౧౦. చూళనికాసుత్తం

౮౧. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా ఆనన్దో భగవన్తం ఏతదవోచ – ‘‘సమ్ముఖామేతం, భన్తే, భగవతో సుతం సమ్ముఖా పటిగ్గహితం – ‘భగవతో, ఆనన్ద, సిఖిస్స అభిభూ నామ సావకో బ్రహ్మలోకే ఠితో సహస్సిలోకధాతుం [సహస్సీలోకధాతుం (పీ.) సం. ని. ౧.౧౮౫ విత్థారో] సరేన విఞ్ఞాపేసీ’తి. భగవా పన, భన్తే, అరహం సమ్మాసమ్బుద్ధో కీవతకం పహోతి సరేన విఞ్ఞాపేతు’’న్తి? ‘‘సావకో సో, ఆనన్ద, అప్పమేయ్యా తథాగతా’’తి.

దుతియమ్పి ఖో ఆయస్మా ఆనన్దో భగవన్తం ఏతదవోచ – ‘‘సమ్ముఖా మేతం, భన్తే, భగవతో సుతం సమ్ముఖా పటిగ్గహితం – ‘భగవతో, ఆనన్ద, సిఖిస్స అభిభూ నామ సావకో బ్రహ్మలోకే ఠితో సహస్సిలోకధాతుం సరేన విఞ్ఞాపేసీ’తి. భగవా పన, భన్తే, అరహం సమ్మాసమ్బుద్ధో కీవతకం పహోతి సరేన విఞ్ఞాపేతు’’న్తి? ‘‘సావకో సో, ఆనన్ద, అప్పమేయ్యా తథాగతా’’తి.

తతియమ్పి ఖో ఆయస్మా ఆనన్దో భగవన్తం ఏతదవోచ – ‘‘సమ్ముఖామేతం, భన్తే, భగవతో సుతం సమ్ముఖా పటిగ్గహితం – ‘భగవతో, ఆనన్ద, సిఖిస్స అభిభూ నామ సావకో బ్రహ్మలోకే ఠితో సహస్సిలోకధాతుం సరేన విఞ్ఞాపేసీ’తి. భగవా పన, భన్తే, అరహం సమ్మాసమ్బుద్ధో కీవతకం పహోతి సరేన విఞ్ఞాపేతు’’న్తి? ‘‘సుతా తే, ఆనన్ద, సహస్సీ చూళనికా లోకధాతూ’’తి? ‘‘ఏతస్స, భగవా, కాలో; ఏతస్స, సుగత, కాలో! యం భగవా భాసేయ్య. భగవతో సుత్వా భిక్ఖూ ధారేస్సన్తీ’’తి. ‘‘తేనహానన్ద, సుణాహి సాధుకం మనసి కరోహి, భాసిస్సామీ’’తి. ‘‘ఏవం, భన్తే’’తి ఖో ఆయస్మా ఆనన్దో భగవతో పచ్చస్సోసి. భగవా ఏతదవోచ –

‘‘యావతా, ఆనన్ద, చన్దిమసూరియా [చన్దిమసురియా (సీ. స్యా. కం. పీ.)] పరిహరన్తి, దిసా భన్తి విరోచనా, తావ సహస్సధా లోకో. తస్మిం సహస్సధా లోకే సహస్సం [తస్మిం సహస్సం (స్యా. కం. పీ.)] చన్దానం, సహస్సం సూరియానం, సహస్సం సినేరుపబ్బతరాజానం, సహస్సం జమ్బుదీపానం, సహస్సం అపరగోయానానం, సహస్సం ఉత్తరకురూనం, సహస్సం పుబ్బవిదేహానం, చత్తారి మహాసముద్దసహస్సాని, చత్తారి మహారాజసహస్సాని, సహస్సం చాతుమహారాజికానం, సహస్సం తావతింసానం, సహస్సం యామానం, సహస్సం తుసితానం, సహస్సం నిమ్మానరతీనం, సహస్సం పరనిమ్మితవసవత్తీనం, సహస్సం బ్రహ్మలోకానం – అయం వుచ్చతానన్ద, సహస్సీ చూళనికా లోకధాతు.

‘‘యావతానన్ద, సహస్సీ చూళనికా లోకధాతు తావ సహస్సధా లోకో. అయం వుచ్చతానన్ద, ద్విసహస్సీ మజ్ఝిమికా లోకధాతు.

‘‘యావతానన్ద, ద్విసహస్సీ మజ్ఝిమికా లోకధాతు తావ సహస్సధా లోకో. అయం వుచ్చతానన్ద, తిసహస్సీ మహాసహస్సీ లోకధాతు.

‘‘ఆకఙ్ఖమానో, ఆనన్ద, తథాగతో తిసహస్సిమహాసహస్సిలోకధాతుం [తిసహస్సి మహాసహస్సిం లోకధాతుం (స్యా. కం.), తిసహస్సీమహాసహస్సీలోకధాతుం (పీ.)] సరేన విఞ్ఞాపేయ్య, యావతా పన ఆకఙ్ఖేయ్యా’’తి.

‘‘యథా కథం పన, భన్తే, భగవా తిసహస్సిమహాసహస్సిలోకధాతుం సరేన విఞ్ఞాపేయ్య, యావతా పన ఆకఙ్ఖేయ్యా’’తి? ‘‘ఇధానన్ద, తథాగతో తిసహస్సిమహాసహస్సిలోకధాతుం ఓభాసేన ఫరేయ్య. యదా తే సత్తా తం ఆలోకం సఞ్జానేయ్యుం, అథ తథాగతో ఘోసం కరేయ్య సద్దమనుస్సావేయ్య. ఏవం ఖో, ఆనన్ద, తథాగతో తిసహస్సిమహాసహస్సిలోకధాతుం సరేన విఞ్ఞాపేయ్య, యావతా పన ఆకఙ్ఖేయ్యా’’తి.

ఏవం వుత్తే ఆయస్మా ఆనన్దో (ఆయస్మన్తం ఉదాయిం) [(భగవన్తం) (సీ.), ( ) నత్థి స్యా. కం. పోత్థకేసు. అట్ఠకథాయ సమేతి] ఏతదవోచ – ‘‘లాభా వత మే, సులద్ధం వత మే, యస్స మే సత్థా ఏవంమహిద్ధికో ఏవంమహానుభావో’’తి. ఏవం వుత్తే ఆయస్మా ఉదాయీ ఆయస్మన్తం ఆనన్దం ఏతదవోచ – ‘‘కిం తుయ్హేత్థ, ఆవుసో ఆనన్ద, యది తే సత్థా ఏవంమహిద్ధికో ఏవంమహానుభావో’’తి? ఏవం వుత్తే భగవా ఆయస్మన్తం ఉదాయిం ఏతదవోచ – ‘‘మా హేవం, ఉదాయి, మా హేవం, ఉదాయి. సచే, ఉదాయి, ఆనన్దో అవీతరాగో కాలం కరేయ్య, తేన చిత్తప్పసాదేన సత్తక్ఖత్తుం దేవేసు దేవరజ్జం కారేయ్య, సత్తక్ఖత్తుం ఇమస్మింయేవ జమ్బుదీపే మహారజ్జం కారేయ్య. అపి చ, ఉదాయి, ఆనన్దో దిట్ఠేవ ధమ్మే పరినిబ్బాయిస్సతీ’’తి. దసమం.

ఆనన్దవగ్గో తతియో.