3. திகவாரோ

323. அத்தா²பத்தி திட்ட²ந்தே ப⁴க³வதி ஆபஜ்ஜதி, நோ பரினிப்³பு³தே; அத்தா²பத்தி பரினிப்³பு³தே ப⁴க³வதி ஆபஜ்ஜதி, நோ திட்ட²ந்தே; அத்தா²பத்தி திட்ட²ந்தேபி ப⁴க³வதி ஆபஜ்ஜதி பரினிப்³பு³தேபி. அத்தா²பத்தி காலே ஆபஜ்ஜதி, நோ விகாலே; அத்தா²பத்தி விகாலே ஆபஜ்ஜதி, நோ காலே; அத்தா²பத்தி காலே சேவ ஆபஜ்ஜதி விகாலே ச. அத்தா²பத்தி ரத்திம் ஆபஜ்ஜதி, நோ தி³வா; அத்தா²பத்தி தி³வா ஆபஜ்ஜதி, நோ ரத்திம்; அத்தா²பத்தி ரத்திஞ்சேவ ஆபஜ்ஜதி தி³வா ச. அத்தா²பத்தி த³ஸவஸ்ஸோ ஆபஜ்ஜதி, நோ ஊனத³ஸவஸ்ஸோ; அத்தா²பத்தி ஊனத³ஸவஸ்ஸோ ஆபஜ்ஜதி, நோ த³ஸவஸ்ஸோ; அத்தா²பத்தி த³ஸவஸ்ஸோ சேவ ஆபஜ்ஜதி ஊனத³ஸவஸ்ஸோ ச. அத்தா²பத்தி பஞ்சவஸ்ஸோ ஆபஜ்ஜதி, நோ ஊனபஞ்சவஸ்ஸோ; அத்தா²பத்தி ஊனபஞ்சவஸ்ஸோ ஆபஜ்ஜதி, நோ பஞ்சவஸ்ஸோ; அத்தா²பத்தி பஞ்சவஸ்ஸோ சேவ ஆபஜ்ஜதி ஊனபஞ்சவஸ்ஸோ ச. அத்தா²பத்தி குஸலசித்தோ ஆபஜ்ஜதி; அத்தா²பத்தி அகுஸலசித்தோ ஆபஜ்ஜதி; அத்தா²பத்தி அப்³யாகதசித்தோ ஆபஜ்ஜதி. அத்தா²பத்தி ஸுக²வேத³னாஸமங்கீ³ ஆபஜ்ஜதி; அத்தா²பத்தி து³க்க²வேத³னாஸமங்கீ³ ஆபஜ்ஜதி; அத்தா²பத்தி அது³க்க²மஸுக²வேத³னாஸமங்கீ³ ஆபஜ்ஜதி. தீணி சோத³னாவத்தூ²னி – தி³ட்டே²ன, ஸுதேன, பரிஸங்காய. தயோ ஸலாகக்³கா³ஹா – கு³ள்ஹகோ, விவடகோ [விவட்டகோ (க.)], ஸகண்ணஜப்பகோ. தயோ படிக்கே²பா – மஹிச்ச²தா, அஸந்துட்டி²தா [அஸந்துட்ட²தா (ஸ்யா.)], அஸல்லேக²தா. தயோ அனுஞ்ஞாதா – அப்பிச்ச²தா, ஸந்துட்டி²தா, ஸல்லேக²தா. அபரேபி தயோ படிக்கே²பா – மஹிச்ச²தா, அஸந்துட்டி²தா, அமத்தஞ்ஞுதா. தயோ அனுஞ்ஞாதா – அப்பிச்ச²தா, ஸந்துட்டி²தா, மத்தஞ்ஞுதா. திஸ்ஸோ பஞ்ஞத்தியோ – பஞ்ஞத்தி, அனுபஞ்ஞத்தி, அனுப்பன்னபஞ்ஞத்தி. அபராபி திஸ்ஸோ பஞ்ஞத்தியோ – ஸப்³ப³த்த²பஞ்ஞத்தி, பதே³ஸபஞ்ஞத்தி, ஸாதா⁴ரணபஞ்ஞத்தி. அபராபி திஸ்ஸோ பஞ்ஞத்தியோ – அஸாதா⁴ரணபஞ்ஞத்தி, ஏகதோபஞ்ஞத்தி, உப⁴தோபஞ்ஞத்தி.

அத்தா²பத்தி பா³லோ ஆபஜ்ஜதி, நோ பண்டி³தோ; அத்தா²பத்தி பண்டி³தோ ஆபஜ்ஜதி, நோ பா³லோ; அத்தா²பத்தி பா³லோ சேவ ஆபஜ்ஜதி பண்டி³தோ ச. அத்தா²பத்தி காளே ஆபஜ்ஜதி, நோ ஜுண்ஹே; அத்தா²பத்தி ஜுண்ஹே ஆபஜ்ஜதி, நோ காளே; அத்தா²பத்தி காளே சேவ ஆபஜ்ஜதி ஜுண்ஹே ச. அத்தி² காளே கப்பதி, நோ ஜுண்ஹே; அத்தி² ஜுண்ஹே கப்பதி, நோ காளே; அத்தி² காளே சேவ கப்பதி ஜுண்ஹே ச. அத்தா²பத்தி ஹேமந்தே ஆபஜ்ஜதி, நோ கி³ம்ஹே நோ வஸ்ஸே; அத்தா²பத்தி கி³ம்ஹே ஆபஜ்ஜதி, நோ ஹேமந்தே நோ வஸ்ஸே; அத்தா²பத்தி வஸ்ஸே ஆபஜ்ஜதி, நோ ஹேமந்தே நோ கி³ம்ஹே. அத்தா²பத்தி ஸங்கோ⁴ ஆபஜ்ஜதி, ந க³ணோ ந புக்³க³லோ; அத்தா²பத்தி க³ணோ ஆபஜ்ஜதி, ந ஸங்கோ⁴ ந புக்³க³லோ; அத்தா²பத்தி புக்³க³லோ ஆபஜ்ஜதி, ந ஸங்கோ⁴ ந க³ணோ. அத்தி² ஸங்க⁴ஸ்ஸ கப்பதி, ந க³ணஸ்ஸ ந புக்³க³லஸ்ஸ; அத்தி² க³ணஸ்ஸ கப்பதி, ந ஸங்க⁴ஸ்ஸ ந புக்³க³லஸ்ஸ; அத்தி² புக்³க³லஸ்ஸ கப்பதி, ந ஸங்க⁴ஸ்ஸ ந க³ணஸ்ஸ. திஸ்ஸோ சா²த³னா வத்து²ம் சா²தே³தி, நோ ஆபத்திம்; ஆபத்திம் சா²தே³தி, நோ வத்து²ம்; வத்து²ஞ்சேவ சா²தே³தி ஆபத்திஞ்ச. திஸ்ஸோ படிச்சா²தி³யோ – ஜந்தாக⁴ரபடிச்சா²தி³, உத³கபடிச்சா²தி³, வத்த²படிச்சா²தி³. [அ. நி. 3.132] தீணி படிச்ச²ன்னானி வஹந்தி, நோ விவடானி – மாதுகா³மோ படிச்ச²ன்னோ வஹதி, நோ விவடோ; ப்³ராஹ்மணானம் மந்தா படிச்ச²ன்னா வஹந்தி, நோ விவடா; மிச்சா²தி³ட்டி² படிச்ச²ன்னா வஹதி, நோ விவடா. தீணி விவடானி விரோசந்தி, நோ படிச்ச²ன்னானி – சந்த³மண்ட³லம் விவடம் விரோசதி, நோ படிச்ச²ன்னம்; ஸூரியமண்ட³லம் விவடம் விரோசதி, நோ படிச்ச²ன்னம்; ததா²க³தப்பவேதி³தோ த⁴ம்மவினயோ விவடோ விரோசதி, நோ படிச்ச²ன்னோ. தயோ ஸேனாஸனக்³கா³ஹா – புரிமகோ, பச்சி²மகோ, அந்தராமுத்தகோ. அத்தா²பத்தி கி³லானோ ஆபஜ்ஜதி, நோ அகி³லானோ; அத்தா²பத்தி அகி³லானோ ஆபஜ்ஜதி, நோ கி³லானோ; அத்தா²பத்தி கி³லானோ சேவ ஆபஜ்ஜதி அகி³லானோ ச.

தீணி அத⁴ம்மிகானி பாதிமோக்க²ட்ட²பனானி. தீணி த⁴ம்மிகானி பாதிமோக்க²ட்ட²பனானி. தயோ பரிவாஸா – படிச்ச²ன்னபரிவாஸோ, அப்படிச்ச²ன்னபரிவாஸோ, ஸுத்³த⁴ந்தபரிவாஸோ. தயோ மானத்தா – படிச்ச²ன்னமானத்தம், அப்படிச்ச²ன்னமானத்தம், பக்க²மானத்தம். தயோ பாரிவாஸிகஸ்ஸ பி⁴க்கு²னோ ரத்திச்சே²தா³ – ஸஹவாஸோ, விப்பவாஸோ, அனாரோசனா. அத்தா²பத்தி அந்தோ ஆபஜ்ஜதி, நோ ப³ஹி; அத்தா²பத்தி ப³ஹி ஆபஜ்ஜதி, நோ அந்தோ; அத்தா²பத்தி அந்தோ சேவ ஆபஜ்ஜதி ப³ஹி ச. அத்தா²பத்தி அந்தோஸீமாய ஆபஜ்ஜதி, நோ ப³ஹிஸீமாய; அத்தா²பத்தி ப³ஹிஸீமாய ஆபஜ்ஜதி, நோ அந்தோஸீமாய; அத்தா²பத்தி அந்தோஸீமாய சேவ ஆபஜ்ஜதி ப³ஹிஸீமாய ச. தீஹாகாரேஹி ஆபத்திம் ஆபஜ்ஜதி – காயேன ஆபஜ்ஜதி, வாசாய ஆபஜ்ஜதி, காயேன வாசாய ஆபஜ்ஜதி. அபரேஹிபி தீஹாகாரேஹி ஆபத்திம் ஆபஜ்ஜதி – ஸங்க⁴மஜ்ஜே², க³ணமஜ்ஜே², புக்³க³லஸ்ஸ ஸந்திகே. தீஹாகாரேஹி ஆபத்தியா வுட்டா²தி – காயேன வுட்டா²தி, வாசாய வுட்டா²தி, காயேன வாசாய வுட்டா²தி. அபரேஹிபி தீஹாகாரேஹி ஆபத்தியா வுட்டா²தி – ஸங்க⁴மஜ்ஜே², க³ணமஜ்ஜே², புக்³க³லஸ்ஸ ஸந்திகே. தீணி அத⁴ம்மிகானி அமூள்ஹவினயஸ்ஸ தா³னானி. தீணி த⁴ம்மிகானி அமூள்ஹவினயஸ்ஸ தா³னானி.

[சூளவ. 6] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ தஜ்ஜனீயகம்மம் கரேய்ய – ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி. [சூளவ. 15] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ நியஸ்ஸகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி. [சூளவ. 27] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ பப்³பா³ஜனீயகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ குலதூ³ககோ ஹோதி பாபஸமாசாரோ பாபஸமாசாரா தி³ஸ்ஸந்தி சேவ ஸுய்யந்தி ச. தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ படிஸாரணீயகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்தி ப³ஹுலோ அனபதா³னோ கி³ஹீ அக்கோஸதி பரிபா⁴ஸதி. [சூளவ. 50] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ ஆபத்தியா அத³ஸ்ஸனே உக்கே²பனீயகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ ஆபத்திம் ஆபஜ்ஜித்வா ந இச்ச²தி ஆபத்திம் பஸ்ஸிதும். [சூளவ. 59] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ ஆபத்தியா அப்படிகம்மே உக்கே²பனீயகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். [சூளவ. 69] தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மம் கரேய்ய – ப⁴ண்ட³னகாரகோ ஹோதி…பே… ஸங்கே⁴ அதி⁴கரணகாரகோ, பா³லோ ஹோதி அப்³யத்தோ, ஆபத்திப³ஹுலோ அனபதா³னோ ந இச்ச²தி பாபிகம் தி³ட்டி²ம் படினிஸ்ஸஜ்ஜிதும்.

தீஹங்கே³ஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ ஆகா³ள்ஹாய சேதேய்ய – ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ, பா³லோ ஹோதி அப்³யத்தோ ஆபத்திப³ஹுலோ அனபதா³னோ, கி³ஹிஸம்ஸட்டோ² விஹரதி அனனுலோமிகேஹி கி³ஹிஸம்ஸக்³கே³ஹி. தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – அலஜ்ஜீ ச ஹோதி, பா³லோ ச, அபகதத்தோ ச. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – காயிகேன த³வேன ஸமன்னாக³தோ ஹோதி, வாசஸிகேன த³வேன ஸமன்னாக³தோ ஹோதி, காயிகவாசஸிகேன த³வேன ஸமன்னாக³தோ ஹோதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – காயிகேன அனாசாரேன ஸமன்னாக³தோ ஹோதி, வாசஸிகேன அனாசாரேன ஸமன்னாக³தோ ஹோதி, காயிகவாசஸிகேன அனாசாரேன ஸமன்னாக³தோ ஹோதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – காயிகேன உபகா⁴திகேன ஸமன்னாக³தோ ஹோதி, வாசஸிகேன உபகா⁴திகேன ஸமன்னாக³தோ ஹோதி, காயிகவாசஸிகேன உபகா⁴திகேன ஸமன்னாக³தோ ஹோதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – காயிகேன மிச்சா²ஜீவேன ஸமன்னாக³தோ ஹோதி, வாசஸிகேன மிச்சா²ஜீவேன ஸமன்னாக³தோ ஹோதி, காயிகவாசஸிகேன மிச்சா²ஜீவேன ஸமன்னாக³தோ ஹோதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – ஆபத்திம் ஆபன்னோ கம்மகதோ உபஸம்பாதே³தி, நிஸ்ஸயம் தே³தி, ஸாமணேரம் உபட்டா²பேதி. அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – யாய ஆபத்தியா ஸங்கே⁴ன கம்மம் கதம் ஹோதி தம் ஆபத்திம் ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம். அபரேஹிபி தீஹங்கே³ஹி ஸமன்னாக³தஸ்ஸ பி⁴க்கு²னோ கம்மம் காதப்³ப³ம் – பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி.

தீஹங்கே³ஹி ஸமன்னாக³தஸ்ஸ பி⁴க்கு²னோ ஸங்க⁴மஜ்ஜே² உபோஸத²ம் ட²பேந்தஸ்ஸ – ‘‘அலம், பி⁴க்கு², மா ப⁴ண்ட³னம் மா கலஹம் மா விக்³க³ஹம் மா விவாத³’’ந்தி ஓமத்³தி³த்வா ஸங்கே⁴ன உபோஸதோ² காதப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ ஸங்க⁴மஜ்ஜே² பவாரணம் ட²பேந்தஸ்ஸ – ‘‘அலம், பி⁴க்கு², மா ப⁴ண்ட³னம் மா கலஹம் மா விக்³க³ஹம் மா விவாத³’’ந்தி ஓமத்³தி³த்வா ஸங்கே⁴ன பவாரேதப்³ப³ம் – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ ந காசி ஸங்க⁴ஸம்முதி தா³தப்³பா³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தேன பி⁴க்கு²னா ஸங்கே⁴ ந வோஹரிதப்³ப³ம் [ஸம்கோ⁴ ந வோஹரிதப்³போ³ (ஸ்யா.)] – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தோ பி⁴க்கு² ந கிஸ்மிம் சி பச்சேகட்டா²னே ட²பேதப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ நிஸ்ஸாய ந வத்த²ப்³ப³ம் – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ நிஸ்ஸயோ ந தா³தப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ ஓகாஸகம்மம் காராபேந்தஸ்ஸ நாலம் ஓகாஸகம்மம் காதும் – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ ஸவசனீயம் நாதா³தப்³ப³ம் – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ வினயோ ந புச்சி²தப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தேன பி⁴க்கு²னா வினயோ ந புச்சி²தப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ வினயோ ந விஸ்ஸஜ்ஜேதப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தேன பி⁴க்கு²னா வினயோ ந விஸ்ஸஜ்ஜேதப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தஸ்ஸ பி⁴க்கு²னோ அனுயோகோ³ ந தா³தப்³போ³ – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தேன பி⁴க்கு²னா ஸத்³தி⁴ம் வினயோ ந ஸாகச்சி²தப்³போ³ [ஸாகச்சா²தப்³போ³ (க.)] – அலஜ்ஜீ ச ஹோதி, பா³லோ ச, அபகதத்தோ ச. தீஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம் ந நிஸ்ஸயோ தா³தப்³போ³ ந ஸாமணேரோ உபட்டா²பேதப்³போ³ – அலஜ்ஜீ ச ஹோதி, பா³லோ ச, அபகதத்தோ ச.

தயோ உபோஸதா² – சாதுத்³த³ஸிகோ, பன்னரஸிகோ, ஸாமக்³கி³உபோஸதோ². அபரேபி தயோ உபோஸதா² – ஸங்கே⁴உபோஸதோ², க³ணேஉபோஸதோ², புக்³க³லேஉபோஸதோ². அபரேபி தயோ உபோஸதா² – ஸுத்துத்³தே³ஸோஉபோஸதோ², பாரிஸுத்³தி⁴உபோஸதோ², அதி⁴ட்டா²னுபோஸதோ². திஸ்ஸோ பவாரணா – சாதுத்³த³ஸிகா, பன்னரஸிகா, ஸாமக்³கி³பவாரணா. அபராபி திஸ்ஸோ பவாரணா – ஸங்கே⁴பவாரணா, க³ணேபவாரணா, புக்³க³லேபவாரணா. அபராபி திஸ்ஸோ பவாரணா – தேவாசிகாபவாரணா, த்³வேவாசிகாபவாரணா, ஸமானவஸ்ஸிகாபவாரணா.

தயோ ஆபாயிகா நேரயிகா – இத³மப்பஹாய, யோ ச அப்³ரஹ்மசாரீ ப்³ரஹ்மசாரிபடிஞ்ஞோ, யோ ச ஸுத்³த⁴ம் ப்³ரஹ்மசாரிம் பரிஸுத்³த⁴ப்³ரஹ்மசரியம் சரந்தம் அமூலகேன அப்³ரஹ்மசரியேன அனுத்³த⁴ம்ஸேதி, யோ சாயம் ஏவம்வாதீ³ ஏவம்தி³ட்டி² [ஏவம்தி³ட்டீ² (ஸீ.)] – ‘‘நத்தி² காமேஸு தோ³ஸோ’’தி ஸோ காமேஸு பாதப்³யதம் ஆபஜ்ஜதி. [அ. நி. 3.70] தீணி அகுஸலமூலானி – லோபோ⁴ அகுஸலமூலம், தோ³ஸோ அகுஸலமூலம், மோஹோ அகுஸலமூலம். [அ. நி. 3.70] தீணி குஸலமூலானி – அலோபோ⁴ குஸலமூலம், அதோ³ஸோ குஸலமூலம், அமோஹோ குஸலமூலம். தீணி து³ச்சரிதானி – காயது³ச்சரிதம், வசீது³ச்சரிதம், மனோது³ச்சரிதம். தீணி ஸுசரிதானி – காயஸுசரிதம், வசீஸுசரிதம், மனோஸுசரிதம். தயோ அத்த²வஸே படிச்ச ப⁴க³வதா குலேஸு திகபோ⁴ஜனம் பஞ்ஞத்தம் – து³ம்மங்கூனம் புக்³க³லானம் நிக்³க³ஹாய, பேஸலானம் பி⁴க்கூ²னம் பா²ஸுவிஹாராய, ‘‘மா பாபிச்சா² பக்க²ம் நிஸ்ஸாய ஸங்க⁴ம் பி⁴ந்தே³ய்யு’’ந்தி குலானுத்³த³யதாய ச. [சூளவ. 350] தீஹி அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ² பாபிச்ச²தா பாபமித்ததா ஓரமத்தகேன விஸேஸாதி⁴க³மேன அந்தரா வோஸானம் ஆபாதி³. திஸ்ஸோ ஸம்முதியோ – த³ண்ட³ஸம்முதி, ஸிக்காஸம்முதி, த³ண்ட³ஸிக்காஸம்முதி. திஸ்ஸோ பாது³கா து⁴வட்டா²னிகா அஸங்கமனீயா – வச்சபாது³கா, பஸ்ஸாவபாது³கா, ஆசமனபாது³கா. திஸ்ஸோ பாத³க⁴ம்ஸனியோ – ஸக்க²ரம், கத²லா, ஸமுத்³த³பே²ணகோதி.

திகம் நிட்டி²தம்.

தஸ்ஸுத்³தா³னம் –

திட்ட²ந்தே காலே ரத்திஞ்ச, த³ஸ பஞ்ச குஸலேன;

வேத³னா சோத³னா வத்து², ஸலாகா த்³வே படிக்கி²பா.

பஞ்ஞத்தி அபரே த்³வே ச, பா³லோ காளே ச கப்பதி;

ஹேமந்தே ஸங்கோ⁴ ஸங்க⁴ஸ்ஸ, சா²த³னா ச படிச்சா²தி³.

படிச்ச²ன்னா விவடா ச, ஸேனாஸனகி³லாயனா;

பாதிமோக்க²ம் பரிவாஸம், மானத்தா பாரிவாஸிகா.

அந்தோ அந்தோ ச ஸீமாய, ஆபஜ்ஜதி புனாபரே;

வுட்டா²தி அபரே சேவ, அமூள்ஹவினயா து³வே.

தஜ்ஜனீயா நியஸ்ஸா ச, பப்³பா³ஜபடிஸாரணீ;

அத³ஸ்ஸனா படிகம்மே, அனிஸ்ஸக்³கே³ ச தி³ட்டி²யா.

ஆகா³ள்ஹகம்மாதி⁴ஸீலே, த³வானாசார கா⁴திகா;

ஆஜீவாபன்னா தாதி³ஸிகா, அவண்ணுபோஸதே²ன ச.

பவாரணா ஸம்முதி ச, வோஹாரபச்சேகேன ச;

ந வத்த²ப்³ப³ம் ந தா³தப்³ப³ம், ஓகாஸம் ந கரே ததா².

ந கரே ஸவசனீயம், ந புச்சி²தப்³ப³கா து³வே;

ந விஸ்ஸஜ்ஜே து³வே சேவ, அனுயோக³ம்பி நோ த³தே³.

ஸாகச்சா² உபஸம்பதா³, நிஸ்ஸயஸாமணேரா ச;

உபோஸத²திகா தீணி, பவாரணதிகா தயோ.

ஆபாயிகா அகுஸலா, குஸலா சரிதா து³வே;

திகபோ⁴ஜனஸத்³த⁴ம்மே, ஸம்முதி பாது³கேன ச;

பாத³க⁴ம்ஸனிகா சேவ, உத்³தா³னம் திககே இத³ந்தி.