౮. గూథభాణీసుత్తం

౨౮. ‘‘తయోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే తయో? గూథభాణీ, పుప్ఫభాణీ, మధుభాణీ. కతమో చ, భిక్ఖవే, పుగ్గలో గూథభాణీ? ఇధ, భిక్ఖవే, ఏకచ్చో పుగ్గలో సభగ్గతో వా పరిసగ్గతో వా [సభాగతో వా పరిసాగతో వా (స్యా. కం.)] ఞాతిమజ్ఝగతో వా పూగమజ్ఝగతో వా రాజకులమజ్ఝగతో వా అభినీతో సక్ఖిపుట్ఠో – ‘ఏహమ్భో పురిస, యం జానాసి తం వదేహీ’తి. సో అజానం వా ఆహ ‘జానామీ’తి, జానం వా ఆహ ‘న జానామీ’తి, అపస్సం వా ఆహ ‘పస్సామీ’తి, పస్సం వా ఆహ ‘న పస్సామీ’తి [మ. ని. ౧.౪౪౦; పు. ప. ౯౧]; ఇతి అత్తహేతు వా పరహేతు వా ఆమిసకిఞ్చిక్ఖహేతు వా సమ్పజానముసా భాసితా హోతి. అయం వుచ్చతి, భిక్ఖవే, పుగ్గలో గూథభాణీ.

‘‘కతమో చ, భిక్ఖవే, పుగ్గలో పుప్ఫభాణీ? ఇధ, భిక్ఖవే, ఏకచ్చో పుగ్గలో సభగ్గతో వా పరిసగ్గతో వా ఞాతిమజ్ఝగతో వా పూగమజ్ఝగతో వా రాజకులమజ్ఝగతో వా అభినీతో సక్ఖిపుట్ఠో – ‘ఏహమ్భో పురిస, యం పజానాసి తం వదేహీ’తి, సో అజానం వా ఆహ ‘న జానామీ’తి, జానం వా ఆహ ‘జానామీ’తి, అపస్సం వా ఆహ ‘న పస్సామీ’తి, పస్సం వా ఆహ ‘పస్సామీ’తి; ఇతి అత్తహేతు వా పరహేతు వా ఆమిసకిఞ్చిక్ఖహేతు వా న సమ్పజానముసా భాసితా హోతి. అయం వుచ్చతి, భిక్ఖవే, పుగ్గలో పుప్ఫభాణీ.

‘‘కతమో చ, భిక్ఖవే, పుగ్గలో మధుభాణీ? ఇధ, భిక్ఖవే, ఏకచ్చో పుగ్గలో ఫరుసం వాచం పహాయ ఫరుసాయ వాచాయ పటివిరతో హోతి; యా సా వాచా నేలా కణ్ణసుఖా పేమనీయా హదయఙ్గమా పోరీ బహుజనకన్తా బహుజనమనాపా తథారూపిం వాచం భాసితా హోతి. అయం వుచ్చతి, భిక్ఖవే, పుగ్గలో మధుభాణీ. ఇమే ఖో, భిక్ఖవే, తయో పుగ్గలా సన్తో సంవిజ్జమానా లోకస్మి’’న్తి. అట్ఠమం.