౧. సమణసుత్తం

౮౨. ‘‘తీణిమాని, భిక్ఖవే, సమణస్స సమణియాని సమణకరణీయాని. కతమాని తీణి? అధిసీలసిక్ఖాసమాదానం, అధిచిత్తసిక్ఖాసమాదానం, అధిపఞ్ఞాసిక్ఖాసమాదానం – ఇమాని ఖో, భిక్ఖవే, తీణి సమణస్స సమణియాని సమణకరణీయాని.

‘‘తస్మాతిహ, భిక్ఖవే, ఏవం సిక్ఖితబ్బం – ‘తిబ్బో నో ఛన్దో భవిస్సతి అధిసీలసిక్ఖాసమాదానే, తిబ్బో నో ఛన్దో భవిస్సతి అధిచిత్తసిక్ఖాసమాదానే, తిబ్బో నో ఛన్దో భవిస్సతి అధిపఞ్ఞాసిక్ఖాసమాదానే’తి. ఏవఞ్హి వో, భిక్ఖవే, సిక్ఖితబ్బ’’న్తి. పఠమం.