2. து³கவாரோ

322. அத்தா²பத்தி ஸஞ்ஞா விமோக்கா², அத்தா²பத்தி நோ ஸஞ்ஞாவிமோக்கா². அத்தா²பத்தி லத்³த⁴ஸமாபத்திகஸ்ஸ, அத்தா²பத்தி ந லத்³த⁴ஸமாபத்திகஸ்ஸ. அத்தா²பத்தி ஸத்³த⁴ம்மபடிஸஞ்ஞுத்தா, அத்தா²பத்தி அஸத்³த⁴ம்மபடிஸஞ்ஞுத்தா. அத்தா²பத்தி ஸபரிக்கா²ரபடிஸஞ்ஞுத்தா, அத்தா²பத்தி பரபரிக்கா²ரபடிஸஞ்ஞுத்தா. அத்தா²பத்தி ஸபுக்³க³லபடிஸஞ்ஞுத்தா, அத்தா²பத்தி பரபுக்³க³லபடிஸஞ்ஞுத்தா. அத்தி² ஸச்சம் ப⁴ணந்தோ க³ருகம் ஆபத்திம் ஆபஜ்ஜதி, முஸா ப⁴ணந்தோ லஹுகம். அத்தி² முஸா ப⁴ணந்தோ க³ருகம் ஆபத்திம் ஆபஜ்ஜதி, ஸச்சம் ப⁴ணந்தோ லஹுகம். அத்தா²பத்தி பூ⁴மிக³தோ ஆபஜ்ஜதி, நோ வேஹாஸக³தோ. அத்தா²பத்தி வேஹாஸக³தோ ஆபஜ்ஜதி, நோ பூ⁴மிக³தோ. அத்தா²பத்தி நிக்க²மந்தோ ஆபஜ்ஜதி, நோ பவிஸந்தோ. அத்தா²பத்தி பவிஸந்தோ ஆபஜ்ஜதி, நோ நிக்க²மந்தோ. அத்தா²பத்தி ஆதி³யந்தோ ஆபஜ்ஜதி, அத்தா²பத்தி அனாதி³யந்தோ ஆபஜ்ஜதி. அத்தா²பத்தி ஸமாதி³யந்தோ ஆபஜ்ஜதி, அத்தா²பத்தி ந ஸமாதி³யந்தோ ஆபஜ்ஜதி. அத்தா²பத்தி கரோந்தோ ஆபஜ்ஜதி, அத்தா²பத்தி ந கரோந்தோ ஆபஜ்ஜதி. அத்தா²பத்தி தே³ந்தோ ஆபஜ்ஜதி, அத்தா²பத்தி ந தே³ந்தோ ஆபஜ்ஜதி. (அத்தா²பத்தி தே³ஸேந்தோ ஆபஜ்ஜதி, அத்தா²பத்தி ந தே³ஸேந்தோ ஆபஜ்ஜதி.) [( ) (நத்தி² கத்த²சி)] அத்தா²பத்தி படிக்³க³ண்ஹந்தோ ஆபஜ்ஜதி, அத்தா²பத்தி ந படிக்³க³ண்ஹந்தோ ஆபஜ்ஜதி. அத்தா²பத்தி பரிபோ⁴கே³ன ஆபஜ்ஜதி, அத்தா²பத்தி ந பரிபோ⁴கே³ன ஆபஜ்ஜதி. அத்தா²பத்தி ரத்திம் ஆபஜ்ஜதி, நோ தி³வா. அத்தா²பத்தி தி³வா ஆபஜ்ஜதி, நோ ரத்திம். அத்தா²பத்தி அருணுக்³கே³ ஆபஜ்ஜதி, அத்தா²பத்தி ந அருணுக்³கே³ ஆபஜ்ஜதி. அத்தா²பத்தி சி²ந்த³ந்தோ ஆபஜ்ஜதி, அத்தா²பத்தி ந சி²ந்த³ந்தோ ஆபஜ்ஜதி. அத்தா²பத்தி சா²தே³ந்தோ ஆபஜ்ஜதி, அத்தா²பத்தி ந சா²தே³ந்தோ ஆபஜ்ஜதி. அத்தா²பத்தி தா⁴ரேந்தோ ஆபஜ்ஜதி, அத்தா²பத்தி ந தா⁴ரேந்தோ ஆபஜ்ஜதி.

த்³வே உபோஸதா² – சாதுத்³த³ஸிகோ ச பன்னரஸிகோ ச. த்³வே பவாரணா – சாதுத்³த³ஸிகா ச பன்னரஸிகா ச. த்³வே கம்மானி – அபலோகனகம்மம், ஞத்திகம்மம். அபரானிபி த்³வே கம்மானி – ஞத்திது³தியகம்மம், ஞத்திசதுத்த²கம்மம். த்³வே கம்மவத்தூ²னி – அபலோகனகம்மஸ்ஸ வத்து², ஞத்திகம்மஸ்ஸ வத்து². அபரானிபி த்³வே கம்மவத்தூ²னி – ஞத்திது³தியகம்மஸ்ஸ வத்து², ஞத்திசதுத்த²கம்மஸ்ஸ வத்து². த்³வே கம்மதோ³ஸா – அபலோகனகம்மஸ்ஸ தோ³ஸோ, ஞத்திகம்மஸ்ஸ தோ³ஸோ. அபரேபி த்³வே கம்மதோ³ஸா – ஞத்திது³தியகம்மஸ்ஸ தோ³ஸோ, ஞத்திசதுத்த²கம்மஸ்ஸ தோ³ஸோ. த்³வே கம்மஸம்பத்தியோ – அபலோகனகம்மஸ்ஸ ஸம்பத்தி, ஞத்திகம்மஸ்ஸ ஸம்பத்தி. அபராபி த்³வே கம்மஸம்பத்தியோ – ஞத்திது³தியகம்மஸ்ஸ ஸம்பத்தி, ஞத்திசதுத்த²கம்மஸ்ஸ ஸம்பத்தி. த்³வே நானாஸம்வாஸகபூ⁴மியோ – அத்தனா வா அத்தானம் நானாஸம்வாஸகம் கரோதி, ஸமக்³கோ³ வா நம் ஸங்கோ⁴ உக்கி²பதி அத³ஸ்ஸனே வா அப்படிகம்மே வா அப்படினிஸ்ஸக்³கே³ வா. த்³வே ஸமானஸம்வாஸகபூ⁴மியோ – அத்தனா வா அத்தானம் ஸமானஸம்வாஸகம் கரோதி, ஸமக்³கோ³ வா நம் ஸங்கோ⁴ உக்கி²த்தம் ஓஸாரேதி த³ஸ்ஸனே வா படிகம்மே வா படினிஸ்ஸக்³கே³ வா. த்³வே பாராஜிகா – பி⁴க்கூ²னஞ்ச பி⁴க்கு²னீனஞ்ச. த்³வே ஸங்கா⁴தி³ஸேஸா, த்³வே து²ல்லச்சயா, த்³வே பாசித்தியா, த்³வே பாடிதே³ஸனீயா, த்³வே து³க்கடா, த்³வே து³ப்³பா⁴ஸிதா – பி⁴க்கூ²னஞ்ச பி⁴க்கு²னீனஞ்ச. ஸத்த ஆபத்தியோ, ஸத்த ஆபத்திக்க²ந்தா⁴. த்³வீஹாகாரேஹி ஸங்கோ⁴ பி⁴ஜ்ஜதி – கம்மேன வா ஸலாகக்³கா³ஹேன வா.

த்³வே புக்³க³லா ந உபஸம்பாதே³தப்³பா³ – அத்³தா⁴னஹீனோ, அங்க³ஹீனோ. அபரேபி த்³வே புக்³க³லா ந உபஸம்பாதே³தப்³பா³ – வத்து²விபன்னோ, கரணது³க்கடகோ. அபரேபி த்³வே புக்³க³லா ந உபஸம்பாதே³தப்³பா³ – அபரிபூரோ பரிபூரோ நோ ச யாசதி. த்³வின்னம் புக்³க³லானம் நிஸ்ஸாய ந வத்த²ப்³ப³ம் – அலஜ்ஜிஸ்ஸ ச பா³லஸ்ஸ ச. த்³வின்னம் புக்³க³லானம் நிஸ்ஸயோ ந தா³தப்³போ³ – அலஜ்ஜிஸ்ஸ ச லஜ்ஜினோ ச ந யாசதி. த்³வின்னம் புக்³க³லானம் நிஸ்ஸயோ தா³தப்³போ³ – பா³லஸ்ஸ ச லஜ்ஜிஸ்ஸ ச யாசதி. த்³வே புக்³க³லா அப⁴ப்³பா³ ஆபத்திம் ஆபஜ்ஜிதும் – பு³த்³தா⁴ ச பச்சேகபு³த்³தா⁴ ச. த்³வே புக்³க³லா ப⁴ப்³பா³, ஆபத்திம் ஆபஜ்ஜிதும் – பி⁴க்கூ² ச பி⁴க்கு²னியோ ச. த்³வே புக்³க³லா அப⁴ப்³பா³ ஸஞ்சிச்ச ஆபத்திம் ஆபஜ்ஜிதும் – பி⁴க்கூ² ச பி⁴க்கு²னியோ ச அரியபுக்³க³லா. த்³வே புக்³க³லா ப⁴ப்³பா³ ஸஞ்சிச்ச ஆபத்திம் ஆபஜ்ஜிதும் – பி⁴க்கூ² ச பி⁴க்கு²னியோ ச புது²ஜ்ஜனா. த்³வே புக்³க³லா அப⁴ப்³பா³ ஸஞ்சிச்ச ஸாதிஸாரம் வத்து²ம் அஜ்ஜா²சரிதும் – பி⁴க்கூ² ச பி⁴க்கு²னியோ ச அரியபுக்³க³லா. த்³வே புக்³க³லா ப⁴ப்³பா³ ஸஞ்சிச்ச ஸாதிஸாரம் வத்து²ம் அஜ்ஜா²சரிதும் – பி⁴க்கூ² ச பி⁴க்கு²னியோ ச புது²ஜ்ஜனா.

த்³வே படிக்கோஸா – காயேன வா படிக்கோஸதி வாசாய வா படிக்கோஸதி. த்³வே நிஸ்ஸாரணா – அத்தி² புக்³க³லோ அப்பத்தோ நிஸ்ஸாரணம் தம் சே ஸங்கோ⁴ நிஸ்ஸாரேதி ஏகச்சோ ஸுனிஸ்ஸாரிதோ, ஏகச்சோ து³ன்னிஸ்ஸாரிதோ. த்³வே ஓஸாரணா – அத்தி² புக்³க³லோ அப்பத்தோ ஓஸாரணம் தம் சே ஸங்கோ⁴ ஓஸாரேதி ஏகச்சோ ஸோஸாரிதோ, ஏகச்சோ தோ³ஸாரிதோ. த்³வே படிஞ்ஞா – காயேன வா படிஜானாதி வாசாய வா படிஜானாதி. த்³வே படிக்³க³ஹா – காயேன வா படிக்³க³ண்ஹாதி காயபடிப³த்³தே⁴ன வா படிக்³க³ண்ஹாதி. த்³வே படிக்கே²பா – காயேன வா படிக்கி²பதி வாசாய வா படிக்கி²பதி. த்³வே உபகா⁴திகா – ஸிக்கூ²பகா⁴திகா ச போ⁴கூ³பகா⁴திகா ச. த்³வே சோத³னா – காயேன வா சோதே³தி வாசாய வா சோதே³தி. த்³வே கதி²னஸ்ஸ பலிபோ³தா⁴ – ஆவாஸபலிபோ³தோ⁴ ச சீவரபலிபோ³தோ⁴ ச. த்³வே கதி²னஸ்ஸ அபலிபோ³தா⁴ – ஆவாஸஅபலிபோ³தோ⁴ ச சீவரஅபலிபோ³தோ⁴ ச. த்³வே சீவரானி – க³ஹபதிகஞ்ச பம்ஸுகூலஞ்ச. த்³வே பத்தா – அயோபத்தோ மத்திகாபத்தோ. த்³வே மண்ட³லானி – திபுமயம், ஸீஸமயம். த்³வே பத்தஸ்ஸ அதி⁴ட்டா²னா – காயேன வா அதி⁴ட்டே²தி வாசாய வா அதி⁴ட்டே²தி. த்³வே சீவரஸ்ஸ அதி⁴ட்டா²னா – காயேன வா அதி⁴ட்டே²தி வாசாய வா அதி⁴ட்டே²தி. த்³வே விகப்பனா – ஸம்முகா²விகப்பனா ச பரம்முகா²விகப்பனா ச. த்³வே வினயா – பி⁴க்கூ²னஞ்ச பி⁴க்கு²னீனஞ்ச. த்³வே வேனயிகா – பஞ்ஞத்தஞ்ச பஞ்ஞத்தானுலோமஞ்ச. த்³வே வினயஸ்ஸ ஸல்லேகா² – அகப்பியே ஸேதுகா⁴தோ, கப்பியே மத்தகாரிதா. த்³வீஹாகாரேஹி ஆபத்திம் ஆபஜ்ஜதி – காயேன வா ஆபஜ்ஜதி வாசாய வா ஆபஜ்ஜதி. த்³வீஹாகாரேஹி ஆபத்தியா வுட்டா²தி – காயேன வா வுட்டா²தி வாசாய வா வுட்டா²தி. த்³வே பரிவாஸா – படிச்ச²ன்னபரிவாஸோ, அப்படிச்ச²ன்னபரிவாஸோ. அபரேபி த்³வே பரிவாஸா – ஸுத்³த⁴ந்தபரிவாஸோ ஸமோதா⁴னபரிவாஸோ. த்³வே மானத்தா – படிச்ச²ன்னமானத்தம், அப்படிச்ச²ன்னமானத்தம். அபரேபி த்³வே மானத்தா – பக்க²மானத்தம், ஸமோதா⁴னமானத்தம். த்³வின்னம் புக்³க³லானம் ரத்திச்சே²தோ³ – பாரிவாஸிகஸ்ஸ ச மானத்தசாரிகஸ்ஸ ச. த்³வே அனாத³ரியானி – புக்³க³லானாத³ரியஞ்ச த⁴ம்மானாத³ரியஞ்ச. த்³வே லோணானி – ஜாதிமஞ்ச காரிமஞ்ச [ஜாதிமயஞ்ச கா²ரிமயஞ்ச (ஸ்யா.)]. அபரானிபி த்³வே லோணானி – ஸாமுத்³த³ம் காளலோணம். அபரானிபி த்³வே லோணானி – ஸிந்த⁴வம், உப்³பி⁴த³ம் [உப்³பி⁴ரம் (இதிபி)]. அபரானிபி த்³வே லோணானி – ரோமகம், பக்காலகம். த்³வே பரிபோ⁴கா³ – அப்³ப⁴ந்தரபரிபோ⁴கோ³ ச பா³ஹிரபரிபோ⁴கோ³ ச. த்³வே அக்கோஸா – ஹீனோ ச அக்கோஸோ உக்கட்டோ² ச அக்கோஸோ. த்³வீஹாகாரேஹி பேஸுஞ்ஞம் ஹோதி – பியகம்யஸ்ஸ வா பே⁴தா³தி⁴ப்பாயஸ்ஸ வா. த்³வீஹாகாரேஹி க³ணபோ⁴ஜனம் பஸவதி – நிமந்தனதோ வா விஞ்ஞத்திதோ வா. த்³வே வஸ்ஸூபனாயிகா – புரிமிகா, பச்சி²மிகா. த்³வே அத⁴ம்மிகானி பாதிமோக்க²ட்ட²பனானி. த்³வே த⁴ம்மிகானி பாதிமோக்க²ட்ட²பனானி.

[அ. நி. 2.99 ஆத³யோ] த்³வே புக்³க³லா பா³லா – யோ ச அனாக³தம் பா⁴ரம் வஹதி, யோ ச ஆக³தம் பா⁴ரம் ந வஹதி. த்³வே புக்³க³லா பண்டி³தா – யோ ச அனாக³தம் பா⁴ரம் ந வஹதி, யோ ச ஆக³தம் பா⁴ரம் வஹதி. அபரேபி த்³வே புக்³க³லா பா³லா – யோ ச அகப்பியே கப்பியஸஞ்ஞீ, யோ ச கப்பியே அகப்பியஸஞ்ஞீ. த்³வே புக்³க³லா பண்டி³தா – யோ ச அகப்பியே அகப்பியஸஞ்ஞீ, யோ ச கப்பியே கப்பியஸஞ்ஞீ. அபரேபி த்³வே புக்³க³லா பா³லா – யோ ச அனாபத்தியா ஆபத்திஸஞ்ஞீ, யோ ச ஆபத்தியா அனாபத்திஸஞ்ஞீ. த்³வே புக்³க³லா பண்டி³தா – யோ ச ஆபத்தியா ஆபத்திஸஞ்ஞீ, யோ ச அனாபத்தியா அனாபத்திஸஞ்ஞீ. அபரேபி த்³வே புக்³க³லா பா³லா – யோ ச அத⁴ம்மே த⁴ம்மஸஞ்ஞீ, யோ ச த⁴ம்மே அத⁴ம்மஸஞ்ஞீ. த்³வே புக்³க³லா பண்டி³தா – யோ ச அத⁴ம்மே அத⁴ம்மஸஞ்ஞீ, யோ ச த⁴ம்மே த⁴ம்மஸஞ்ஞீ. அபரேபி த்³வே புக்³க³லா பா³லா – யோ ச அவினயே வினயஸஞ்ஞீ, யோ ச வினயே அவினயஸஞ்ஞீ. த்³வே புக்³க³லா பண்டி³தா – யோ ச அவினயே அவினயஸஞ்ஞீ, யோ ச வினயே வினயஸஞ்ஞீ.

[அ. நி. 2.109] த்³வின்னம் புக்³க³லானம் ஆஸவா வட்³ட⁴ந்தி – யோ ச ந குக்குச்சாயிதப்³ப³ம் குக்குச்சாயதி, யோ ச குக்குச்சாயிதப்³ப³ம் குக்குச்சாயதி. த்³வின்னம் புக்³க³லானம் ஆஸவா ந வட்³ட⁴ந்தி – யோ ச குக்குச்சாயிதப்³ப³ம் ந குக்குச்சாயதி, யோ ச குக்குச்சாயிதப்³ப³ம் குக்குச்சாயதி. அபரேஸம்பி த்³வின்னம் புக்³க³லானம் ஆஸவா வட்³ட⁴ந்தி – யோ ச அகப்பியே கப்பியஸஞ்ஞீ, யோ ச கப்பியே அகப்பியஸஞ்ஞீ. த்³வின்னம் புக்³க³லானம் ஆஸவா ந வட்³ட⁴ந்தி – யோ ச அகப்பியே அகப்பியஸஞ்ஞீ, யோ ச கப்பியே கப்பியஸஞ்ஞீ. அபரேஸம்பி த்³வின்னம் புக்³க³லானம் ஆஸவா வட்³ட⁴ந்தி – யோ ச அனாபத்தியா ஆபத்திஸஞ்ஞீ, யோ ச ஆபத்தியா அனாபத்திஸஞ்ஞீ. த்³வின்னம் புக்³க³லானம் ஆஸவா ந வட்³ட⁴ந்தி – யோ ச அனாபத்தியா அனாபத்திஸஞ்ஞீ, யோ ச ஆபத்தியா ஆபத்திஸஞ்ஞீ. அபரேஸம்பி த்³வின்னம் புக்³க³லானம் ஆஸவா வட்³ட⁴ந்தி – யோ ச அத⁴ம்மே த⁴ம்மஸஞ்ஞீ, யோ ச த⁴ம்மே அத⁴ம்மஸஞ்ஞீ. த்³வின்னம் புக்³க³லானம் ஆஸவா ந வட்³ட⁴ந்தி – யோ ச அத⁴ம்மே அத⁴ம்மஸஞ்ஞீ, யோ ச த⁴ம்மே த⁴ம்மஸஞ்ஞீ. அபரேஸம்பி த்³வின்னம் புக்³க³லானம் ஆஸவா வட்³ட⁴ந்தி – யோ ச அவினயே வினயஸஞ்ஞீ, யோ ச வினயே அவினயஸஞ்ஞீ. த்³வின்னம் புக்³க³லானம் ஆஸவா ந வட்³ட⁴ந்தி – யோ ச அவினயே அவினயஸஞ்ஞீ, யோ ச வினயே வினயஸஞ்ஞீ.

து³கா நிட்டி²தா.

தஸ்ஸுத்³தா³னம் –

ஸஞ்ஞா லத்³தா⁴ ச ஸத்³த⁴ம்மா, பரிக்கா²ரா ச புக்³க³லா;

ஸச்சம் பூ⁴மி நிக்க²மந்தோ, ஆதி³யந்தோ ஸமாதி³யம்.

கரோந்தோ தே³ந்தோ க³ண்ஹந்தோ, பரிபோ⁴கே³ன ரத்தி ச;

அருணாசி²ந்த³ம் சா²தே³ந்தோ, தா⁴ரேந்தோ ச உபோஸதா².

பவாரணா கம்மாபரா, வத்து² அபரா தோ³ஸா ச;

அபரா த்³வே ச ஸம்பத்தி, நானா ஸமானமேவ ச.

பாராஜிஸங்க⁴து²ல்லச்சய, பாசித்தி பாடிதே³ஸனா;

து³க்கடா து³ப்³பா⁴ஸிதா சேவ, ஸத்த ஆபத்திக்க²ந்தா⁴ ச.

பி⁴ஜ்ஜதி உபஸம்பதா³, ததே²வ அபரே து³வே;

ந வத்த²ப்³ப³ம் ந தா³தப்³ப³ம், அப⁴ப்³பா³ப⁴ப்³ப³மேவ ச.

ஸஞ்சிச்ச ஸாதிஸாரா ச, படிக்கோஸா நிஸ்ஸாரணா;

ஓஸாரணா படிஞ்ஞா ச, படிக்³க³ஹா படிக்கி²பா.

உபகா⁴தி சோத³னா ச, கதி²னா ச து³வே ததா²;

சீவரா பத்தமண்ட³லா, அதி⁴ட்டா²னா ததே²வ த்³வே.

விகப்பனா ச வினயா, வேனயிகா ச ஸல்லேகா²;

ஆபஜ்ஜதி ச வுட்டா²தி, பரிவாஸாபரே து³வே.

த்³வே மானத்தா அபரே ச, ரத்திச்சே²தோ³ அனாத³ரி;

த்³வே லோணா தயோ அபரே, பரிபோ⁴க³க்கோஸேன ச.

பேஸுஞ்ஞோ ச க³ணாவஸ்ஸ, ட²பனா பா⁴ரகப்பியம்;

அனாபத்தி அத⁴ம்மத⁴ம்மா, வினயே ஆஸவே ததா²தி.