౫. రూపసుత్తం

౬౫. ‘‘చత్తారోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే చత్తారో? రూపప్పమాణో రూపప్పసన్నో, ఘోసప్పమాణో ఘోసప్పసన్నో, లూఖప్పమాణో లూఖప్పసన్నో, ధమ్మప్పమాణో ధమ్మప్పసన్నో – ఇమే ఖో, భిక్ఖవే, చత్తారో పుగ్గలా సన్తో సంవిజ్జమానా లోకస్మి’’న్తి.

‘‘యే చ రూపే పమాణింసు [యే చ రూపేన పామింసు (సీ. స్యా. కం. పీ.)], యే చ ఘోసేన అన్వగూ;

ఛన్దరాగవసూపేతా, నాభిజానన్తి తే జనా [న తే జానన్తి తం జనా (సీ. స్యా. కం. పీ.)].

‘‘అజ్ఝత్తఞ్చ న జానాతి, బహిద్ధా చ న పస్సతి;

సమన్తావరణో బాలో, స వే ఘోసేన వుయ్హతి.

‘‘అజ్ఝత్తఞ్చ న జానాతి, బహిద్ధా చ విపస్సతి;

బహిద్ధా ఫలదస్సావీ, సోపి ఘోసేన వుయ్హతి.

‘‘అజ్ఝత్తఞ్చ పజానాతి, బహిద్ధా చ విపస్సతి;

వినీవరణదస్సావీ, న సో ఘోసేన వుయ్హతీ’’తి. పఞ్చమం;