౪. దుతియసంవాససుత్తం

౫౪. ‘‘చత్తారోమే, భిక్ఖవే, సంవాసా. కతమే చత్తారో? ఛవో ఛవాయ సద్ధిం సంవసతి, ఛవో దేవియా సద్ధిం సంవసతి, దేవో ఛవాయ సద్ధిం సంవసతి, దేవో దేవియా సద్ధిం సంవసతి.

‘‘కథఞ్చ, భిక్ఖవే, ఛవో ఛవాయ సద్ధిం సంవసతి. ఇధ, భిక్ఖవే, సామికో హోతి పాణాతిపాతీ అదిన్నాదాయీ కామేసుమిచ్ఛాచారీ ముసావాదీ పిసుణవాచో ఫరుసవాచో సమ్ఫప్పలాపీ అభిజ్ఝాలు బ్యాపన్నచిత్తో మిచ్ఛాదిట్ఠికో దుస్సీలో పాపధమ్మో మచ్ఛేరమలపరియుట్ఠితేన చేతసా అగారం అజ్ఝావసతి అక్కోసకపరిభాసకో సమణబ్రాహ్మణానం; భరియాపిస్స హోతి పాణాతిపాతినీ అదిన్నాదాయినీ కామేసుమిచ్ఛాచారినీ ముసావాదినీ పిసుణవాచా ఫరుసవాచా సమ్ఫప్పలాపినీ అభిజ్ఝాలునీ బ్యాపన్నచిత్తా మిచ్ఛాదిట్ఠికా దుస్సీలా పాపధమ్మా మచ్ఛేరమలపరియుట్ఠితేన చేతసా అగారం అజ్ఝావసతి అక్కోసికపరిభాసికా సమణబ్రాహ్మణానం. ఏవం ఖో, భిక్ఖవే, ఛవో ఛవాయ సద్ధిం సంవసతి.

‘‘కథఞ్చ, భిక్ఖవే, ఛవో దేవియా సద్ధిం సంవసతి? ఇధ, భిక్ఖవే, సామికో హోతి పాణాతిపాతీ…పే… మిచ్ఛాదిట్ఠికో దుస్సీలో పాపధమ్మో మచ్ఛేరమలపరియుట్ఠితేన చేతసా అగారం అజ్ఝావసతి అక్కోసకపరిభాసకో సమణబ్రాహ్మణానం; భరియా ఖ్వస్స హోతి పాణాతిపాతా పటివిరతా అదిన్నాదానా పటివిరతా కామేసుమిచ్ఛాచారా పటివిరతా ముసావాదా పటివిరతా పిసుణాయ వాచాయ పటివిరతా ఫరుసాయ వాచాయ పటివిరతా సమ్ఫప్పలాపా పటివిరతా అనభిజ్ఝాలునీ అబ్యాపన్నచిత్తా సమ్మాదిట్ఠికా సీలవతీ కల్యాణధమ్మా విగతమలమచ్ఛేరేన చేతసా అగారం అజ్ఝావసతి అనక్కోసికపరిభాసికా సమణబ్రాహ్మణానం. ఏవం ఖో, భిక్ఖవే, ఛవో దేవియా సద్ధిం సంవసతి.

‘‘కథఞ్చ, భిక్ఖవే, దేవో ఛవాయ సద్ధిం సంవసతి? ఇధ, భిక్ఖవే, సామికో హోతి పాణాతిపాతా పటివిరతో అదిన్నాదానా పటివిరతో కామేసుమిచ్ఛాచారా పటివిరతో ముసావాదా పటివిరతో పిసుణాయ వాచాయ పటివిరతో ఫరుసాయ వాచాయ పటివిరతో సమ్ఫప్పలాపా పటివిరతో అనభిజ్ఝాలు అబ్యాపన్నచిత్తో సమ్మాదిట్ఠికో సీలవా కల్యాణధమ్మో విగతమలమచ్ఛేరేన చేతసా అగారం అజ్ఝావసతి అనక్కోసకపరిభాసకో సమణబ్రాహ్మణానం; భరియా ఖ్వస్స హోతి పాణాతిపాతినీ…పే… మిచ్ఛాదిట్ఠికా దుస్సీలా పాపధమ్మా మచ్ఛేరమలపరియుట్ఠితేన చేతసా అగారం అజ్ఝావసతి అక్కోసికపరిభాసికా సమణబ్రాహ్మణానం. ఏవం ఖో, భిక్ఖవే, దేవో ఛవాయ సద్ధిం సంవసతి.

‘‘కథఞ్చ, భిక్ఖవే, దేవో దేవియా సద్ధిం సంవసతి? ఇధ, భిక్ఖవే, సామికో హోతి పాణాతిపాతా పటివిరతో…పే… సమ్మాదిట్ఠికో సీలవా కల్యాణధమ్మో విగతమలమచ్ఛేరేన చేతసా అగారం అజ్ఝావసతి అనక్కోసకపరిభాసకో సమణబ్రాహ్మణానం; భరియాపిస్స హోతి పాణాతిపాతా పటివిరతా…పే… సమ్మాదిట్ఠికా సీలవతీ కల్యాణధమ్మా విగతమలమచ్ఛేరేన చేతసా అగారం అజ్ఝావసతి అనక్కోసికపరిభాసికా సమణబ్రాహ్మణానం. ఏవం ఖో, భిక్ఖవే, దేవో దేవియా సద్ధిం సంవసతి. ఇమే ఖో, భిక్ఖవే, చత్తారో సంవాసా’’తి.

‘‘ఉభో చ హోన్తి దుస్సీలా, కదరియా పరిభాసకా;

తే హోన్తి జానిపతయో, ఛవా సంవాసమాగతా.

‘‘సామికో హోతి దుస్సీలో, కదరియో పరిభాసకో;

భరియా సీలవతీ హోతి, వదఞ్ఞూ వీతమచ్ఛరా;

సాపి దేవీ సంవసతి, ఛవేన పతినా సహ.

‘‘సామికో సీలవా హోతి, వదఞ్ఞూ వీతమచ్ఛరో;

భరియా హోతి దుస్సీలా, కదరియా పరిభాసికా;

సాపి ఛవా సంవసతి, దేవేన పతినా సహ.

‘‘ఉభో సద్ధా వదఞ్ఞూ చ, సఞ్ఞతా ధమ్మజీవినో;

తే హోన్తి జానిపతయో, అఞ్ఞమఞ్ఞం పియంవదా.

‘‘అత్థాసం పచురా హోన్తి, ఫాసుకం ఉపజాయతి;

అమిత్తా దుమ్మనా హోన్తి, ఉభిన్నం సమసీలినం.

‘‘ఇధ ధమ్మం చరిత్వాన, సమసీలబ్బతా ఉభో;

నన్దినో దేవలోకస్మిం, మోదన్తి కామకామినో’’తి. చతుత్థం;