6. ச²க்கவாரோ

326. [தீ³. நி. 3.324] ச² அகா³ரவா. ச² கா³ரவா. ச² வினீதவத்தூ²னி. ச² ஸாமீசியோ. ச² ஆபத்திஸமுட்டா²னா. ச²ச்சே²த³னகா ஆபத்தியோ. ச²ஹாகாரேஹி ஆபத்திம் ஆபஜ்ஜதி. சா²னிஸம்ஸா வினயத⁴ரே. ச² பரமானி. சா²ரத்தம் திசீவரேன விப்பவஸிதப்³ப³ம். ச² சீவரானி. ச² ரஜனானி. ச² ஆபத்தியோ காயதோ ச சித்ததோ ச ஸமுட்ட²ந்தி ந வாசதோ. ச² ஆபத்தியோ வாசதோ ச சித்ததோ ச ஸமுட்ட²ந்தி ந காயதோ. ச² ஆபத்தியோ காயதோ ச வாசதோ ச சித்ததோ ச ஸமுட்ட²ந்தி. ச² கம்மானி. ச² விவாத³மூலானி. ச² அனுவாத³மூலானி. ச² ஸாரணீயா த⁴ம்மா தீ³க⁴ஸோ. ச² வித³த்தி²யோ, ஸுக³தவித³த்தி²யா, திரியம் ச² வித³த்தி²யோ. ச² நிஸ்ஸயபடிப்பஸ்ஸத்³தி⁴யோ ஆசரியம்ஹா. ச² நஹானே அனுபஞ்ஞத்தியோ – விப்பகதசீவரம் ஆதா³ய பக்கமதி, விப்பகதசீவரம் ஸமாதா³ய பக்கமதி.

[மஹாவ. 85 ஆத³யோ] ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, அஸேக்கே²ன பஞ்ஞக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – அத்தனா அஸேக்கே²ன ஸீலக்க²ந்தே⁴ ஸமன்னாக³தோ ஹோதி, பரம் அஸேக்கே² ஸீலக்க²ந்தே⁴ ஸமாத³பேதா; அத்தனா அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, பரம் அஸேக்கே² ஸமாதி⁴க்க²ந்தே⁴ ஸமாத³பேதா; அத்தனா அஸேக்கே²ன பஞ்ஞக்க²ந்தே⁴ன ஸமன்னாக³தோ ஹோதி, பரம் அஸேக்கே² பஞ்ஞக்க²ந்தே⁴ ஸமாத³பேதா; அத்தனா அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, பரம் அஸேக்கே² விமுத்திக்க²ந்தே⁴ ஸமாத³பேதா; அத்தனா அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, பரம் அஸேக்கே² விமுத்திஞாணத³ஸ்ஸனக்க²ந்தே⁴ ஸமாத³பேதா; த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி, த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – ந அதி⁴ஸீலே ஸீலவிபன்னோ ஹோதி, ந அஜ்ஜா²சாரே ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ ஹோதி, ப³ஹுஸ்ஸுதோ ஹோதி, பஞ்ஞவா ஹோதி, த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – படிப³லோ ஹோதி அந்தேவாஸிம் வா ஸத்³தி⁴விஹாரிம் வா கி³லானம் உபட்டா²தும் வா உபட்டா²பேதும் வா, அனபி⁴ரதம் வூபகாஸேதும் வா வூபகாஸாபேதும் வா [அனபி⁴ரதிம் (க.)], உப்பன்னம் குக்குச்சம் த⁴ம்மதோ வினோதே³தும் [வினோதே³தும் வா வினோதா³பேதும் வா (ஸ்யா.) மஹாவ. 85], ஆபத்திம் ஜானாதி, ஆபத்திவுட்டா²னம் ஜானாதி, த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – படிப³லோ ஹோதி அந்தேவாஸிம் வா ஸத்³தி⁴விஹாரிம் வா ஆபி⁴ஸமாசாரிகாய ஸிக்கா²ய ஸிக்கா²பேதும், ஆதி³ப்³ரஹ்மசாரியகாய ஸிக்கா²ய வினேதும், அபி⁴த⁴ம்மே வினேதும், அபி⁴வினயே வினேதும், உப்பன்னம் தி³ட்டி²க³தம் த⁴ம்மதோ விவேசேதும், த³ஸவஸ்ஸோ வா ஹோதி அதிரேகத³ஸவஸ்ஸோ வா.

அபரேஹிபி ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம் நிஸ்ஸயோ தா³தப்³போ³ ஸாமணேரோ உபட்டா²பேதப்³போ³ – ஆபத்திம் ஜானாதி, அனாபத்திம் ஜானாதி, லஹுகம் ஆபத்திம் ஜானாதி, க³ருகம் ஆபத்திம் ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ, த³ஸவஸ்ஸோ வா ஹோதி அதிரேகத³ஸவஸ்ஸோ வா.

ச² அத⁴ம்மிகானி பாதிமோக்க²ட்ட²பனானி, ச² த⁴ம்மிகானி பாதிமோக்க²ட்ட²பனானீதி.

ச²க்கம் நிட்டி²தம்.

தஸ்ஸுத்³தா³னம் –

அகா³ரவா கா³ரவா ச, வினீதா ஸாமீசிபி ச;

ஸமுட்டா²னா சே²த³னா சேவ, ஆகாரானிஸம்ஸேன ச.

பரமானி ச சா²ரத்தம், சீவரம் ரஜனானி ச;

காயதோ சித்ததோ சாபி, வாசதோ சித்ததோபி ச.

காயவாசாசித்ததோ ச, கம்மவிவாத³மேவ ச;

அனுவாதா³ தீ³க⁴ஸோ ச, திரியம் நிஸ்ஸயேன ச.

அனுபஞ்ஞத்தி ஆதா³ய, ஸமாதா³ய ததே²வ ச;

அஸேக்கே² ஸமாத³பேதா, ஸத்³தோ⁴ அதி⁴ஸீலேன ச;

கி³லானாபி⁴ஸமாசாரீ, ஆபத்தாத⁴ம்மத⁴ம்மிகாதி.