౭. సుప్పవాసాసుత్తం

౫౭. ఏకం సమయం భగవా కోలియేసు విహరతి పజ్జనికం [సజ్జనేలం (సీ. పీ.), పజ్జనేలం (స్యా. కం.)] నామ కోలియానం నిగమో. అథ ఖో భగవా పుబ్బణ్హసమయం నివాసేత్వా పత్తచీవరమాదాయ యేన సుప్పవాసాయ కోలియధీతుయా నివేసనం తేనుపసఙ్కమి; ఉపసఙ్కమిత్వా పఞ్ఞత్తే ఆసనే నిసీది. అథ ఖో సుప్పవాసా కోలియధీతా భగవన్తం పణీతేన ఖాదనీయేన భోజనీయేన సహత్థా సన్తప్పేసి సమ్పవారేసి. అథ ఖో సుప్పవాసా కోలియధీతా భగవన్తం భుత్తావిం ఓనీతపత్తపాణిం ఏకమన్తం నిసీది. ఏకమన్తం నిసిన్నం ఖో సుప్పవాసం కోలియధీతరం భగవా ఏతదవోచ –

‘‘భోజనం, సుప్పవాసే, దేన్తీ అరియసావికా పటిగ్గాహకానం చత్తారి ఠానాని దేతి. కతమాని చత్తారి? ఆయుం దేతి, వణ్ణం దేతి, సుఖం దేతి, బలం దేతి. ఆయుం ఖో పన దత్వా ఆయుస్స భాగినీ హోతి దిబ్బస్స వా మానుసస్స వా. వణ్ణం దత్వా వణ్ణస్స భాగినీ హోతి దిబ్బస్స వా మానుసస్స వా. సుఖం దత్వా సుఖస్స భాగినీ హోతి దిబ్బస్స వా మానుసస్స వా. బలం దత్వా బలస్స భాగినీ హోతి దిబ్బస్స వా మానుసస్స వా. భోజనం, సుప్పవాసే, దేన్తీ అరియసావికా పటిగ్గాహకానం ఇమాని చత్తారి ఠానాని దేతీ’’తి.

‘‘సుసఙ్ఖతం భోజనం యా దదాతి,

సుచిం పణీతం [సుపణీతం (క.)] రససా ఉపేతం;

సా దక్ఖిణా ఉజ్జుగతేసు దిన్నా,

చరణూపపన్నేసు మహగ్గతేసు;

పుఞ్ఞేన పుఞ్ఞం సంసన్దమానా,

మహప్ఫలా లోకవిదూన వణ్ణితా.

‘‘ఏతాదిసం యఞ్ఞమనుస్సరన్తా,

యే వేదజాతా విచరన్తి లోకే;

వినేయ్య మచ్ఛేరమలం సమూలం,

అనిన్దితా సగ్గముపేన్తి ఠాన’’న్తి. సత్తమం;