౮. బ్యాపన్నసుత్తం

౧౧౧. ఏకమన్తం నిసిన్నం ఖో అనాథపిణ్డికం గహపతిం భగవా ఏతదవోచ – ‘‘చిత్తే, గహపతి, బ్యాపన్నే కాయకమ్మమ్పి బ్యాపన్నం హోతి, వచీకమ్మమ్పి బ్యాపన్నం హోతి, మనోకమ్మమ్పి బ్యాపన్నం హోతి. తస్స బ్యాపన్నకాయకమ్మన్తస్స బ్యాపన్నవచీకమ్మన్తస్స బ్యాపన్నమనోకమ్మన్తస్స న భద్దకం మరణం హోతి, న భద్దికా కాలఙ్కిరియా. సేయ్యథాపి, గహపతి, కూటాగారే దుచ్ఛన్నే కూటమ్పి బ్యాపన్నం హోతి, గోపానసియోపి బ్యాపన్నా హోన్తి, భిత్తిపి బ్యాపన్నా హోతి; ఏవమేవం ఖో, గహపతి, చిత్తే బ్యాపన్నే కాయకమ్మమ్పి బ్యాపన్నం హోతి, వచీకమ్మమ్పి బ్యాపన్నం హోతి, మనోకమ్మమ్పి బ్యాపన్నం హోతి. తస్స బ్యాపన్నకాయకమ్మన్తస్స బ్యాపన్నవచీకమ్మన్తస్స బ్యాపన్నమనోకమ్మన్తస్స న భద్దకం మరణం హోతి, న భద్దికా కాలఙ్కిరియా.

‘‘చిత్తే, గహపతి, అబ్యాపన్నే కాయకమ్మమ్పి అబ్యాపన్నం హోతి, వచీకమ్మమ్పి అబ్యాపన్నం హోతి, మనోకమ్మమ్పి అబ్యాపన్నం హోతి. తస్స అబ్యాపన్నకాయకమ్మన్తస్స అబ్యాపన్నవచీకమ్మన్తస్స అబ్యాపన్నమనోకమ్మన్తస్స భద్దకం మరణం హోతి, భద్దికా కాలఙ్కిరియా. సేయ్యథాపి, గహపతి, కూటాగారే సుచ్ఛన్నే కూటమ్పి అబ్యాపన్నం హోతి, గోపానసియోపి అబ్యాపన్నా హోన్తి, భిత్తిపి అబ్యాపన్నా హోతి; ఏవమేవం ఖో, గహపతి, చిత్తే అబ్యాపన్నే కాయకమ్మమ్పి అబ్యాపన్నం హోతి, వచీకమ్మమ్పి అబ్యాపన్నం హోతి, మనోకమ్మమ్పి అబ్యాపన్నం హోతి. తస్స అబ్యాపన్నకాయకమ్మన్తస్స…పే… అబ్యాపన్నమనోకమ్మన్తస్స భద్దకం మరణం హోతి, భద్దికా కాలఙ్కిరియా’’తి. అట్ఠమం.