౩. మహానామసక్కసుత్తం

౭౪. ఏవం మే సుతం – ఏకం సమయం భగవా సక్కేసు విహరతి కపిలవత్థుస్మిం నిగ్రోధారామే. తేన ఖో పన సమయేన భగవా గిలానావుట్ఠితో [గిలానవుట్ఠితో (సద్దనీతి)] హోతి అచిరవుట్ఠితో గేలఞ్ఞా. అథ ఖో మహానామో సక్కో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మహానామో సక్కో భగవన్తం ఏతదవోచ – ‘‘దీఘరత్తాహం, భన్తే, భగవతా ఏవం ధమ్మం దేసితం ఆజానామి – ‘సమాహితస్స ఞాణం, నో అసమాహితస్సా’తి. సమాధి ను ఖో, భన్తే, పుబ్బే, పచ్ఛా ఞాణం; ఉదాహు ఞాణం పుబ్బే, పచ్ఛా సమాధీ’’తి? అథ ఖో ఆయస్మతో ఆనన్దస్స ఏతదహోసి – ‘‘భగవా ఖో గిలానవుట్ఠితో అచిరవుట్ఠితో గేలఞ్ఞా. అయఞ్చ మహానామో సక్కో భగవన్తం అతిగమ్భీరం పఞ్హం పుచ్ఛతి. యంనూనాహం మహానామం సక్కం ఏకమన్తం అపనేత్వా ధమ్మం దేసేయ్య’’న్తి.

అథ ఖో ఆయస్మా ఆనన్దో మహానామం సక్కం బాహాయం గహేత్వా ఏకమన్తం అపనేత్వా మహానామం సక్కం ఏతదవోచ – ‘‘సేఖమ్పి ఖో, మహానామ, సీలం వుత్తం భగవతా, అసేఖమ్పి సీలం వుత్తం భగవతా; సేఖోపి సమాధి వుత్తో భగవతా, అసేఖోపి సమాధి వుత్తో భగవతా; సేఖాపి పఞ్ఞా వుత్తా భగవతా, అసేఖాపి పఞ్ఞా వుత్తా భగవతా. కతమఞ్చ, మహానామ, సేఖం సీలం? ఇధ, మహానామ, భిక్ఖు సీలవా హోతి పాతిమోక్ఖసంవరసంవుతో విహరతి…పే… సమాదాయ సిక్ఖతి సిక్ఖాపదేసు. ఇదం వుచ్చతి, మహానామ, సేఖం సీలం’’.

‘‘కతమో చ, మహానామ, సేఖో సమాధి? ఇధ, మహానామ, భిక్ఖు వివిచ్చేవ కామేహి…పే… చతుత్థం ఝానం ఉపసమ్పజ్జ విహరతి. అయం వుచ్చతి, మహానామ, సేఖో సమాధి.

‘‘కతమా చ, మహానామ, సేఖా పఞ్ఞా? ఇధ, మహానామ, భిక్ఖు ఇదం దుక్ఖన్తి యథాభూతం పజానాతి…పే… అయం దుక్ఖనిరోధగామినీ పటిపదాతి యథాభూతం పజానాతి. అయం వుచ్చతి, మహానామ, సేఖా పఞ్ఞా.

‘‘స ఖో సో, మహానామ, అరియసావకో ఏవం సీలసమ్పన్నో ఏవం సమాధిసమ్పన్నో ఏవం పఞ్ఞాసమ్పన్నో ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతి. ఏవం ఖో, మహానామ, సేఖమ్పి సీలం వుత్తం భగవతా, అసేఖమ్పి సీలం వుత్తం భగవతా; సేఖోపి సమాధి వుత్తో భగవతా, అసేఖోపి సమాధి వుత్తో భగవతా; సేఖాపి పఞ్ఞా వుత్తా భగవతా, అసేఖాపి పఞ్ఞా వుత్తా భగవతా’’తి. తతియం.