౧౪. ఏతదగ్గవగ్గో
౧. పఠమవగ్గో
౧౮౮. ‘‘ఏతదగ్గం, భిక్ఖవే, మమ సావకానం భిక్ఖూనం రత్తఞ్ఞూనం యదిదం అఞ్ఞాసికోణ్డఞ్ఞో’’ [అఞ్ఞాతకోణ్డఞ్ఞోతి (క.), అఞ్ఞాకోణ్డఞ్ఞో (సీ. స్యా. కం. పీ.)].
౧౮౯. … మహాపఞ్ఞానం యదిదం సారిపుత్తో.
౧౯౦. … ఇద్ధిమన్తానం యదిదం మహామోగ్గల్లానో.
౧౯౧. … ధుతవాదానం [ధుతఙ్గధరానం (కత్థచి)] యదిదం మహాకస్సపో.
౧౯౨. … దిబ్బచక్ఖుకానం యదిదం అనురుద్ధో.
౧౯౩. … ఉచ్చాకులికానం యదిదం భద్దియో కాళిగోధాయపుత్తో.
౧౯౪. … మఞ్జుస్సరానం యదిదం లకుణ్డక [లకుణ్టక (స్యా. కం.)] భద్దియో.
౧౯౫. … సీహనాదికానం యదిదం పిణ్డోలభారద్వాజో.
౧౯౬. … ధమ్మకథికానం యదిదం పుణ్ణో మన్తాణిపుత్తో.
౧౯౭. … సంఖిత్తేన భాసితస్స విత్థారేన అత్థం విభజన్తానం యదిదం మహాకచ్చానోతి.
వగ్గో పఠమో.
౨. దుతియవగ్గో
౧౯౮. ‘‘ఏతదగ్గం, భిక్ఖవే, మమ సావకానం భిక్ఖూనం మనోమయం కాయం అభినిమ్మినన్తానం యదిదం చూళపన్థకో’’ [చుల్లపన్థకో (సీ. స్యా. కం. పీ.)].
౧౯౯. … చేతోవివట్టకుసలానం యదిదం చూళపన్థకో.
౨౦౦. … సఞ్ఞావివట్టకుసలానం యదిదం మహాపన్థకో.
౨౦౧. … అరణవిహారీనం యదిదం సుభూతి.
౨౦౨. … దక్ఖిణేయ్యానం యదిదం సుభూతి.
౨౦౩. … ఆరఞ్ఞకానం యదిదం రేవతో ఖదిరవనియో.
౨౦౪. … ఝాయీనం యదిదం కఙ్ఖారేవతో.
౨౦౫. … ఆరద్ధవీరియానం యదిదం సోణో కోళివిసో.
౨౦౬. … కల్యాణవాక్కరణానం యదిదం సోణో కుటికణ్ణో.
౨౦౭. … లాభీనం యదిదం సీవలి.
౨౦౮. … సద్ధాధిముత్తానం యదిదం వక్కలీతి.
వగ్గో దుతియో.
౩. తతియవగ్గో
౨౦౯. ‘‘ఏతదగ్గం, భిక్ఖవే, మమ సావకానం భిక్ఖూనం సిక్ఖాకామానం యదిదం రాహులో’’.
౨౧౦. … సద్ధాపబ్బజితానం యదిదం రట్ఠపాలో.
౨౧౧. … పఠమం సలాకం గణ్హన్తానం యదిదం కుణ్డధానో.
౨౧౨. … పటిభానవన్తానం యదిదం వఙ్గీసో.
౨౧౩. … సమన్తపాసాదికానం యదిదం ఉపసేనో వఙ్గన్తపుత్తో.
౨౧౪. … సేనాసనపఞ్ఞాపకానం యదిదం దబ్బో మల్లపుత్తో.
౨౧౫. … దేవతానం పియమనాపానం యదిదం పిలిన్దవచ్ఛో.
౨౧౬. … ఖిప్పాభిఞ్ఞానం యదిదం బాహియో దారుచీరియో.
౨౧౭. … చిత్తకథికానం యదిదం కుమారకస్సపో.
౨౧౮. … పటిసమ్భిదాపత్తానం యదిదం మహాకోట్ఠితోతి [మహాకోట్ఠికోతి (అఞ్ఞేసు సుత్తేసు మరమ్మపోత్థకే)].
వగ్గో తతియో.
౪. చతుత్థవగ్గో
౨౧౯. ‘‘ఏతదగ్గం, భిక్ఖవే, మమ సావకానం భిక్ఖూనం బహుస్సుతానం యదిదం ఆనన్దో’’.
౨౨౦. … సతిమన్తానం యదిదం ఆనన్దో.
౨౨౧. … గతిమన్తానం యదిదం ఆనన్దో.
౨౨౨. … ధితిమన్తానం యదిదం ఆనన్దో.
౨౨౩. … ఉపట్ఠాకానం యదిదం ఆనన్దో.
౨౨౪. … మహాపరిసానం యదిదం ఉరువేలకస్సపో.
౨౨౫. … కులప్పసాదకానం యదిదం కాళుదాయీ.
౨౨౬. … అప్పాబాధానం యదిదం బాకులో [బక్కులో (సీ. స్యా. కం. పీ.)].
౨౨౭. … పుబ్బేనివాసం అనుస్సరన్తానం యదిదం సోభితో.
౨౨౮. … వినయధరానం యదిదం ఉపాలి.
౨౨౯. … భిక్ఖునోవాదకానం యదిదం నన్దకో.
౨౩౦. … ఇన్ద్రియేసు గుత్తద్వారానం యదిదం నన్దో.
౨౩౧. … భిక్ఖుఓవాదకానం యదిదం మహాకప్పినో.
౨౩౨. … తేజోధాతుకుసలానం యదిదం సాగతో.
౨౩౩. … పటిభానేయ్యకానం యదిదం రాధో.
౨౩౪. … లూఖచీవరధరానం యదిదం మోఘరాజాతి.
వగ్గో చతుత్థో.
౫. పఞ్చమవగ్గో
౨౩౫. ‘‘ఏతదగ్గం, భిక్ఖవే, మమ సావికానం భిక్ఖునీనం రత్తఞ్ఞూనం యదిదం మహాపజాపతిగోతమీ’’.
౨౩౬. … మహాపఞ్ఞానం యదిదం ఖేమా.
౨౩౭. … ఇద్ధిమన్తీనం యదిదం ఉప్పలవణ్ణా.
౨౩౮. … వినయధరానం యదిదం పటాచారా.
౨౩౯. … ధమ్మకథికానం యదిదం ధమ్మదిన్నా.
౨౪౦. … ఝాయీనం యదిదం నన్దా.
౨౪౧. … ఆరద్ధవీరియానం యదిదం సోణా.
౨౪౨. … దిబ్బచక్ఖుకానం యదిదం బకులా [సకులా (సీ. స్యా. కం. పీ.)].
౨౪౩. … ఖిప్పాభిఞ్ఞానం యదిదం భద్దా కుణ్డలకేసా.
౨౪౪. … పుబ్బేనివాసం అనుస్సరన్తీనం యదిదం భద్దా కాపిలానీ.
౨౪౫. … మహాభిఞ్ఞప్పత్తానం యదిదం భద్దకచ్చానా.
౨౪౬. … లూఖచీవరధరానం యదిదం కిసాగోతమీ.
౨౪౭. … సద్ధాధిముత్తానం యదిదం సిఙ్గాలకమాతాతి [సిగాలమాతాతి (సీ. స్యా. కం. పీ.)].
వగ్గో పఞ్చమో.
౬. ఛట్ఠవగ్గో
౨౪౮. ‘‘ఏతదగ్గం, భిక్ఖవే, మమ సావకానం ఉపాసకానం పఠమం సరణం గచ్ఛన్తానం యదిదం తపుస్సభల్లికా [తపస్సుభల్లికా (సీ. పీ.)] వాణిజా’’.
౨౪౯. … దాయకానం యదిదం సుదత్తో గహపతి అనాథపిణ్డికో.
౨౫౦. … ధమ్మకథికానం యదిదం చిత్తో గహపతి మచ్ఛికాసణ్డికో.
౨౫౧. … చతూహి సఙ్గహవత్థూహి పరిసం సఙ్గణ్హన్తానం యదిదం హత్థకో ఆళవకో.
౨౫౨. … పణీతదాయకానం యదిదం మహానామో సక్కో.
౨౫౩. … మనాపదాయకానం యదిదం ఉగ్గో గహపతి వేసాలికో.
౨౫౪. … సఙ్ఘుపట్ఠాకానం యదిదం హత్థిగామకో ఉగ్గతో గహపతి.
౨౫౫. … అవేచ్చప్పసన్నానం యదిదం సూరమ్బట్ఠో [సూరో అమ్బట్ఠో (సీ. స్యా. కం. పీ.) సురేబన్ధో (క.)].
౨౫౬. … పుగ్గలప్పసన్నానం యదిదం జీవకో కోమారభచ్చో.
౨౫౭. … విస్సాసకానం యదిదం నకులపితా గహపతీతి.
వగ్గో ఛట్ఠో.
౭. సత్తమవగ్గో
౨౫౮. ‘‘ఏతదగ్గం, భిక్ఖవే, మమ సావికానం ఉపాసికానం పఠమం సరణం గచ్ఛన్తీనం యదిదం సుజాతా సేనియధీతా’’ [సేనానీ ధీతా (సీ. స్యా. కం. పీ.)].
౨౫౯. … దాయికానం యదిదం విసాఖా మిగారమాతా.
౨౬౦. … బహుస్సుతానం యదిదం ఖుజ్జుత్తరా.
౨౬౧. … మేత్తావిహారీనం యదిదం సామావతీ.
౨౬౨. … ఝాయీనం యదిదం ఉత్తరానన్దమాతా.
౨౬౩. … పణీతదాయికానం యదిదం సుప్పవాసా కోలియధీతా.
౨౬౪. … గిలానుపట్ఠాకీనం యదిదం సుప్పియా ఉపాసికా.
౨౬౫. … అవేచ్చప్పసన్నానం యదిదం కాతియానీ.
౨౬౬. … విస్సాసికానం యదిదం నకులమాతా గహపతానీ.
౨౬౭. … అనుస్సవప్పసన్నానం యదిదం కాళీ ఉపాసికా కులఘరికా [కులఘరికా (క.)] తి.
వగ్గో సత్తమో.
ఏతదగ్గవగ్గో చుద్దసమో.