౮. పోత్థకసుత్తం

౧౦౦. ‘‘నవోపి, భిక్ఖవే, పోత్థకో దుబ్బణ్ణో చ హోతి దుక్ఖసమ్ఫస్సో చ అప్పగ్ఘో చ; మజ్ఝిమోపి, భిక్ఖవే, పోత్థకో దుబ్బణ్ణో చ హోతి దుక్ఖసమ్ఫస్సో చ అప్పగ్ఘో చ; జిణ్ణోపి, భిక్ఖవే, పోత్థకో దుబ్బణ్ణో చ హోతి దుక్ఖసమ్ఫస్సో చ అప్పగ్ఘో చ. జిణ్ణమ్పి, భిక్ఖవే, పోత్థకం ఉక్ఖలిపరిమజ్జనం వా కరోన్తి సఙ్కారకూటే వా నం [తం (సీ.), ఠానే (క.)] ఛడ్డేన్తి.

‘‘ఏవమేవం ఖో, భిక్ఖవే, నవో చేపి భిక్ఖు హోతి దుస్సీలో పాపధమ్మో. ఇదమస్స దుబ్బణ్ణతాయ వదామి. సేయ్యథాపి సో, భిక్ఖవే, పోత్థకో దుబ్బణ్ణో తథూపమాహం, భిక్ఖవే, ఇమం పుగ్గలం వదామి. యే ఖో పనస్స సేవన్తి భజన్తి పయిరుపాసన్తి దిట్ఠానుగతిం ఆపజ్జన్తి, తేసం తం హోతి దీఘరత్తం అహితాయ దుక్ఖాయ. ఇదమస్స దుక్ఖసమ్ఫస్సతాయ వదామి. సేయ్యథాపి సో, భిక్ఖవే, పోత్థకో దుక్ఖసమ్ఫస్సో తథూపమాహం, భిక్ఖవే, ఇమం పుగ్గలం వదామి. యేసం ఖో పన సో [యేసం ఖో పన (సీ. స్యా. కం. పీ.), యేసం సో (క.) పు. ప. ౧౧౬ పస్సితబ్బం] పటిగ్గణ్హాతి చీవరపిణ్డపాతసేనాసనగిలానప్పచ్చయభేసజ్జపరిక్ఖారం, తేసం తం న మహప్ఫలం హోతి న మహానిసంసం. ఇదమస్స అప్పగ్ఘతాయ వదామి. సేయ్యథాపి సో, భిక్ఖవే, పోత్థకో అప్పగ్ఘో తథూపమాహం, భిక్ఖవే, ఇమం పుగ్గలం వదామి. మజ్ఝిమో చేపి, భిక్ఖవే, భిక్ఖు హోతి…పే… థేరో చేపి, భిక్ఖవే, భిక్ఖు హోతి దుస్సీలో పాపధమ్మో, ఇదమస్స దుబ్బణ్ణతాయ వదామి. సేయ్యథాపి సో, భిక్ఖవే, పోత్థకో దుబ్బణ్ణో తథూపమాహం, భిక్ఖవే, ఇమం పుగ్గలం వదామి. యే ఖో పనస్స సేవన్తి భజన్తి పయిరుపాసన్తి దిట్ఠానుగతిం ఆపజ్జన్తి, తేసం తం హోతి దీఘరత్తం అహితాయ దుక్ఖాయ. ఇదమస్స దుక్ఖసమ్ఫస్సతాయ వదామి. సేయ్యథాపి సో, భిక్ఖవే, పోత్థకో దుక్ఖసమ్ఫస్సో తథూపమాహం, భిక్ఖవే, ఇమం పుగ్గలం వదామి. యేసం ఖో పన సో పటిగ్గణ్హాతి చీవరపిణ్డపాతసేనాసనగిలానప్పచ్చయభేసజ్జపరిక్ఖారం, తేసం తం న మహప్ఫలం హోతి న మహానిసంసం. ఇదమస్స అప్పగ్ఘతాయ వదామి. సేయ్యథాపి సో, భిక్ఖవే, పోత్థకో అప్పగ్ఘో తథూపమాహం, భిక్ఖవే, ఇమం పుగ్గలం వదామి.

‘‘ఏవరూపో చాయం, భిక్ఖవే, థేరో భిక్ఖు సఙ్ఘమజ్ఝే భణతి. తమేనం భిక్ఖూ ఏవమాహంసు – ‘కిం ను ఖో తుయ్హం బాలస్స అబ్యత్తస్స భణితేన, త్వమ్పి నామ భణితబ్బం మఞ్ఞసీ’తి! సో కుపితో అనత్తమనో తథారూపిం వాచం నిచ్ఛారేతి యథారూపాయ వాచాయ సఙ్ఘో తం ఉక్ఖిపతి, సఙ్కారకూటేవ నం పోత్థకం.

‘‘నవమ్పి, భిక్ఖవే, కాసికం వత్థం వణ్ణవన్తఞ్చేవ హోతి సుఖసమ్ఫస్సఞ్చ మహగ్ఘఞ్చ; మజ్ఝిమమ్పి, భిక్ఖవే, కాసికం వత్థం వణ్ణవన్తఞ్చేవ హోతి సుఖసమ్ఫస్సఞ్చ మహగ్ఘఞ్చ; జిణ్ణమ్పి, భిక్ఖవే, కాసికం వత్థం వణ్ణవన్తఞ్చేవ హోతి సుఖసమ్ఫస్సఞ్చ మహగ్ఘఞ్చ. జిణ్ణమ్పి, భిక్ఖవే, కాసికం వత్థం రతనపలివేఠనం వా కరోతి గన్ధకరణ్డకే వా నం పక్ఖిపన్తి.

‘‘ఏవమేవం ఖో, భిక్ఖవే, నవో చేపి భిక్ఖు హోతి సీలవా కల్యాణధమ్మో, ఇదమస్స సువణ్ణతాయ వదామి. సేయ్యథాపి తం, భిక్ఖవే, కాసికం వత్థం వణ్ణవన్తం తథూపమాహం, భిక్ఖవే, ఇమం పుగ్గలం వదామి. యే ఖో పనస్స సేవన్తి భజన్తి పయిరుపాసన్తి దిట్ఠానుగతిం ఆపజ్జన్తి, తేసం తం హోతి దీఘరత్తం హితాయ సుఖాయ. ఇదమస్స సుఖసమ్ఫస్సతాయ వదామి. సేయ్యథాపి తం, భిక్ఖవే, కాసికం వత్థం సుఖసమ్ఫస్సం తథూపమాహం, భిక్ఖవే, ఇమం పుగ్గలం వదామి. యేసం ఖో పన సో పటిగ్గణ్హాతి చీవరపిణ్డపాతసేనాసనగిలానప్పచ్చయభేసజ్జపరిక్ఖారం, తేసం తం మహప్ఫలం హోతి మహానిసంసం. ఇదమస్స మహగ్ఘతాయ వదామి. సేయ్యథాపి తం, భిక్ఖవే, కాసికం వత్థం మహగ్ఘం తథూపమాహం, భిక్ఖవే, ఇమం పుగ్గలం వదామి. మజ్ఝిమో చేపి, భిక్ఖవే, భిక్ఖు హోతి…పే… థేరో చేపి, భిక్ఖవే, భిక్ఖు హోతి…పే… పుగ్గలం వదామి.

‘‘ఏవరూపో చాయం, భిక్ఖవే, థేరో భిక్ఖు సఙ్ఘమజ్ఝే భణతి. తమేనం భిక్ఖూ ఏవమాహంసు – ‘అప్పసద్దా ఆయస్మన్తో హోథ, థేరో భిక్ఖు ధమ్మఞ్చ వినయఞ్చ భణతీ’తి. తస్మాతిహ, భిక్ఖవే, ఏవం సిక్ఖితబ్బం – ‘కాసికవత్థూపమా భవిస్సామ, న పోత్థకూపమా’తి [కాసికం వత్థం తథూపమాహం భవిస్సామి, న పోత్థకూపమాహన్తి (క.)]. ఏవఞ్హి వో, భిక్ఖవే, సిక్ఖితబ్బ’’న్తి. అట్ఠమం.