౨. పవివేకసుత్తం

౯౪. ‘‘తీణిమాని, భిక్ఖవే, అఞ్ఞతిత్థియా పరిబ్బాజకా పవివేకాని పఞ్ఞాపేన్తి. కతమాని తీణి? చీవరపవివేకం, పిణ్డపాతపవివేకం, సేనాసనపవివేకం.

‘‘తత్రిదం, భిక్ఖవే, అఞ్ఞతిత్థియా పరిబ్బాజకా చీవరపవివేకస్మిం పఞ్ఞాపేన్తి, సాణానిపి ధారేన్తి, మసాణానిపి ధారేన్తి, ఛవదుస్సానిపి ధారేన్తి, పంసుకూలానిపి ధారేన్తి, తిరీటానిపి ధారేన్తి, అజినమ్పి ధారేన్తి, అజినక్ఖిపమ్పి ధారేన్తి, కుసచీరమ్పి ధారేన్తి, వాకచీరమ్పి ధారేన్తి, ఫలకచీరమ్పి ధారేన్తి, కేసకమ్బలమ్పి ధారేన్తి, వాలకమ్బలమ్పి ధారేన్తి, ఉలూకపక్ఖికమ్పి ధారేన్తి. ఇదం ఖో, భిక్ఖవే, అఞ్ఞతిత్థియా పరిబ్బాజకా చీవరపవివేకస్మిం పఞ్ఞాపేన్తి.

‘‘తత్రిదం, భిక్ఖవే, అఞ్ఞతిత్థియా పరిబ్బాజకా పిణ్డపాతపవివేకస్మిం పఞ్ఞాపేన్తి. సాకభక్ఖాపి హోన్తి, సామాకభక్ఖాపి హోన్తి, నీవారభక్ఖాపి హోన్తి, దద్దులభక్ఖాపి హోన్తి, హటభక్ఖాపి హోన్తి, కణభక్ఖాపి హోన్తి, ఆచామభక్ఖాపి హోన్తి, పిఞ్ఞాకభక్ఖాపి హోన్తి, తిణభక్ఖాపి హోన్తి, గోమయభక్ఖాపి హోన్తి, వనమూలఫలాహారా యాపేన్తి పవత్తఫలభోజీ. ఇదం ఖో, భిక్ఖవే, అఞ్ఞతిత్థియా పరిబ్బాజకా పిణ్డపాతపవివేకస్మిం పఞ్ఞాపేన్తి.

‘‘తత్రిదం, భిక్ఖవే, అఞ్ఞతిత్థియా పరిబ్బాజకా సేనాసనపవివేకస్మిం పఞ్ఞాపేన్తి అరఞ్ఞం రుక్ఖమూలం సుసానం [రుక్ఖమూలం భుసాగారం సుసానం (క.)] వనపత్థం అబ్భోకాసం పలాలపుఞ్జం భుసాగారం [సుఞ్ఞాగారం (క.)]. ఇదం ఖో, భిక్ఖవే, అఞ్ఞతిత్థియా పరిబ్బాజకా సేనాసనపవివేకస్మిం పఞ్ఞాపేన్తి. ఇమాని ఖో, భిక్ఖవే, తీణి అఞ్ఞతిత్థియా పరిబ్బాజకా పవివేకాని పఞ్ఞాపేన్తి.

‘‘తీణి ఖో పనిమాని, భిక్ఖవే, ఇమస్మిం ధమ్మవినయే భిక్ఖునో పవివేకాని. కతమాని తీణి? ఇధ, భిక్ఖవే, భిక్ఖు సీలవా చ హోతి, దుస్సీల్యఞ్చస్స పహీనం హోతి, తేన చ వివిత్తో హోతి; సమ్మాదిట్ఠికో చ హోతి, మిచ్ఛాదిట్ఠి చస్స పహీనా హోతి, తాయ చ వివిత్తో హోతి; ఖీణాసవో చ హోతి, ఆసవా చస్స పహీనా హోన్తి, తేహి చ వివిత్తో హోతి. యతో ఖో, భిక్ఖవే, భిక్ఖు సీలవా హోతి, దుస్సీల్యఞ్చస్స పహీనం హోతి, తేన చ వివిత్తో హోతి; సమ్మాదిట్ఠికో చ హోతి, మిచ్ఛాదిట్ఠి చస్స పహీనా హోతి, తాయ చ వివిత్తో హోతి; ఖీణాసవో చ హోతి, ఆసవా చస్స పహీనా హోన్తి, తేహి చ వివిత్తో హోతి. అయం వుచ్చతి, భిక్ఖవే, ‘భిక్ఖు అగ్గప్పత్తో సారప్పత్తో సుద్ధో సారే పతిట్ఠితో’’’.

‘‘సేయ్యథాపి, భిక్ఖవే, కస్సకస్స గహపతిస్స సమ్పన్నం సాలిక్ఖేత్తం. తమేనం కస్సకో గహపతి సీఘం సీఘం [సీఘసీఘం (సీ. స్యా. కం. పీ.)] లవాపేయ్య. సీఘం సీఘం లవాపేత్వా సీఘం సీఘం సఙ్ఘరాపేయ్య. సీఘం సీఘం సఙ్ఘరాపేత్వా సీఘం సీఘం ఉబ్బహాపేయ్య [ఉబ్బాహాపేయ్య (స్యా. కం.)]. సీఘం సీఘం ఉబ్బహాపేత్వా సీఘం సీఘం పుఞ్జం కారాపేయ్య. సీఘం సీఘం పుఞ్జం కారాపేత్వా సీఘం సీఘం మద్దాపేయ్య. సీఘం సీఘం మద్దాపేత్వా సీఘం సీఘం పలాలాని ఉద్ధరాపేయ్య. సీఘం సీఘం పలాలాని ఉద్ధరాపేత్వా సీఘం సీఘం భుసికం ఉద్ధరాపేయ్య. సీఘం సీఘం భుసికం ఉద్ధరాపేత్వా సీఘం సీఘం ఓపునాపేయ్య. సీఘం సీఘం ఓపునాపేత్వా సీఘం సీఘం అతిహరాపేయ్య. సీఘం సీఘం అతిహరాపేత్వా సీఘం సీఘం కోట్టాపేయ్య. సీఘం సీఘం కోట్టాపేత్వా సీఘం సీఘం థుసాని ఉద్ధరాపేయ్య. ఏవమస్సు [ఏవస్సు (క.)] తాని, భిక్ఖవే, కస్సకస్స గహపతిస్స ధఞ్ఞాని అగ్గప్పత్తాని సారప్పత్తాని సుద్ధాని సారే పతిట్ఠితాని.

‘‘ఏవమేవం ఖో, భిక్ఖవే, యతో భిక్ఖు సీలవా చ హోతి, దుస్సీల్యఞ్చస్స పహీనం హోతి, తేన చ వివిత్తో హోతి; సమ్మాదిట్ఠికో చ హోతి, మిచ్ఛాదిట్ఠి చస్స పహీనా హోతి, తాయ చ వివిత్తో హోతి; ఖీణాసవో చ హోతి, ఆసవా చస్స పహీనా హోన్తి, తేహి చ వివిత్తో హోతి. అయం వుచ్చతి, భిక్ఖవే, ‘భిక్ఖు అగ్గప్పత్తో సారప్పత్తో సుద్ధో సారే పతిట్ఠితో’’’తి. దుతియం.