౧౫. అట్ఠానపాళి

౧. పఠమవగ్గో

౨౬౮. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో కఞ్చి [కిఞ్చి (క.)] సఙ్ఖారం నిచ్చతో ఉపగచ్ఛేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో కఞ్చి సఙ్ఖారం నిచ్చతో ఉపగచ్ఛేయ్య. ఠానమేతం విజ్జతీ’’తి.

౨౬౯. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో కఞ్చి సఙ్ఖారం సుఖతో ఉపగచ్ఛేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో కఞ్చి సఙ్ఖారం సుఖతో ఉపగచ్ఛేయ్య. ఠానమేతం విజ్జతీ’’తి.

౨౭౦. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో కఞ్చి ధమ్మం అత్తతో ఉపగచ్ఛేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో కఞ్చి ధమ్మం అత్తతో ఉపగచ్ఛేయ్య. ఠానమేతం విజ్జతీ’’తి.

౨౭౧. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో మాతరం జీవితా వోరోపేయ్య. నేతం ఠానం విజ్జతి. ఠానఞ్చ ఖో, భిక్ఖవే, విజ్జతి యం పుథుజ్జనో మాతరం జీవితా వోరోపేయ్య. ఠానమేతం విజ్జతీ’’తి.

౨౭౨. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో పితరం జీవితా వోరోపేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో పితరం జీవితా వోరోపేయ్య. ఠానమేతం విజ్జతీ’’తి.

౨౭౩. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో అరహన్తం జీవితా వోరోపేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో అరహన్తం జీవితా వోరోపేయ్య. ఠానమేతం విజ్జతీ’’తి.

౨౭౪. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో తథాగతస్స పదుట్ఠచిత్తో లోహితం ఉప్పాదేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో తథాగతస్స పదుట్ఠచిత్తో లోహితం ఉప్పాదేయ్య. ఠానమేతం విజ్జతీ’’తి.

౨౭౫. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో సఙ్ఘం భిన్దేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో సఙ్ఘం భిన్దేయ్య. ఠానమేతం విజ్జతీ’’తి.

౨౭౬. ‘‘అట్ఠానమేతం, భిక్ఖవే, అనవకాసో యం దిట్ఠిసమ్పన్నో పుగ్గలో అఞ్ఞం సత్థారం ఉద్దిసేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పుథుజ్జనో అఞ్ఞం సత్థారం ఉద్దిసేయ్య. ఠానమేతం విజ్జతీ’’తి.

౨౭౭. ‘‘అట్ఠానమేతం, భిక్ఖవే, అనవకాసో యం ఏకిస్సా లోకధాతుయా ద్వే అరహన్తో సమ్మాసమ్బుద్ధా అపుబ్బం అచరిమం ఉప్పజ్జేయ్యుం. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం ఏకిస్సా లోకధాతుయా ఏకోవ అరహం సమ్మాసమ్బుద్ధో ఉప్పజ్జేయ్య. ఠానమేతం విజ్జతీ’’తి.

వగ్గో పఠమో.

౨. దుతియవగ్గో

౨౭౮. ‘‘అట్ఠానమేతం, భిక్ఖవే, అనవకాసో యం ఏకిస్సా లోకధాతుయా ద్వే రాజానో చక్కవత్తీ అపుబ్బం అచరిమం ఉప్పజ్జేయ్యుం. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం ఏకిస్సా లోకధాతుయా ఏకో రాజా చక్కవత్తీ ఉప్పజ్జేయ్య. ఠానమేతం విజ్జతీ’’తి.

౨౭౯. ‘‘అట్ఠానమేతం, భిక్ఖవే, అనవకాసో యం ఇత్థీ అరహం అస్స సమ్మాసమ్బుద్ధో. నేతం ఠానం విజ్జతి. ఠానఞ్చ ఖో, ఏతం, భిక్ఖవే, విజ్జతి యం పురిసో అరహం అస్స సమ్మాసమ్బుద్ధో. ఠానమేతం విజ్జతీ’’తి.

౨౮౦. ‘‘అట్ఠానమేతం, భిక్ఖవే, అనవకాసో యం ఇత్థీ రాజా అస్స చక్కవత్తీ. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పురిసో రాజా అస్స చక్కవత్తీ. ఠానమేతం విజ్జతీ’’తి.

౨౮౧-౨౮౩. ‘‘అట్ఠానమేతం, భిక్ఖవే, అనవకాసో యం ఇత్థీ సక్కత్తం కారేయ్య…పే… మారత్తం కారేయ్య…పే… బ్రహ్మత్తం కారేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం పురిసో సక్కత్తం కారేయ్య…పే… మారత్తం కారేయ్య…పే… బ్రహ్మత్తం కారేయ్య. ఠానమేతం విజ్జతీ’’తి.

౨౮౪. ‘‘అట్ఠానమేతం, భిక్ఖవే, అనవకాసో యం కాయదుచ్చరితస్స ఇట్ఠో కన్తో మనాపో విపాకో నిబ్బత్తేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం కాయదుచ్చరితస్స అనిట్ఠో అకన్తో అమనాపో విపాకో నిబ్బత్తేయ్య. ఠానమేతం విజ్జతీ’’తి.

౨౮౫-౨౮౬. ‘‘అట్ఠానమేతం, భిక్ఖవే, అనవకాసో యం వచీదుచ్చరితస్స…పే… యం మనోదుచ్చరితస్స ఇట్ఠో కన్తో మనాపో విపాకో నిబ్బత్తేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం మనోదుచ్చరితస్స అనిట్ఠో అకన్తో అమనాపో విపాకో నిబ్బత్తేయ్య. ఠానమేతం విజ్జతీ’’తి.

వగ్గో దుతియో.

౩. తతియవగ్గో

౨౮౭. ‘‘అట్ఠానమేతం, భిక్ఖవే, అనవకాసో యం కాయసుచరితస్స అనిట్ఠో అకన్తో అమనాపో విపాకో నిబ్బత్తేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం కాయసుచరితస్స ఇట్ఠో కన్తో మనాపో విపాకో నిబ్బత్తేయ్య. ఠానమేతం విజ్జతీ’’తి.

౨౮౮-౨౮౯. ‘‘అట్ఠానమేతం, భిక్ఖవే, అనవకాసో యం వచీసుచరితస్స…పే… మనోసుచరితస్స అనిట్ఠో అకన్తో అమనాపో విపాకో నిబ్బత్తేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం మనోసుచరితస్స ఇట్ఠో కన్తో మనాపో విపాకో నిబ్బత్తేయ్య. ఠానమేతం విజ్జతీ’’తి.

౨౯౦. ‘‘అట్ఠానమేతం, భిక్ఖవే, అనవకాసో యం కాయదుచ్చరితసమఙ్గీ తన్నిదానా తప్పచ్చయా కాయస్స భేదా పరం మరణా సుగతిం సగ్గం లోకం ఉపపజ్జేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం కాయదుచ్చరితసమఙ్గీ తన్నిదానా తప్పచ్చయా కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జేయ్య. ఠానమేతం విజ్జతీ’’తి.

౨౯౧-౨౯౨. ‘‘అట్ఠానమేతం, భిక్ఖవే, అనవకాసో యం వచీదుచ్చరితసమఙ్గీ…పే… యం మనోదుచ్చరితసమఙ్గీ తన్నిదానా తప్పచ్చయా కాయస్స భేదా పరం మరణా సుగతిం సగ్గం లోకం ఉపపజ్జేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం మనోదుచ్చరితసమఙ్గీ తన్నిదానా తప్పచ్చయా కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జేయ్య. ఠానమేతం విజ్జతీ’’తి.

౨౯౩. ‘‘అట్ఠానమేతం, భిక్ఖవే, అనవకాసో యం కాయసుచరితసమఙ్గీ తన్నిదానా తప్పచ్చయా కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం కాయసుచరితసమఙ్గీ తన్నిదానా తప్పచ్చయా కాయస్స భేదా పరం మరణా సుగతిం సగ్గం లోకం ఉపపజ్జేయ్య. ఠానమేతం విజ్జతీ’’తి.

౨౯౪-౨౯౫. ‘‘అట్ఠానమేతం, భిక్ఖవే, అనవకాసో యం వచీసుచరితసమఙ్గీ…పే… యం మనోసుచరితసమఙ్గీ తన్నిదానా తప్పచ్చయా కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జేయ్య. నేతం ఠానం విజ్జతి. ఠానఞ్చ ఖో ఏతం, భిక్ఖవే, విజ్జతి యం మనోసుచరితసమఙ్గీ తన్నిదానా తప్పచ్చయా కాయస్స భేదా పరం మరణా సుగతిం సగ్గం లోకం ఉపపజ్జేయ్య. ఠానమేతం విజ్జతీ’’తి.

వగ్గో తతియో.

అట్ఠానపాళి పన్నరసమో.