౭. దుతియభవసుత్తం

౭౮. అథ ఖో ఆయస్మా ఆనన్దో యేన భగవా తేనుపసఙ్కమి…పే… ఆయస్మా ఆనన్దో భగవన్తం ఏతదవోచ – ‘‘భవో, భవోతి, భన్తే, వుచ్చతి. కిత్తావతా ను ఖో, భన్తే, భవో హోతీ’’తి?

‘‘కామధాతువేపక్కఞ్చ, ఆనన్ద, కమ్మం నాభవిస్స, అపి ను ఖో కామభవో పఞ్ఞాయేథా’’తి? ‘‘నో హేతం భన్తే’’. ‘‘ఇతి ఖో, ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో. అవిజ్జానీవరణానం సత్తానం తణ్హాసంయోజనానం హీనాయ ధాతుయా చేతనా పతిట్ఠితా పత్థనా పతిట్ఠితా ఏవం ఆయతిం పునబ్భవాభినిబ్బత్తి హోతి’’.

‘‘రూపధాతువేపక్కఞ్చ, ఆనన్ద, కమ్మం నాభవిస్స, అపి ను ఖో రూపభవో పఞ్ఞాయేథా’’తి? ‘‘నో హేతం, భన్తే’’. ‘‘ఇతి ఖో, ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో. అవిజ్జానీవరణానం సత్తానం తణ్హాసంయోజనానం మజ్ఝిమాయ ధాతుయా చేతనా పతిట్ఠితా పత్థనా పతిట్ఠితా ఏవం ఆయతిం పునబ్భవాభినిబ్బత్తి హోతి’’.

‘‘అరూపధాతువేపక్కఞ్చ, ఆనన్ద, కమ్మం నాభవిస్స, అపి ను ఖో అరూపభవో పఞ్ఞాయేథా’’తి? ‘‘నో హేతం, భన్తే’’. ‘‘ఇతి ఖో, ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో. అవిజ్జానీవరణానం సత్తానం తణ్హాసంయోజనానం పణీతాయ ధాతుయా చేతనా పతిట్ఠితా పత్థనా పతిట్ఠితా ఏవం ఆయతిం పునబ్భవాభినిబ్బత్తి హోతి. ఏవం ఖో, ఆనన్ద, భవో హోతీ’’తి. సత్తమం.