౮. సీలబ్బతసుత్తం

౭౯. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం ఆనన్దం భగవా ఏతదవోచ – ‘‘సబ్బం ను ఖో, ఆనన్ద, సీలబ్బతం జీవితం బ్రహ్మచరియం ఉపట్ఠానసారం సఫల’’న్తి? ‘‘న ఖ్వేత్థ, భన్తే, ఏకంసేనా’’తి. ‘‘తేన హానన్ద, విభజస్సూ’’తి.

‘‘యఞ్హిస్స [యథారూపం హిస్స (?) సేవితబ్బాసేవితబ్బసుత్తానురూపం], భన్తే, సీలబ్బతం జీవితం బ్రహ్మచరియం ఉపట్ఠానసారం సేవతో అకుసలా ధమ్మా అభివడ్ఢన్తి కుసలా ధమ్మా పరిహాయన్తి, ఏవరూపం సీలబ్బతం జీవితం బ్రహ్మచరియం ఉపట్ఠానసారం అఫలం. యఞ్చ ఖ్వాస్స [యఞ్హిస్స (క.), యథారూపఞ్చ ఖ్వాస్స (?)], భన్తే, సీలబ్బతం జీవితం బ్రహ్మచరియం ఉపట్ఠానసారం సేవతో అకుసలా ధమ్మా పరిహాయన్తి, కుసలా ధమ్మా అభివడ్ఢన్తి, ఏవరూపం సీలబ్బతం జీవితం బ్రహ్మచరియం ఉపట్ఠానసారం సఫల’’న్తి. ఇదమవోచ ఆయస్మా ఆనన్దో; సమనుఞ్ఞో సత్థా అహోసి.

అథ ఖో ఆయస్మా ఆనన్దో ‘‘సమనుఞ్ఞో మే సత్థా’’తి, ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కామి. అథ ఖో భగవా అచిరపక్కన్తే ఆయస్మన్తే ఆనన్దే భిక్ఖూ ఆమన్తేసి – ‘‘సేఖో, భిక్ఖవే, ఆనన్దో; న చ పనస్స సులభరూపో సమసమో పఞ్ఞాయా’’తి. అట్ఠమం.