౬. పఠమభవసుత్తం

౭౭. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా ఆనన్దో భగవన్తం ఏతదవోచ – ‘‘భవో, భవోతి, భన్తే, వుచ్చతి. కిత్తావతా ను ఖో, భన్తే, భవో హోతీ’’తి?

‘‘కామధాతువేపక్కఞ్చ, ఆనన్ద, కమ్మం నాభవిస్స, అపి ను ఖో కామభవో పఞ్ఞాయేథా’’తి? ‘‘నో హేతం, భన్తే’’. ‘‘ఇతి ఖో, ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో [సినేహో (సీ. స్యా. కం. పీ.)]. అవిజ్జానీవరణానం సత్తానం తణ్హాసంయోజనానం హీనాయ ధాతుయా విఞ్ఞాణం పతిట్ఠితం ఏవం ఆయతిం [ఆయతి (సీ.)] పునబ్భవాభినిబ్బత్తి హోతి. ( ) [(ఏవం ఖో ఆనన్ద భవో హోతీతి) (క.) దుతియసుత్తే పన ఇదం పాఠనానత్తం నత్థి]

‘‘రూపధాతువేపక్కఞ్చ, ఆనన్ద, కమ్మం నాభవిస్స, అపి ను ఖో రూపభవో పఞ్ఞాయేథా’’తి? ‘‘నో హేతం, భన్తే’’. ‘‘ఇతి ఖో ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో. అవిజ్జానీవరణానం సత్తానం తణ్హాసంయోజనానం మజ్ఝిమాయ ధాతుయా విఞ్ఞాణం పతిట్ఠితం ఏవం ఆయతిం పునబ్భవాభినిబ్బత్తి హోతి. ( ) [(ఏవం ఖో ఆనన్ద భవో హోతీతి) (క.) దుతియసుత్తే పన ఇదం పాఠనానత్తం నత్థి]

‘‘అరూపధాతువేపక్కఞ్చ, ఆనన్ద, కమ్మం నాభవిస్స, అపి ను ఖో అరూపభవో పఞ్ఞాయేథా’’తి? ‘‘నో హేతం, భన్తే’’. ‘‘ఇతి ఖో, ఆనన్ద, కమ్మం ఖేత్తం, విఞ్ఞాణం బీజం, తణ్హా స్నేహో. అవిజ్జానీవరణానం సత్తానం తణ్హాసంయోజనానం పణీతాయ ధాతుయా విఞ్ఞాణం పతిట్ఠితం ఏవం ఆయతిం పునబ్భవాభినిబ్బత్తి హోతి. ఏవం ఖో, ఆనన్ద, భవో హోతీ’’తి. ఛట్ఠం.