౫. నివేసకసుత్తం

౭౬. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం ఆనన్దం భగవా ఏతదవోచ –

‘‘యే, ఆనన్ద, అనుకమ్పేయ్యాథ యే చ సోతబ్బం మఞ్ఞేయ్యుం మిత్తా వా అమచ్చా వా ఞాతీ వా సాలోహితా వా తే వో, ఆనన్ద, తీసు ఠానేసు సమాదపేతబ్బా [సమాదాపేతబ్బా (?)] నివేసేతబ్బా పతిట్ఠాపేతబ్బా. కతమేసు తీసు? బుద్ధే అవేచ్చప్పసాదే సమాదపేతబ్బా నివేసేతబ్బా పతిట్ఠాపేతబ్బా – ‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరో పురిసదమ్మసారథి; సత్థా దేవమనుస్సానం, బుద్ధో భగవా’తి, ధమ్మే అవేచ్చప్పసాదే సమాదపేతబ్బా నివేసేతబ్బా పతిట్ఠాపేతబ్బా – ‘స్వాక్ఖాతో భగవతా ధమ్మో సన్దిట్ఠికో అకాలికో ఏహిపస్సికో ఓపనేయ్యికో పచ్చత్తం వేదితబ్బో విఞ్ఞూహీ’తి, సఙ్ఘే అవేచ్చప్పసాదే సమాదపేతబ్బా నివేసేతబ్బా పతిట్ఠాపేతబ్బా – ‘సుప్పటిపన్నో భగవతో సావకసఙ్ఘో ఉజుప్పటిపన్నో భగవతో సావకసఙ్ఘో ఞాయప్పటిపన్నో భగవతో సావకసఙ్ఘో సామీచిప్పటిపన్నో భగవతో సావకసఙ్ఘో, యదిదం చత్తారి పురిసయుగాని అట్ఠ పురిసపుగ్గలా ఏస భగవతో సావకసఙ్ఘో ఆహునేయ్యో పాహునేయ్యో దక్ఖిణేయ్యో అఞ్జలికరణీయో అనుత్తరం పుఞ్ఞక్ఖేత్తం లోకస్సా’’’తి.

‘‘సియా, ఆనన్ద, చతున్నం మహాభూతానం అఞ్ఞథత్తం – పథవీధాతుయా ఆపోధాతుయా తేజోధాతుయా వాయోధాతుయా, న త్వేవ బుద్ధే అవేచ్చప్పసాదేన సమన్నాగతస్స అరియసావకస్స సియా అఞ్ఞథత్తం తత్రిదం అఞ్ఞథత్తం. సో వతానన్ద, బుద్ధే అవేచ్చప్పసాదేన సమన్నాగతో అరియసావకో నిరయం వా తిరచ్ఛానయోనిం వా పేత్తివిసయం వా ఉపపజ్జిస్సతీతి నేతం ఠానం విజ్జతి.

‘‘సియా, ఆనన్ద, చతున్నం మహాభూతానం అఞ్ఞథత్తం – పథవీధాతుయా ఆపోధాతుయా తేజోధాతుయా వాయోధాతుయా, న త్వేవ ధమ్మే…పే… న త్వేవ సఙ్ఘే అవేచ్చప్పసాదేన సమన్నాగతస్స అరియసావకస్స సియా అఞ్ఞథత్తం తత్రిదం అఞ్ఞథత్తం. సో వతానన్ద, సఙ్ఘే అవేచ్చప్పసాదేన సమన్నాగతో అరియసావకో నిరయం వా తిరచ్ఛానయోనిం వా పేత్తివిసయం వా ఉపపజ్జిస్సతీతి నేతం ఠానం విజ్జతి.

‘‘యే, ఆనన్ద, అనుకమ్పేయ్యాథ యే చ సోతబ్బం మఞ్ఞేయ్యుం మిత్తా వా అమచ్చా వా ఞాతీ వా సాలోహితా వా తే వో, ఆనన్ద, ఇమేసు తీసు ఠానేసు సమాదపేతబ్బా నివేసేతబ్బా పతిట్ఠాపేతబ్బా’’తి. పఞ్చమం.