11. ஏகாத³ஸகவாரோ

331. ஏகாத³ புக்³க³லா அனுபஸம்பன்னா ந உபஸம்பாதே³தப்³பா³, உபஸம்பன்னா நாஸேதப்³பா³. ஏகாத³ஸ பாது³கா அகப்பியா. ஏகாத³ஸ பத்தா அகப்பியா. ஏகாத³ஸ சீவரானி அகப்பியானி. ஏகாத³ஸ யாவததியகா. பி⁴க்கு²னீனம் ஏகாத³ஸ அந்தராயிகா த⁴ம்மா புச்சி²தப்³பா³. ஏகாத³ஸ சீவரானி அதி⁴ட்டா²தப்³பா³னி. ஏகாத³ஸ சீவரானி ந விகப்பேதப்³பா³னி. ஏகாத³ஸே அருணுக்³க³மனே நிஸ்ஸக்³கி³யம் ஹோதி. ஏகாத³ஸ க³ண்டி²கா கப்பியா. ஏகாத³ஸ விதா⁴ [வீதா² (ஸ்யா.)] கப்பியா. ஏகாத³ஸ பத²வீ அகப்பியா. ஏகாத³ஸ பத²வீ கப்பியா. ஏகாத³ஸ நிஸ்ஸயபடிப்பஸ்ஸத்³தி⁴யோ. ஏகாத³ஸ புக்³க³லா அவந்தி³யா. ஏகாத³ஸ பரமானி. ஏகாத³ஸ வரானி யாசிம்ஸு. ஏகாத³ஸ ஸீமாதோ³ஸா. அக்கோஸகபரிபா⁴ஸகே புக்³க³லே ஏகாத³ஸாதீ³னவா பாடிகங்கா². [அ. நி. 11.15; மி. ப. 4.4.6] மேத்தாய சேதோவிமுத்தியா ஆஸேவிதாய பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய ஏகாத³ஸானிஸம்ஸா பாடிகங்கா². ஸுக²ம் ஸுபதி, ஸுக²ம் படிபு³ஜ்ஜ²தி, ந பாபகம் ஸுபினம் பஸ்ஸதி, மனுஸ்ஸானம் பியோ ஹோதி, அமனுஸ்ஸானம் பியோ ஹோதி, தே³வதா ரக்க²ந்தி, நாஸ்ஸ அக்³கி³ வா விஸம் வா ஸத்த²ம் வா கமதி, துவட்டம் சித்தம் ஸமாதி⁴யதி, முக²வண்ணோ விப்பஸீத³தி, அஸம்மூள்ஹோ காலங்கரோதி, உத்தரி அப்படிவிஜ்ஜ²ந்தோ ப்³ரஹ்மலோகூபகோ³ ஹோதி – மேத்தாய சேதோவிமுத்தியா ஆஸேவிதாய பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய இமே ஏகாத³ஸானிஸம்ஸா பாடிகங்கா²தி.

ஏகாத³ஸகம் நிட்டி²தம்.

தஸ்ஸுத்³தா³னம் –

நாஸேதப்³பா³ பாது³கா ச, பத்தா ச சீவரானி ச;

ததியா புச்சி²தப்³பா³ ச, அதி⁴ட்டா²னவிகப்பனா.

அருணா க³ண்டி²கா விதா⁴, அகப்பியா ச கப்பியம்;

நிஸ்ஸயாவந்தி³யா சேவ, பரமானி வரானி ச;

ஸீமாதோ³ஸா ச அக்கோஸா, மேத்தாயேகாத³ஸா கதாதி.

ஏகுத்தரிகனயோ.

தஸ்ஸுத்³தா³னம் –

ஏககா ச து³கா சேவ, திகா ச சதுபஞ்சகா;

ச²ஸத்தட்ட²னவகா ச, த³ஸ ஏகாத³ஸானி ச.

ஹிதாய ஸப்³ப³ஸத்தானம், ஞாதத⁴ம்மேன தாதி³னா;

ஏகுத்தரிகா விமலா, மஹாவீரேன தே³ஸிதாதி.

ஏகுத்தரிகனயோ நிட்டி²தோ.