౧. వాహనసుత్తం

౮౧. ఏకం సమయం భగవా చమ్పాయం విహరతి గగ్గరాయ పోక్ఖరణియా తీరే. అథ ఖో ఆయస్మా వాహనో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా వాహనో భగవన్తం ఏతదవోచ – ‘‘కతిహి ను ఖో, భన్తే, ధమ్మేహి తథాగతో నిస్సటో విసంయుత్తో విప్పముత్తో విమరియాదీకతేన చేతసా విహరతీ’’తి?

‘‘దసహి ఖో, వాహన, ధమ్మేహి తథాగతో నిస్సటో విసంయుత్తో విప్పముత్తో విమరియాదీకతేన చేతసా విహరతి. కతమేహి దసహి? రూపేన ఖో, వాహన, తథాగతో నిస్సటో విసంయుత్తో విప్పముత్తో విమరియాదీకతేన చేతసా విహరతి, వేదనాయ ఖో, వాహన…పే… సఞ్ఞాయ ఖో, వాహన… సఙ్ఖారేహి ఖో, వాహన… విఞ్ఞాణేన ఖో, వాహన… జాతియా ఖో, వాహన… జరాయ ఖో, వాహన… మరణేన ఖో, వాహన… దుక్ఖేహి ఖో, వాహన… కిలేసేహి ఖో, వాహన, తథాగతో నిస్సటో విసంయుత్తో విప్పముత్తో విమరియాదీకతేన చేతసా విహరతి. సేయ్యథాపి, వాహన, ఉప్పలం వా పదుమం వా పుణ్డరీకం వా ఉదకే జాతం ఉదకే సంవడ్ఢం ఉదకా పచ్చుగ్గమ్మ ఠితం అనుపలిత్తం ఉదకేన; ఏవమేవం ఖో, వాహన, ఇమేహి దసహి ధమ్మేహి తథాగతో నిస్సటో విసంయుత్తో విప్పముత్తో విమరియాదీకతేన చేతసా విహరతీ’’తి. పఠమం.