౫. అయోనిసోసుత్తం

౫. ‘‘తీహి, భిక్ఖవే, ధమ్మేహి సమన్నాగతో బాలో వేదితబ్బో. కతమేహి తీహి? అయోనిసో పఞ్హం కత్తా హోతి, అయోనిసో పఞ్హం విస్సజ్జేతా హోతి, పరస్స ఖో పన యోనిసో పఞ్హం విస్సజ్జితం పరిమణ్డలేహి పదబ్యఞ్జనేహి సిలిట్ఠేహి ఉపగతేహి నాబ్భనుమోదితా హోతి. ఇమేహి ఖో, భిక్ఖవే, తీహి ధమ్మేహి సమన్నాగతో బాలో వేదితబ్బో.

‘‘తీహి, భిక్ఖవే, ధమ్మేహి సమన్నాగతో పణ్డితో వేదితబ్బో. కతమేహి తీహి? యోనిసో పఞ్హం కత్తా హోతి, యోనిసో పఞ్హం విస్సజ్జేతా హోతి, పరస్స ఖో పన యోనిసో పఞ్హం విస్సజ్జితం పరిమణ్డలేహి పదబ్యఞ్జనేహి సిలిట్ఠేహి ఉపగతేహి అబ్భనుమోదితా హోతి. ఇమేహి ఖో, భిక్ఖవే, తీహి ధమ్మేహి సమన్నాగతో పణ్డితో వేదితబ్బో. తస్మాతిహ…. పఞ్చమం.