (క.)], సవిఘాతం దుఖుద్రయం.

‘‘అవిజ్జానివుతా పోసా, అన్ధభూతా అచక్ఖుకా;

యథా ధమ్మా తథా సన్తా, న తస్సేవన్తి [నస్సేవన్తి (సీ.)] మఞ్ఞరే’’తి. ఛట్ఠం;