౧. అచ్చాయికసుత్తం

౯౩. ‘‘తీణిమాని, భిక్ఖవే, కస్సకస్స గహపతిస్స అచ్చాయికాని కరణీయాని. కతమాని తీణి? ఇధ, భిక్ఖవే, కస్సకో గహపతి సీఘం సీఘం ఖేత్తం సుకట్ఠం కరోతి సుమతికతం. సీఘం సీఘం ఖేత్తం సుకట్ఠం కరిత్వా సుమతికతం సీఘం సీఘం బీజాని పతిట్ఠాపేతి. సీఘం సీఘం బీజాని పతిట్ఠాపేత్వా సీఘం సీఘం ఉదకం అభినేతిపి అపనేతిపి. ఇమాని ఖో, భిక్ఖవే, తీణి కస్సకస్స గహపతిస్స అచ్చాయికాని కరణీయాని. తస్స ఖో తం, భిక్ఖవే, కస్సకస్స గహపతిస్స నత్థి సా ఇద్ధి వా ఆనుభావో వా – ‘అజ్జేవ మే ధఞ్ఞాని జాయన్తు, స్వేవ గబ్భీని హోన్తు, ఉత్తరస్వేవ పచ్చన్తూ’తి. అథ ఖో, భిక్ఖవే, హోతి సో సమయో యం తస్స కస్సకస్స గహపతిస్స తాని ధఞ్ఞాని ఉతుపరిణామీని జాయన్తిపి గబ్భీనిపి హోన్తి పచ్చన్తిపి.

‘‘ఏవమేవం ఖో, భిక్ఖవే, తీణిమాని భిక్ఖుస్స అచ్చాయికాని కరణీయాని. కతమాని తీణి? అధిసీలసిక్ఖాసమాదానం, అధిచిత్తసిక్ఖాసమాదానం, అధిపఞ్ఞాసిక్ఖాసమాదానం – ఇమాని ఖో, భిక్ఖవే, తీణి భిక్ఖుస్స అచ్చాయికాని కరణీయాని. తస్స ఖో తం, భిక్ఖవే, భిక్ఖునో నత్థి సా ఇద్ధి వా అనుభావో వా – ‘అజ్జేవ మే అనుపాదాయ ఆసవేహి చిత్తం విముచ్చతు స్వే వా ఉత్తరస్వే వా’తి. అథ ఖో, భిక్ఖవే, హోతి సో సమయో యం తస్స భిక్ఖునో అధిసీలమ్పి సిక్ఖతో అధిచిత్తమ్పి సిక్ఖతో అధిపఞ్ఞమ్పి సిక్ఖతో అనుపాదాయ ఆసవేహి చిత్తం విముచ్చతి.

‘‘తస్మాతిహ, భిక్ఖవే, ఏవం సిక్ఖితబ్బం – ‘తిబ్బో నో ఛన్దో భవిస్సతి అధిసీలసిక్ఖాసమాదానే, తిబ్బో ఛన్దో భవిస్సతి అధిచిత్తసిక్ఖాసమాదానే, తిబ్బో ఛన్దో భవిస్సతి అధిపఞ్ఞాసిక్ఖాసమాదానే’తి. ఏవఞ్హి వో, భిక్ఖవే, సిక్ఖితబ్బ’’న్తి. పఠమం.