౭. చతుమహారాజసుత్తం

౩౭. ‘‘అట్ఠమియం, భిక్ఖవే, పక్ఖస్స చతున్నం మహారాజానం అమచ్చా పారిసజ్జా ఇమం లోకం అనువిచరన్తి – ‘కచ్చి బహూ మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తీ’తి. చాతుద్దసిం, భిక్ఖవే, పక్ఖస్స చతున్నం మహారాజానం పుత్తా ఇమం లోకం అనువిచరన్తి – ‘కచ్చి బహూ మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తీ’తి. తదహు, భిక్ఖవే, ఉపోసథే పన్నరసే చత్తారో మహారాజానో సామఞ్ఞేవ ఇమం లోకం అనువిచరన్తి – ‘కచ్చి బహూ మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తీ’’’తి.

‘‘సచే, భిక్ఖవే, అప్పకా హోన్తి మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తి. తమేనం, భిక్ఖవే, చత్తారో మహారాజానో దేవానం తావతింసానం సుధమ్మాయ సభాయ సన్నిసిన్నానం సన్నిపతితానం ఆరోచేన్తి – ‘అప్పకా ఖో, మారిసా, మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తీ’తి. తేన ఖో, భిక్ఖవే, దేవా తావతింసా అనత్తమనా హోన్తి – ‘దిబ్బా వత, భో, కాయా పరిహాయిస్సన్తి, పరిపూరిస్సన్తి అసురకాయా’’’తి.

‘‘సచే పన, భిక్ఖవే, బహూ హోన్తి మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తి. తమేనం, భిక్ఖవే, చత్తారో మహారాజానో దేవానం తావతింసానం సుధమ్మాయ సభాయ సన్నిసిన్నానం సన్నిపతితానం ఆరోచేన్తి – ‘బహూ ఖో, మారిసా, మనుస్సా మనుస్సేసు మత్తేయ్యా పేత్తేయ్యా సామఞ్ఞా బ్రహ్మఞ్ఞా కులే జేట్ఠాపచాయినో ఉపోసథం ఉపవసన్తి పటిజాగరోన్తి పుఞ్ఞాని కరోన్తీ’తి. తేన, భిక్ఖవే, దేవా తావతింసా అత్తమనా హోన్తి – ‘దిబ్బా వత, భో, కాయా పరిపూరిస్సన్తి, పరిహాయిస్సన్తి అసురకాయా’’’తి.

‘‘భూతపుబ్బం, భిక్ఖవే, సక్కో దేవానమిన్దో దేవే తావతింసే అనునయమానో తాయం వేలాయం ఇమం గాథం అభాసి –

‘‘చాతుద్దసిం పఞ్చదసిం, యా చ పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం;

ఉపోసథం ఉపవసేయ్య, యోపిస్స [యోపస్స (సీ. స్యా. కం. పీ.)] మాదిసో నరో’’తి.

‘‘సా ఖో పనేసా, భిక్ఖవే, సక్కేన దేవానమిన్దేన గాథా దుగ్గీతా న సుగీతా దుబ్భాసితా న సుభాసితా. తం కిస్స హేతు? సక్కో హి, భిక్ఖవే, దేవానమిన్దో అవీతరాగో అవీతదోసో అవీతమోహో.

‘‘యో చ ఖో సో, భిక్ఖవే, భిక్ఖు అరహం ఖీణాసవో వుసితవా బ్రహ్మచరియో కతకరణీయో ఓహితభారో అనుప్పత్తసదత్థో పరిక్ఖీణభవసంయోజనో సమ్మదఞ్ఞా విముత్తో, తస్స ఖో ఏతం, భిక్ఖవే, భిక్ఖునో [తస్స ఖో ఏతం భిక్ఖునో (సీ. స్యా.), తస్స ఖో ఏవం భిక్ఖవే భిక్ఖునో (క.)] కల్లం వచనాయ –

‘‘చాతుద్దసిం పఞ్చదసిం, యా చ పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం;

ఉపోసథం ఉపవసేయ్య, యోపిస్స మాదిసో నరో’’తి.

‘‘తం కిస్స హేతు? సో హి, భిక్ఖవే, భిక్ఖు వీతరాగో వీతదోసో వీతమోహో’’తి. సత్తమం.